http://world.eagle.mn/content/read/24008.htm
АНУ, ОХУ Исламын улсын эсрэг хамтран тэмцэнэ
АНУ-ын Төрийн нарийн бичгийн дарга Жон Керри, ОХУ-ын Гадаад хэргийн сайд Сергей Лавров нар өчигдөр /X.15/ Францын Парис хотноо уулзаж цаг үеийн асуудлаар санал солилцсон байна. Уулзалтын үеэр талууд дэлхий нийтийг түгшээж буй эбола вирус болон Ирак, Сирийн нутагт хяналтаа тогтоогоод байгаа Исламын улстай хамтран тэмцэх нь зүйтэй гэсэн байр суурьт санал нэгджээ.
Төрийн нарийн бичгийн дарга Жон Керри “Лалын хэт даврагч зэвсэгт бүлэглэл болох Исламын улстай холбоотой тагнуулын мэдээллийг Москва болон Вашингтон харилцан солилцож байхаар тохиролцсон. Учир нь бидний эцсийн зорилго бол Исламын улсын зэвсэгт дайчдыг бүрэн устгах явдал юм” гэжээ. Мөн тэрээр хэдийгээр хоёр улс улс төрийн үзэл баримтлалын хувьд ялгаатай ч дэлхийн тэргүүлэх гүрнүүдийн хувьд глобал асуудалтай хамтран тэмцэх нь зүйтэй хэмээн мэдэгдсэн байна.
Түүнчлэн бусад бүс нутаг дахь терроризмтой тэмцэх ажлын хүрээнд тагнуулын хамтын ажиллагааг эрчимжүүлэх талаар хэлэлцсэн аж. Гэхдээ АНУ-ын тэргүүлсэн Исламын улсын эсрэг кампанит ажилд ОХУ нэгдэх эсэх нь эргэлзээтэй байгаа юм.
Үүнээс гадна ноён Жон Керри, Сергей Лавров нар Украины асуудлаар байр сууриа илэрхийлжээ. Тэд өнгөрөгч есдүгээр сард Украины Засгийн газар болон салан тусгаарлагчдын хооронд хийгдсэн гал зогсоох хэлэлцээр, түүний хэрэгжилтийг онцолсон байна. Энэ үеэр Керри ОХУ энхийн хэлэлцээрт тусгагдсан бүх заалтыг хэрэгжүүлэх хэрэгтэй гээд Украины нутаг дэвсгэрт байрлаж байгаа цэргээ татах, баривчилсан хүмүүсийг суллахыг ОХУ-аас шаарджээ. Харин Сергей Лавров зүүн Украин дахь мөргөлдөөнийг тус улсын Засгийн газар, салан тусгаарлагчид яриа хэлэлцээрийн замаар шийдвэрлэх нь зүйтэй гэсэн байна.
