|
Задлан шинжилгээгээр хохирогч хүнд зүйлээр цохиулсны улмаас нас барсан болохыг тогтоожээ. Үхэхээсээ өмнө хүчтэй тэмцэлдсэн ул мөр илэрхий. Цуснаас нь тайвшруулах үйлчилгээтэй эм өндөр тунгаар илэрсэн байна. Энэ хүнийг хөнөөсөн гэдэгт эргэлзэх зүйл бараг үгүй. Энэ удаа хүсэлт гаргаагүй байхад нь хэргийн газрын үзлэгийн тайлан өөрт нь ирсэнд Нэргүй гайхлаа. Өөрийгөө чухал албан тушаалд очсоныг тэр мэдрэв. Энэ олон жилийн эцэст тэрбээр эрх мэдлийн чухлыг ухаарах шиг боллоо. Тэгээд ч хүн амины энэ хоёр хэрэг түүний анхаарлыг татаад байлаа. Ихэнх хүмүүсийн төсөөлж, ярьдгаас ч илүү их хүн амины хэрэг энэ хотод гарах болсон ч энэ хот, энэ нийгэм тайван амгалан хэвээр. Ийм төрлийн хэрэг ихэнхдээ л шалтгаан нь илэрхий, энгийн. Хардалт, архидалт, гэр бүлийн хүчирхийллээс үүдэлтэй. Шалтгаан нь тодорхойгүй хэргийг ч учрыг нь олж тайлахад ядах юмгүй. Аль нэг суманд танхай залуу алуулчихаад хэргийн эзэн нь тодорхойгүй байлаа гэхэд яагаад энэ хэрэг гарсан, ямар хүмүүс оролцсон тухай зөв таамгийг цагдаа нар ер нь л бодоод олчихно. Гэтэл энэ хэрэг огт ондоо. Сонирхлыг нь эрхгүй татаад байгаа тул өөрийнхөө хуучин орлогч Доржпаламтай уулзахаар болов. Доржпалам залуу, туршлага нимгэн. Гэхдээ Нэргүй түүний сийрэг ухаан, эргэцүүлж дүгнэх шаггүй чадварыг нь үнэлдэг. Тушаал дэвшсэнээс нь хойш Нэргүй Доржпаламтай аль болох хөндийхөн байж, хэтэрхий хошуу дүрэн, ажил хэрэгт нь оролцоод байгаа юм шиг сэтгэгдэл төрөхвий хэмээн болгоомжлох болсон ч тусламж зөвлөгөө хүссэн үед нь харин хэзээ ч татгалзаж байгаагүй билээ. Доржпаламын хувьд Нэргүйг бараг л багш аа гэж үзэн, зөвлөгөө, сургамжийг нь ихэд хүндэтгэн сонсоно. Хотод цөөнгүй нээгдэж эхлээд байгаа Америк маягийн кафены нэгэнд сард нэг удаа энэ хоёр уулздаг. Эдийн засаг хямралтай байгаа ч энэ мэт зүйлд урсгах мөнгө олдоод байдгийн учрыг Нэргүй гайхдаг байлаа.
Энэ удаа тэд эртхэн уулзалдсан боловч кафе дүүрэн хүнтэй. Дийлэнх нь хичээлийн завсарлагаанаар тамхи татан, ярилцан суух оюутнууд болоод гар утсаараа завгүй ярьж, бас ажил хэргийн яриа дэлгэж суугаа, костюм өмссөн бизнесмэнүүд. Кофены хурц үнэр, нарийн боовны сайхан үнэртэй холилдон үнэртэнэ. Гадаа хурц нартай, тэнгэр бүртийх ч үүлгүй, цэлмэг. Гудамжны эсрэг талд хэсэг хүн энэ жилийн сүүлчийнх байж мэдэх хурц нартай, таатай дулаан өдрийг ашиглан, дугуй ширээ тойрон суугаад шатар тоглож байлаа. Настайчуудын зарим нь дээлтэй, зарим нь зузаан пальто, брэтэн малгай духдуулсан харагдана. Америк маягийн саравчтай малгайгаа доош даран өглөөний хурц нарнаас нүдээ халхалсан хүн ч байна. Зогсоо чөлөөгүй баагиулах тамхины утаа нь манан адил суунаглана. Түүний урд тавьсан томоо гэгчийн сэнжтэй аяга руу Нэргүй тааламжгүй харлаа. “Энэ чинь кофе биш, сувиллын ундаа юм уу даа”
Доржпалам мөрөө хавчив. “Америкчуудын л уудаг эд”
“Бид тэгвэл дасах хэрэгтэй л болох нь ээ” гээд Нэргүй томоо балгалаа. “Тэгэхийн тулд цаг хугацаа шаардана. Юутай ч чамд баярлалаа”
Доржпалам түүний өөдөөс харан суугаад өөрийнхийгөө ууж эхлэв. “Эрх мэдлийн хонгилд ямархуу байна даа? Амьдрал хэр байна?”
“Тэр эрх мэдэл гэдэг чинь өөр хонгилд байдаг эд байх. Миний хийдэг ажил гэвэл уулзалтад оролцож, бичиг баримтан дээр гарын үсэг зурах. Гэтэл чи тэнд бөөн бөөн олз хураагаад л сууж байдаг”
“Би юу даа? Ямар олз билээ?”
“Долоо хоногийн дотор хүн амины хоёр хэрэг. Ойрын таван жилд миний ажиллаж байсан хэргүүдээс хоёулаа сонирхолтой, ээдрээтэй”
“Нээрээ тийм л дээ. Бөөн олз. Би яаж мартаж чадав аа?”
“Чи юу гэж бодож байна? Хоорондоо холбоотой болов уу?”
Доржпалам Нэргүйн рүү хором хэртээ ширтсэнээ инээмсэглэв. “Мэдээлэл цуглуулах гэж байгаа юм уу? Сайд иймэрхүү аллагын хэргийг сонирхдоггүй л баймаар юм” Тэрбээр инээсээр. Дүрлийсэн нүдтэй түүний царай зүгээр л хэрэгт дурласан, гэмгүй төрхтэй. Гэвч Нэргүй түүнийг тэгж дутуу үнэлж болохгүй гэдгийг сайн мэднэ.
“Би зүгээр л хувийн журмаар сонирхсон юм. Цагдаагийн зүгээс юу гэж үзэж байгааг л мэдэх гэсэн хэрэг. Гэхдээ цэвэр хувийн сонирхол, хэрэгт дурлаад л. Хуучин албандаа байсан ч болоосой гэж бодож байна шүү” Доош тонгойн хачин жигтэй кофе руугаа дүнсгэрдүүхэн харах хуучин даргаа хараад Доржпалам өрөвдөх шиг болов. Өөдөөс нь хараад сууж байгаа хар костюм, шар зангиатай энэ эрхэм амьдралын ямар ч зорилгогүй болсон шиг Доржпаламд санагдав.
Сайдын өөрийх нь хүсэлтээр Нэргүй Хууль зүй, дотоод хэргийн яаманд тушаал дэвшин томилогдсон билээ. Цагдаагийн газарт Нэргүй тийм ч нээлттэй, олонтой хүн байсангүй. Хамт олон нь түүнийг хүндэлдэг ч тэгтлээ дуртай байгаагүй юм. Түүний өнгөрсөн амьдралын талаар дэндүү олон цуу яриа, хардлага сэрдлэг ажилтнуудын дунд яригддаг байв. Мэдээж Нэргүй цагдаагийн салбарт улам бүр ужгирч байгаа авилгын хэрэгт орооцолдолгүй, ажилдаа нягт нямбай байж, аливаа хардлагаас цэвэр хоцордог байлаа. Харин яаманд ийнхүү суга дэвшин очсон нь түүнийг дарга нарын бууны нохой хэмээн шивэр авир хийдэг олон хүний хардлагыг баталж орхив. Зарим нь түүнээс ч долоо дор бололтой хоцорсон. Улс төрийн савалгаа, халаа сэлгээг ашиглан албан тушаал ахисан увайгүй долдой гэж түүнийг санасан. Гэвч Доржпалам иймэрхүү явган яриа, хоосон таамгийн алинд ч итгээгүй. Нэргүйн туршлага, чадварт тэр хэзээ ч эргэлзэж байсангүй. Хамт ажиллагсдаас нь чамгүй олон хүн ялих шалихгүй хээл хахуульд орооцолдсонд ихээхэн дургүйцдэг Нэргүйн бодлыг тэр хүлээн зөвшөөрдөг байлаа. Хувь хүний хувьд бол түүнийг шаргуу, дайчин, шулуун шударга, итгэл даах хүн гэж санана. Бас өөрийг нь хэлтсийн дарга болгохоор Нэргүй тун шамдуу зүтгэсэнд талархдаг билээ. Улс төрийн амьдрал тогтвор муутай байгаа энэ үед ажил мэргэжлийн арвин туршлага, мэдлэгээс гадна хувь хүний олон сайн чанарыг өөртөө шингээсэн Нэргүйг сайд итгэж болох хамтрагчаараа сонгосонд Доржпалам огтхон ч гайхаагүй юм. Сайдын саналаас татгалзах ямар нэг шалтгаан Нэргүйд байгаагүй гэдгийг ч тэрбээр гадарлана. Шинэ албаны ахуй хангамж, эрх мэдэл хангалттай их ч цагдаагийн ахмад кадр бичиг цаастай зууралдсан энэ ажилдаа тэгтлээ сэтгэл хангалуун байдаггүй гэдгийг залуу офицер мөн л гадарлаж байсан юм. “Аллагууд хоорондоо холбоотой гэж би бодохгүй байна аа. Зүгээр л тохиолдол байх магадлалтай. Ийм хоёр хүн амины хэрэг дарааллаад шахуу гарч байсан тохиолдол бараг үгүй. Тэглээ гээд ийм зүйл тохиолдож огт болохгүй гэсэн үг биш шүү дээ. Үгүй бол багахан сөргөлдөөн, шөргөлдөөн ч байж болох л юм. Хэрэв тийм бол ээжүүд нь л шар махтайгаа хатаж, нулимсаа ширгэтэл уйлж суугаа даа” хэмээн Доржпалам Нэргүйн асуултад хариуллаа.
_________________
Азтай л гэвэл азтай л гэнэ шт
|
Бүртгүүлэх
Нэвтрэх
Түгээмэл асуултууд
Хайх
