|
Эх сурвалж. Тулааны сайтаас ярилцлагыг нь оруулав.
Фёдор Емельяненко vs. Жефф Монсон тулааны хэвлэлийн бага хурал
2011.11.20-нд ОХУ-ын нийслэл Москва хотын "Олимпийский" спортын ордонд M-1 Global холбооноос зохиох тэмцээнийг угтаж, өчигдөр Москвад хэвлэлийн бага хурал зохион байгууллаа. Тэмцээний гол тулаанд учирч тулалдах Орос улсын 35 настай тамирчин Фёдор Емельяненко болон Америк улсын 40 настай тамирчин Жефф Монсон нарын хэлсэн үгийг хүргэж байна.
Фёдор Емельяненко:
Би нутагтаа тулаан хийх гэж байгаадаа маш их баяртай байна, бараг бүх тулаанаа гадаадад хийлээ, одоогоос дөрвөн жилийн өмнө л Санкт-Петербургд тэмцээнд орж байсан. Жеффд энд хүрэлцэн ирсэнд нь баярлалаа, бид сайхан тулаан үзүүлнэ гэж бодож байна. Жефф шилдэг тулаанчдын нэг, би үргэлж карьерыг нь ажигласаар ирсэн, түүнтэй хүчээ үзэлцэх болсонд баяртай байна. Энэ завшааныг ашиглаад Владимир Владимировичд бүх тулааны тамирчдын өмнөөс Төрсөн өдрийн мэнд хүргэе!
Жефф Монсон:
Би Орост ирсэндээ туйлын их баяртай байна, энэ улсад ирж үзэхийг эртнээс хүсэж байлаа. Янз бүрийн спорт арга хэмжээний хүрээнд олон газар явж байсан ч яагаад ч юм Орост ирэх завшаан гарч байсангүй. Өчигдөр Улаан талбайд очиж үзлээ, зарим нэг хүнтэй уулзлаа. Маш сайхан байна. Гэвч бид энд ажил хэргээр ирсэн, би өнөө цагийн хамгийн шилдэг тулаанчтай учрахаар ирсэн, Фёдор бол маш хүчтэй өрсөлдөгч, гэвч би зөвхөн түрүүлэх бодолтой нааш ирсэн. Би ялахын тулд л энд байна.
Фёдорын ярилцлага:
- Фёдор, Таны сүүлийн тулаануудыг харж байх нээ Та дэндүү хүлцэнгүй, тайван харагдах юм. Таны спортын уур хилэн хаачив аа? Өрсөлдөх гэсэн төлөв байдлаа гээснээс ялагдаад байгаа юм биш үү?
- Би тулаанд хэзээ ч уур хилэнтэй гарч байгаагүй, анхаарлаа төвлөрүүлж гарах бол өөр хэрэг. Сүүлийн тулаануудад ялагдсан маань юуны түрүүнд миний буруу. Хажуугаар нь гэр бүлийн аар саар асуудал байсан л даа, гэвч хамгийн гол нь миний бэлтгэлийн алдаа дутагдлууд байгаа юм гэж бодож байна. Тийм юм болсноос хойш одоо яая гэхэв, юмыг байгаагаар нь хүлээж авсан. Дүгнэлт хийж, цааш явах хэрэгтэй.
- Өөрөөр хэлбэл Таны ялагдлуудад зүй тогтол гэж байхгүй, ялагдал тус бүр өөр хоорондоо холбоогүй гэж үү?
- Сүүлийн гуван тулаанд гурвууланд нь би ялж чадна гэдгээ мэдэрч байсан боловч эцсийн агшинд бүх юм гараас алдарчихаад байсан. Чадна гэж итгэж байсан ч бүх юм сансанаар болох биш дээ, Бурхны таалал тийм байсан юм байлгүй дээ.
- Тэр тулаануудадаа дүн шинжилгээ хийсэн биз дээ?
- Хийсээн, одоо ч судлаж байгаа.
- Та бол ясны тамирчин хүн, ялагдлын шалтгааныг Танаас өөр сайн мэдэх хүн байхгүй, тэр бүхнийг Та өөрөө тайлбарлавал илүү сонирхолтой байна...
- Шалтгааныг мэдэж байгаа, гэвч би Танд хэлэхгүй.
- Фёдор, Та бэлтгэлийн арга барилдаа өөрчлөлт оруулсан уу?
- Энэ тулаанд би дүү Александрынхаа хамт Холландад очиж бэлтгэнэ, бүх гол ажлууд тэнд хийгдэнэ.
- Фёдор, сүүлийн жилүүдэд Та цохих техникийг урьтал болгож, барилдаанд ач холбогдол өгөхөө больсон шиг санагдах юм...
- Үгүй шүү, тийм биш. Бөхийн бэлтгэлд урьдын адил чухал ач холбогдол өгч байгаа, хамаг бэлтгэлийн талаас илүү хувийг барилдаанд зориулдаг.
- Фёдор, Та M-1 Global компаний хувь эзэмшигч, цаашид Та М-1-ийн далбаан доор тулаан хийсээр байх уу, эсхүл эргээд Америкт очиж өөр байгууллагтай тэмцээн хамтран зохиож, түүнд оролцох бодолтой байна уу?
- Миний хувь эзэмшдэг маань аль холбоонд тулалдах вэ гэдгийг сонгоход ямар ч тушаа болдоггүй. Аль байгууллагад тулалдах вэ гэдэг асуудал чөлөөтэй, бүх юм надад ирэх санал болоод миний боломж бололцооноос л хамаарна. М-1-ийн зохион байгуулалтын ажлын хувьд гэвэл бүх юмыг Вадим (Финкельштейн, М-1 холбооны тэргүүн. Орчуулагчийн тодр.) хариуцдаг.
- Фёдор, Та байлдааны самбогийн тэмцээнд дахин оролцох уу?
- Самбо бол миний хамгийн дуртай спорт. Би самбогоос гарсан хүн. Оросын аварга шалгаруулах тэмцээн дараа жилийн хавар болно, Бурхны тааллаар болбол оролцоно оо.
- Фёдор, Сергей Харитонов, Тантай тулалдах санал ирвэл баяртайгаар хүлээн авна гэсэн. Та энэ талаар юу гэж бодож байна?
- Японд надтай тулалдах боломж байсан, Сергей тэр боломжоо ашиглаж чадаагүй: өмнөх шалгаруулалтад нь ялагдчихсан юм. Нэг улсын хоёр тамирчин хоорондоо учирч тулалдах нь үзэгчдэд сонирхолтой байна гэдэг юу л бол. Тэгээд ч би болоод миний багийнхан Сергейд гараагаа эхлүүлэхэд нь маш их тусалдаг байсан.
- Фёдор, Та нэгэн зэрэг маш олон зүйлийг оролддог: ярилцлага, сургалт семинар, кино зураг авалт, энэ тэндээс камерын дуран, гэрлийн гялбаа гэхчлэн... нөгөөтэйгүүр Та орон нутгийн (Белгород мужийн. Орчуулагчийн тодр.) хууль тогтоох байгууллагад данстай хүн, энэ бүх давхардсан ачаалал бэлтгэлд Тань садаа болоод байдаг юм биш үү? Интернэтэд энэ тухай амтай болгон нь ярьж байна...
- Нэгдүгээрт, Таны хэлсэн шиг, Мужийн думд би зүгээр нэг данстай биш харин ажил хийдэг юм, хоёрдугаарт, тулаан дөхөөд ирэхэд би дасгалжуулагч нараасаа аль болох ярилцлага өгөхгүй байхыг хүсдэг, өөрөө ч ярилцлага өгөөд байдаггүй. Интернэтийн хувьд гэвэл, би өөрийн тухай дэмий худал зүйлийг уншдаггүй, амьдрал өөрөө болж бүтэхгүй зүйлээр дүүрэн байна шүү дээ. Олон нийтийн анхаарлын төвд байх хэцүү, гэвч би хүмүүсийг ойлгож, аливаад тайван хандахыг хичээдэг юм.
- Таны сүсэглэл дэндсэн юм шиг санагдахгүй байна уу?
- Надад энэ асуултыг тавих л дэндсэн юм шиг санагддаг, миний бодлоор хүнд сүсэг бишрэл байх ёстой. Бид бүхэн цөвүүн цагт мөргөл үйлдэж, жаргах цагтаа Бурхныг мартах биш, харин үргэлж сүсэглэж амьдрах ёстой. Би цаг ямагт Бурхны тухай бодож байхыг хичээдэг, сүсэг бишрэл маань тулаанд бэлтгэж, Эх Орныхоо нэрийг гаргахад огтхон ч саад болдоггүй.
Жефф Монсоны ярилцлага:
- Таны хувьд Фёдортой хийх энэ тулаан онцгой үйл явдал уу, эсхүл жирийн нэг тулаан уу?
- Фёдор шилдэг нь учраас би ааль эртнээс түүнтэй тулалдах юмсан гэдэг бодлыг тээж ирсэн. Чухам түүнийг халз тулаанд дуудахыг үргэлж хүсдэг байлаа. Мэдээж, Фёдортой хийх тулаан бол онцгой үйл явдал, тиймээс ч энэ тулаанд би ялна гэсэн эрмэлзэлтэйгээр зохих байдлаар бэлтгэж байгаа.
- Жефф, Фёдор сүүлийн гурван тулаандаа ялагдсан. Энэ байдал Таны дотоод итгэлд нэмэр болдог уу?
- Үгүй, яагаад гэвэл тулаан бүр өөрийн гэсэн давтагдашгүй онцлог шинж чанартай байдаг. Жишээ нь Фёдор Хэндерсон хоёр арван удаа таарахад, есөд нь Фёдор ялна, харин сүүлийн тулаанд Хэндерсоны талд байгаа тэр өчүүхэн магадлал шийдвэрлэх үүрэг гүйцэтгэчихсэн юм. Тиймээс тулаан бүр тусдаа үйл явдал. Би энэ тулаанд яг ийм байр суурьнаас л бэлтгэсэн.
- Жефф, Америкт маш олон ахмад тамирчин байдаг. Спортын өндөр наслалтын нууц юунд байна вэ?
- Цаагуураа намайг л хэлээд байна уу даа (инээмсэглэв)? Миний амжилтын үндэс бол миний бэртлүүд гэж болно. Учир нь бэртэл гэмтлээс болж би бэлтгэлээ илүү их ухаан зарж төлөвлөдөг болсон, бэлтгэлдээ хандах хандлагаа өөрчилснөөр би маш их зүйлд суралцсан. Би хөл бөмбөг юм уу, ижил төстэй өөр спортоор хичээллэдэг байсан бол эрт зодог тайлах байсан нь ойлгомжтой. Тэгвэл миний энэ спорт өөрийн гэсэн онцлогтой: холимог тулааны тамирчин нас сүүдэр нэмэхийн хэрээр туршлага сууж, илүү их үнэ цэнтэй болдог юм.
- Жефф, Та Оросын өөр тамирчдыг мэдэх үү?
- Би Сергей Харитонов болон өөр нэг орос тамирчинтай тулж байсан. Тулаанч бүр өөр өөр байдаг болохоор рингэнд өөрийн гэсэн өвөрмөц арга барилаа үзүүлдэг. Тулаанч бүхэн адилгүй.
- Жефф, Москва бол хүний нууцхан хүслийг гижигддэг тийм хот, сайхан орос бүсгүйчүүд гээд л... Та тэдний урхинд орчих вий дээ...
- Тийм ээ, сайхан бүсгүйчүүд олон байна. Гэвч тулаанд эхнэр маань надтай цуг ирнэ, тийм болохоор будилаад байхгүй байх аа.
|
Бүртгүүлэх
Нэвтрэх
Түгээмэл асуултууд
Хайх
чамд ч бас амжилт 
