#AsuultSambar :

ASUULT.NET - МОНГОЛ УЛС МАНДАН БАДРАГ!
It is currently Feb.23.19 11:59 pm

All times are UTC+09:00




Post new topic  Reply to topic  [ 794 posts ]  Go to page Previous 125 26 27 28 2931 Next
Author Message
PostPosted: Jan.29.19 1:30 am 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Бүлэг 10

Райлиг гэрийнхээ үүдэнд ирэхэд Габриэла түүнийг санаа зовсон царай төрхтэй угтлаа. Нилээд хүндхэн асуудал гарчээ гэдгийг Райлишууд ойлгов. Гватемал гаралтай энэ эмэгтэй түүний амьдралд тохиолдсон хүндхэн нөхцөл байдлыг хамт туулж өнгөрүүлсэн боловч тийм ч амархан сандарч тэвддэг нэгэн биш ажээ. Райли ХМТ-ны нисдэг тэргээр Квантико руу хүргүүлж, тэндээс гэртээ машинаар хурдан ирж чадсандаа дотроо баяртай байлаа.
- Эприл гэртээ байгаа юу? хэмээн Райли асуусанд Габриэла
- Sí (Тийм, орч). Тэр дээд давхарт өрөөндөө байгаа гэж хариуллаа.
- Тэр эмчтэйгээ уулзсан уу?
- Үгүй. Охин хаана байгааг мэдэхээр эмчийн ажлын газраас нэг хүн утасдсан гэж хариулаад Габриэла нүдээ том болгож
- Сенора Райли, Эприл надтай ярилцахыг хүсэхгүй байна. Юу нь болохгүй байгааг би ойлгосонгүй гэв.
Үүнийг сонссон Райли үнэхээр түгшиж эхэллээ. Эприл Габриэлад их сайн ханддаг, тэр Габриэлагаас хэзээ ч зайгаа барьдаггүй ажээ.
- Юу болоод байгааг би мэдье гэж хэлээд тэр Габриэлагийн мөрөн дээр зөөлөн товшоод шатаар өгслөө.
Райлиг дээд давхарт гарч ирэхэд Эприлийн өрөөнөөс хөгжим сонсогдов. Тэр хаалга тогшлоо. Өрөөн дотроос Эприл
- Орж болно хэмээн чанга орилов.
Райли өрөөнд орвол Эприл орон дээрээ гар утсаа барьчихсан сууж байлаа. Тэрбээр ээжийгээ хараад инээмсэглэв.
- Хөөх, ээж! хэмээн хөгжмийн дууг дарахаар чанга орилж хэлээд
- Таныг ийм хурдан ирнэ гэж бодсонгүй! Та ажлаа амжуулчихсан юм уу? гэлээ.
Өсвөр насныхны хэрэглэдэг ийм аргыг Райли сайн мэддэг ажээ. Эприл юу ч болоогүй мэт аяглах байлаа.
- Хөгжмийнхөө дууг намсга гэж Райли хэлэв.
Эприл хөгжмөө намсгасанд Райли охиныхоо орон дээр суулаа.
- Чамайг хичээлээсээ эрт явсан гэж Габриэла хэлсэн.
Эприл гайхсан царай гаргахыг оролдов.
- Хөөх. Та үүнээс болоод гэртээ ийм хурдан ирсэн юм уу? Хар даа, энэ чинь жирийн л нэг буруу ойлголт байсан. Би судалгаа хийх хэрэгтэй байсан учраас орон нутгийн номын сан руу очихоор сургуулиасаа эрт явсан. Эмчийн ажлын газар ойлголцоогүй учраас Габриэла руу залгасан. Би үүнийг түүнд тайлбарласан шүү дээ. Түүнийг ойлгосон гэж бодсон юмсан. Габриэлаг тань руу залгана гэж би огт бодоогүй юм байна. Тэр юугаа боддог байна аа, тээ?
Эприл худлаа ярьж байгааг Райли мэдэж байлаа. Гэхдээ шууд ил хэлээд хэрэггүй гэдгийг тэр өнгөрсөн туршлагаасаа мэддэг учраас нэг хэсэг дуугүй суув.
- Танд хэлэх зүйл алга уу? гэж Эприл асуулаа. Түүний хоолойноос өөрийгөө хамгаалах гэсэн өнгө аяс мэдрэгдэв.
Райли суугүй суусаар.
- Исүс минь, та надад итгэхгүй байгаа юм байна, тийм ээ? хэмээн Эприл ямар ч буруу зүйл хийгээгүй аятай хэлснээ
- Миний үгэнд итгэхгүй байгаа бол би яалтай ч билээ? Хэрэв надад итгэхгүй юм бол би юу хийх болж байна? гэлээ.
Энэ бол аль хэдийний танил болсон Эприлийн хэрэглэдэг арга барил. Гэхдээ Райли энэ удаа үүнийг зүгээр өнгөрөөхийг хүссэнгүй. Тэрбээр
- Эприл, би чамд итгэх ёстой юу? Чамд итгэж найдах ёстой гэж үү? Би ингэж чадах болов уу? гэж аяархан хэллээ.
Райлигийн үг өөрийгөө хамгаалж байсан бамбайнд цав гаргасан гэдэг нь Эприлийн царайнаас илт мэдэгдэв. Эприл орноосоо ухасxийн босож, үүд рүү очин хаалгаа дэлгээд
- Хэрвээ надад итгэхгүй байгаа бол бидэнд ярилцах шаардлага алга гэж хэллээ. Их уурласнаас охины хоолой чичирхийлж сонсогдоно.
- Эндээс гар. Намайг ганцааранг минь тайван орхиж үз, ойлгосон уу?
Райли үг хэлсэнгүй, бүр хөдөлсөн ч үгүй. Тэрбээр Эприлийг ширтэж суулаа. Хэрэгтнийг байцаах үед ашигладаг тактикаа хэрэглэж байгаагаа тэр анзаарав. Билл Деннис Воунд өшөө хорсолоо гаргахаар дайрахаас өмнө Райли түүнд энэ тактикыг ашигласан ажээ.
Түүнийг зүгээр яриулаад байх хэрэгтэй. Тэр тавьсан урхиндаа өөрөө бүдэрнэ гэж Райли дотроо бодож суулаа.
Райлид хүн амины хэргийн сэжигтэнд ашигласан арга барилаа охиндоо хэрэглэж байгаа нь эвгүй санагджээ. Гэвч энэ арга тус болно гэдгийг тэр сайн мэдэж байлаа.
Хаалганы дэргэд зогссоор байсан Эприл гэнэт нулимс асгаруулан орь дуу тавив.
- Намайг тайван байлгаад өгөөч! Гуйж байна!
Эприл уйлсаар байлаа. Тэр уурласнаас илүүтэй ичиж зовсондоо, буруутай гэдгээ мэдэрсэн учраас уйлж байгааг Райли мэдэрчээ. Райли орны гудсан дээр өөрийнхөө хажууд товшоод
- Наашаа ирээд суу хэмээн аяархан хэллээ.
Эприл ээж рүүгээ нулимстай нүдээрээ хэсэг ширтэж зогсов. Гэнэт тэр орон дээрээ орны пүрш овосxийн чичиртэл хүчтэй лагхийн суулаа. Райли охиндоо нусны алчуур өгөөд
- Эприл, би Делавер мужид хэрэг мөрдөөд завгүй байсан гэж Райли аль болох зөөлөн дуугарахыг хичээж хэлснээ
- Тэнд эмэгтэйчүүдийн амийг хороож байна. Чамайг хичээлээ тасалсан гэдгийг Габриэлагаас сонссон даруйдаа би гэртээ буцаж ирсэн. Би тэндээс нисдэг тэргээр ирлээ. Энэ бол би чиний төлөө хичнээн их санаа зовдгийг минь харуулж байгаа хэрэг гэв.
Мэгдэж цочирдсон Эприл улам их цурхирч уйллаа.
- Хэрэв чи надад үнэнээ хэлчихвэл эргээд бүх зүйл сайхан болно гэж Райли хэлэв. Тэрбээр энэ үг амнаас нь гарах үед өчнөөн олон сэжигтэнд яг ингэж хэлж байснаа саналаа. Тэр арай охиноо хүмүүжүүлэх арга барилыг өөрийн эрхэлдэг мөрдөж тагнадаг ажлаас суралцсан юм биш биз?
Эцэст нь Эприл ам нээлээ.
- Би хичээлээ тасалсан, ээж ээ. Намайг уучлаарай. Тэр үед юу бодож байснаа өөрөө ч мэдэхгүй байна. Надад их гунигтай байсан.
Райлигийн сэтгэл бага зэрэг уярлаа. Өөрөө ямар хүүхэд байснаа тэр санажээ. Тэр өөрөө өсвөр насны хүүхэд байхдаа заримдаа хичээлээ тасалчихдаг байжээ. Тэр үед Райли авга эгч, авга ах нартайгаа хамт амьдарч байсан бөгөөд түүний хэт дураараа загнадаг байдал нь тэднийг бараг галзууруулах шахдаг байжээ. Тэр төрсөн охиноо өөрөөс нь тэс өөр хүн болно гэж бодлоо гэж үү?
Үгүй. Би бол түүний ээж, энэ л хангалттай гэж Райли өөрийгөө ятгалаа.
- Чи Жовтой хамт байсан уу? хэмээн түүнийг асуусанд Эприл
- Тийм ээ, тийм л юм шиг байна гэж хариулав.
Райли шүүрс алдлаа. Охин нь үе насны хүүхдүүдийг дууриаж "Тийм ээ, тийм л юм шиг байна" хэмээн хэлэх нь түүнд огт зохимжгүй санагджээ. Бас Эприл өөрт нь муу үлгэр дууриал үзүүлдэг найзтай үерхэж байгаа нь түүнд огтхон ч таалагдсангүй. Гэхдээ Эприл энэ удаа жаахан ч гэлээ буруугаа хүлээж байлаа..
- Чи хаана байсан юм бэ?
- Худалдааны төв дээр.
Эприлийн хоолойд нэг хуурамч өнгө байхыг анзаарсан Райли энэ үнэн болов уу хэмээн өөрөөсөө асуув.
- Слоут эмчтэй ярилцах уулзалт чинь юу болсон бэ?
- Тэр юу гэж?
- Габриэла чамайг тийшээ очоогүй гэж хэлсэн.
Эприл нүдээ дарж, хоолойгоо заслаа.
- Намайг уучлаарай. Би уулзалтаа цуцлахын тулд утсаар урьдчилж мэдэгдэх хэрэгтэй байсан юм.
- Чамайг эмчтэй ярилцах уулзалтыг цуцлаасай гэж би хүсэхгүй байна.
Эприл толгой сэгсэрлээ.
- Ээж ээ, Слоут эмч гайхалтай сайн хүн, тэр надад их таалагддаг. Гэхдээ одоо надад түүний тусламж дахиад хэрэггүй. Би хүсэхгүй байна.
Райли охиныхоо гарыг зөөлөн алгадлаа.
- Тэр чамд хэзээ хэрэггүй болохыг би шийднэ. Энэ бас Слоут эмчийн мэдэх хэрэг. Дараагийн уулзалтанд очно гэдгээ одоо надад амла.
- Би амлаж байна.
- Бас Жовыг гэрт авчирч надтай танилцуулна гэж амла.\
- Амлаж байна.
Эприлийн өгсөн амлалтууд биелэх эсэхийг Райли мэдэхгүй байлаа. Гэхдээ одоогоор түүнд ингэсэн нь дээр гэж санагджээ. Райли орноос бослоо.
- Бас хэлэх хэдэн зүйл байна. Чамайг өөртэй нь ярилцахгүй байна гэж Габриэла хэлсэн. Чамайг дахиж битгий тэгээсэй гэж хүсэж байна. Бидэнд Габриэла байгаа нь үнэхээр сайн хэрэг. Тэр бидний амьдралыг хэвийн байлгахын тулд бүх зүйлээ зориулдаг. Түүнтэй эелдэг харьцаж бай.
- Ойлголоо хэмээн Эприл хариу хэлэв.
- Чи бас долоо хоногийн турш гэрийн хорионд байх болно.
Эприл арга нь барагдсан бололтой аман дотроо гиншлээ.
- Гэхдээ ээж ээ...
- Гэхдээ гэж байхгүй... Үүнийг өөрчлөх боломжгүй.
Эприлийг өөр арга бодож амжихаас өмнө Райли өрөөнөөс гарлаа. Тэр өөрийг нь хүлээж байгаа Габриэла руу очихоор доошоо буув.
- Сhicа (залуу авхай. орч) яаж байна? хэмээн Габриэлэ санаа тавьсан өнгөөр асуулаа.
- Тэр бүтэн долоо хоног гэрийн хорионд байна. Охиныг хичээлээс гадуур өөр хаашаа ч явуулж болохгүй шүү, гуйж байна.
Габриэла толгой дохиод
- Би оройн хоол бэлтгэе гэж хэлээд гал зуухны өрөө рүү явлаа.
Райли буйдан руугаа очиж суув. Габриэла энд байгаад тэр үнэхээр их талархаж байлаа. Райли маш их ядарснаа мэдэв.
Тэрбээр одоохондоо Эприлтэй ойлголцож чадсан гэж боджээ. Гэвч тэр хэргийн мөрдлөгийг гартаа оруулж чадаагүй гэдгээ мэдэж байлаа. Түүнийг байхгүй хооронд хэргийн зангилаа тайлагдаж ч магадгүй. Гэхдээ тэр яг одоо Эприлийг ийм хүнд байдалд орхиод буцаад явчихаж болох уу?
Райли сүүлд уулзах үед Блэйний хэлсэн үгийг саналаа.
"Надад итгэ, Карьерээ орхилоо гээд чи хүнд асуудлаа шийдэж чадахгүй"
Мэдээж түүний хэлсэн зөв байсан. Гэсэн ч энэ Райлигийн асуудлыг шийдэж чадахгүй. Тэр одоо яаж ч мэдэхээр байгаа Эприл болон өөр нэг хүний аминд хэзээ ч хүрч мэдэх алуурчин хоёрын дунд юу хийх ёстойгоо мэдэхгүй гацчихаад байлаа.
Райлид түүний дотоод ертөнц хоёр хуваагдчихсан юм шиг санагдаж байлаа.
-

_________________
Sakura


Top
   
PostPosted: Jan.29.19 5:49 am 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Бүлэг 11

Есөн сүүлт муур Миэрагийн нурууг хайр найргүй ороолгоно. Тэр дараагийн цохилт нэг бүрийг тэвчиж өнгөрүүлэхээр өрөөний буланд шигдэж суужээ. Цохилтууд ар араасаа ирсээр. Цаг болсныг зарлан бүх цагууд нэгэн зэрэг хангинасаар.
Өвдөлт тэсвэрлэхийн аргагүйбайлаа. Гэвч Миэрагийн хоолой хатаж хуурайшсан тул тэр орилж хашгирч чадсангүй. Зөвхөн сөөнгө хоолойгоор бөглүүхэн амьсгаадах чимээ гарна. Гэвч цагнуудаас гарах чимээ шуугиан дундаас тэр өөрийгөө сонсож чадсангүй. Орилж хашгирлаа гээд нэмэргүй. Миэрагаас гадна энд хоригдож байгаа хоёр охиныг орилж хашгирсан ч хэн ч сонсож чадахгүй юм чинь.
Чимээ шуугиан аажмаар намдаж нам гүм боллоо. Цаг зургаан цаг зааж байсныг Миэра мэдэж авчээ.
Ташуураар ороолгохоо ч болив. Тэгтэл өөрийг нь хулгайлж авчирсан хүн
- Намайг өршөөгөөрэй, би үүнийг илүү сайн хийхийн тулд хичээх болно гэж хэлэхийг сонслоо.
Миэра яг цагийг нь олж эргэж харжээ. Тэр эр өөрийгөө ташуураар ороолгож байлаа. Тэрбээр их өвдсөнөөс цурхиран уйлах зуураа
- Өршөөгөөрэй, би илүү сайн хийнэ, Би заавал... хэмээн давтан хэлэх ажээ.
Тэр дахиад ташуураа далайж мөрөө давуулан ар нуруугаа ороолгов. Тэр эр цаашаа харж зогссон тул Миэра түүний ар нуруу өөрийнхтэй нь адилхан хүнд шархдаж цус шүүрч гоожин, хуучин цамц нь энд тэндгүй цусан толбонд будагдсан байхыг харлаа.
Миэра энэ боломжийг ашиглан хорогдож байсан булангаас холдон хагас өлсгөлөнгийн байдалд байгаа хоёр охин руу очиж шахаж суулаа.
Хүн хулгайлагч өөрийгөө ороолгохыг Миэра өмнө нь харж байсан ч түүнийг ингэх бүрт маш их айж цочирддог ажээ. Өөрийгөө ингэж аймшигтайгаар шийтгэхэд хүргэдэг ямар гээчийн солиорол түүнийг эзэмдсэн юм бол?
Тэр амьсгаадаж хүч тамир нь барагдтал өөрийгөө ороолгохоо зогссонгүй. Эцэст нь тэр торноос гарч хаалгаа түгжээд ташуураа ширээн дээр тавилаа. Дараа нь тэр цагнуудад анхаарлаа хандуулав. Одоо тэр хоригдлуудаа ор тас мартаж зөвхөн цагнуудаа харж байлаа.
Тэрбээр бусдад дуулдахааргүй амандаа бувтнаж, муурны дүрстэй цагийн зүүг хөдөлгөв. Дараа нь халааснаасаа нэг түлхүүр гаргаж эрвээхэйн дүрстэй цагийг тааруулаад хүний гавлын ястай адилхан хэлбэртэй цаг руу харж хэсэг зогслоо.
Эцэст нь тэр хоригдлууд руугаа эргэж хараад бараг нөхөрсөг эелдэг гэж санагдам хоолойгоор
- Би уул нь үүнийг та нарт ойлгуулах хэрэгтэй байсан юм. Гэвч би энэ талаар ярьж болохгүй. Хэрэв би та нарт хэлвэл та нар үүнийг ойлгож бүгдийг зөвшөөрнө гэж хэллээ.
Тэр Миэрагийн нүд рүү эгцэлж харав.
- Энэ бол зүгээр нэг... энэ зүгээр нэг... энэ зүгээр...
Тэр дуугаа хурааж хэсэг зогссоноо яриагаа үргэлжлүүллээ.
- Одоо цаг нь болсон. Бидэнд бараг хугацаа үлдээгүй. Чамд, надад, хүн бүрт. дэлхий ертөнцөд. Өөрөөрөө тахил өргөх нь маш чухал утга агуулсан зүйл. Энэ бол хүмүүсийн төлөө хийж чадах ганц итгэл найдвар. Чи өөрөөрөө бахархах хэрэгтэй...
Гэнэт тэр нүүрэн дундуур нь ороолгочихов уу гэлтэй давхийн цочлоо. Тэрбээр ширээн дээр тавьсан ташуураа авч дахиад өөрийгөө ороолгов.
- Намайг өршөө. Би юу ч хэлэх хэрэггүй байсан юм.
Эцэст нь тэр есөн сүүлт муураа ширээн дээр буцааж тавиад энд орж ирсэн хаалгаараа гарлаа. Миэра түүний шатаар өгсөх чимээг тодхон сонсов.
Миэра буланд шахаж суусан охидыг хэдэн хором харж суулаа. Тэр урьд нь иймэрхүү галзуу амьтныг огт харж байсангүй. Заримдаа тэр өөртэйгөө биш, харин энд харагдаж сонсогддоггүй нэг хүнтэй ярьж байна уу гэлтэй хачин аашилдаг ажээ. Бас тэр саяхан Челсиг алж байхдаа хийж байгаа зүйлдээ анхаарлаа бараг хандуулахгүй байжээ.
Миэра одоо харин энэхүү араатан ямар шалтгаанаар ийм зүйл хийгээд байгааг мэдэх шаардлагагүй гэдгийг ойлгож авчээ. Тэр эр охины амийг хороосон шиг өөрийг нь бас ална, тэр гэр бүлээ дахиж хэзээ ч харж чадахгүй.
Тэр охин дүүгээ бодлоо. Дүү нь Миэраг энд ажиллаж хангалттай мөнгө цуглуулсны дараа араас нь ирэх төлөвлөгөөтэй байжээ. Катлин одоо түүний утсаар ярихыг хүлээж байгаа. Гэвч одоогийн байдлаар дүү нь түүнийг дахиж сонсож чадахааргүй болсон байлаа. Магадгүй түүнд юу тохиолдсоныг хэн ч мэдэж чадахгүй биз. Тэр зүгээр л гэнэт газрын ёроол руу шингээд орчихсон мэт үүрд алга болно.
Миэра энд хүргэгдэж ирсэн цагаасаа өнгөрч буй цаг хугацааг багцаалж мэдэхээр цагнуудыг анхааралтай ажиглаж байжээ. Тэр одоо энд бүтэн таван өдөр шөнө болсон гэж таамаглаж байлаа. Энэ хугацаанд тэр ганц зүсэм хүрэхтэй үгүйтэй талх, балга уснаас өөр юу ч идэж уугаагүй ажээ.
Миэра салганан чичирч суугаа охидыг ажиглаж харахаар тэднээс түр холдлоо. Тэд арьс нөмөргөсөн хэлхээ яс шиг араг яснаас өөрцгүй харагдах ажээ. Тэдний нүд бүр хонхойж ширгэжээ. Эд нар шиг болтол би энд хэр удаан хүлээх бол хэмээн тэр өөрөөсөө асуулаа.
Гэнэт тэр тэднийг хулгайлсан этгээд цаг арван хоёрыг заах үед нэг охины амийг хороосныг санаад дагжтал чичрэв. Түүний санаж байгаагаар хүний амь хороосноос хойш бүтэн нэг өдөр өнгөрчээ. Хүзүүг нь ганц мушгих л хангалттай байсан. Эрт орой хэзээ нэгэн цагт тэр өөрөө, бас бусад хоригдлууд ч гэсэн ийм зүйлтэй нүүр тулах нь ойлгомжтой байлаа. Тэд магадгүй хэтэрхий удаан хүлээсэн байж ч мэднэ.
Миэра хүч тамир нь барагдаж байгааг анзаарчээ. Тэрбээр доошоо тонгойж уйлж эхэлтэл эхэр татаж мэгшсэнээс болж хоолой нь хөндүүрлэж өвдөв.
Тэгтэл нэг нь сөөнгө хоолойгоор
- Уйлахаа боль хэмээн хэллээ.
Миэра толгойгоо өргөж харвал охидын нэг, Кимберли хэмээх охин түүнийг ширүүн харцаар цоргитол ширтэж байлаа.
- Нялх хүүхэд шиг гонгинохоо больж үз. Хүн уйлахаас би бүр залхаж гүйцлээ. Юу ч хийхгүй байхаас би залхаж байна. Бид эндээс зугтах хэрэгтэй.
Миэра мэл гайхаж цэл хөхрөв. Тэр Кимберлигийн хэлснийг ойлгож чадсангүй. Кимберли бараг хөдөлж чадахгүй болтлоо хамаг тамираа барж туйлдсан билээ. Бас Элиз хэмээх нөгөө охин бүр ч илүү тураалд орж, бараг ухаангүй шахам байдаг болсон.
- Гэхдээ яаж? хэмээн Миэра Кимберлигээс асуув.
- Бидний дундаас хүч тамираар илүү хүн нь чи гэж хэлэхдээ Кимберли хамаг хүч тэнхээгээ шавхаж байлаа.
- Чи тусламж авчрахын тулд зугтах чадалтай байгаа.
Тэр Миэраг цоо ширтлээ. Түүний нүдэнд урьд өмнө хэзээ ч харж байгаагүй их уур хилэнгийн гал дүрэлцэхийг Миэра олж харав.
- Чи биднийг бүгдээрэнг нь аварч чадна.

_________________
Sakura


Top
   
PostPosted: Jan.29.19 9:53 am 
Offline
• Moderator*
<b><font color=#0000FF>• Moderator*</font></b>
User avatar

Joined: May.31.04 3:59 pm
Posts: 1399
Location: тодорхой
seen.Thank you

_________________
Туйлын үнэн улам бүр...


Top
   
PostPosted: Jan.29.19 3:01 pm 
Offline
Гишvvн
User avatar

Joined: Aug.25.03 11:36 am
Posts: 6446
Баярлалаа :hoho:.

_________________
:f01:


Top
   
PostPosted: Jan.29.19 7:05 pm 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Урам өгсөн хүмүүстэй баярлалаа. Хурдан орчуулмаар санагдчихлаа. Ямартай ч өнөөдөр нэг бүлэг нэмж оруулна. Охидын нэгийг оргуулах санаатай байна. :brows: :brows:

_________________
Sakura


Top
   
PostPosted: Jan.29.19 11:34 pm 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Бүлэг 12

Миэра Кимберлигийн хэлсэн үгийг ойлгохыг оролдлоо. Энэ боломжтой гэж үү? Энэ тамын газраас гарах боломж байгаа гэж үү?
Миэраг энэ байранд авчрах үед энэ хоёр охин энд ирээд удсан байсан. Тэд хувь тавилантайгаа аль хэдийн эвлэрчихсэн юм шиг харагдаж байжээ. Бас Миэра хоригдож буй энэ торныхоо алга дарам газрыг ч үлдээлгүй сөөм сөөмөөр шалгасан. Ханануудыг цул бетоноор цутгаж, багануудын хооронд бат бөх гинжит тор татаж шал, таазанд эрэг боолтоор бэхэлжээ.
- Яаж? Энд хаалга, цонх байхгүй. Торон хаалтанд хүн багтах нүх байхгүй хэмээн Миэраг хэлсэнд Кимберли салганан чичрэх ясан хуруугаа гозойлгож тааз руу заалаа.
Миэра дээшээ харав. Тэдний толгойноос дээр гурван метрийн өндөрт, таазанд суулгасан агааржуулагч хоолойг Миэра нэг бус удаа харж байжээ. Хоолойг хаалтны цаанаас тусдаг бүдэг гэрэлд харах боломж бараг байхгүй. Заримдаа тэр хоолойгоор маш бүдэг гэрэл тусдаг ч цаана нь юу байгааг тэд харж чаддаггүй.
Гэхдээ хоолой хүн дамжаад гарчихаар том биш, тэр бүү хэл тураалд орсон энэ охид ч гэсэн гарч чадахгүй. Хоолойн хөндлөн огтлол найман сантиметр ч хүрэхгүй.
- Челсиг оргох гэж оролдсон гэж чи надад хэлж байсан гэж Миэраг хэлэхэд Кимберли
- Тэр оролдож үзсэн гэж надад ярьж байсан. Гэхдээ тэр олон зүйл хэлээгүй гэлээ.
- Челси үхчихсэн хэмээн Элиз сулхан шивнэв. Тэр ухаан орсон бололтой.
- Бяцxан Челси үхсэн.
- Хэрэв бид юу ч хийхгүй суугаад байвал бүгдээрээ үхнэ гэж Кимберли хэллээ.
Тэд хаана байгааг Миэра мэдэхгүй байжээ. Цонхгүй хана, бетон цутгаж хийсэн таазнаас харахад энэ зоорь байх магадлалтай. Тэгвэл толгой дээр тун ойрхон тэднийг тамлаж зовоодог эрийн амьдардаг бүхэл бүтэн байшин байж мэдэх юм. Хоолойгоор багтаж гарлаа гэхэд нөгөө эрийн гэрт эсвэл өөр нэг байшинд орох нь дамжиггүй. Хоолойгоор шургах үед гарах чимээ түүний анхаарлыг татах нь мэдээж.
- Энэ бол бидний сүүлчийн найдвар гэж Кимберли хэлээд
- Тэр дараагийн удаа энд эргэж ирэхдээ бидний нэгийг алж магадгүй гэлээ.
Элиз саналыг дэмжиж толгой дохихыг Миэра харах шиг болов уу? Тийм гэж хэлэхэд хэцүү. Нүүрэн дээрээ ташуураар ороолгуулсан олон тооны сорвитой хөөрхий охин бараг амьд гэж харагдахгүй байлаа.
Миэра aгааржуулагч хоолой руу харав.
- Бид тэнд хүрч чадах уу? гэж тэр асуугаад
- Бид бүгдээрээ хүч тамиргүй болсон гэлээ. Тэгтэл Кимберли тас зөрж
- Элиз бид хоёр сульдаж бүх тамираа барсан. Чамд одоо ч гэсэн хүч тамир үлдсэн. Чи үүнийг хийх ёстой. Хоолойгоор гар. Тэгээд тусламж авчирч биднийг эндээс гарга гэж хэлэв.
Миэра дэмий найдлага тавихаасаа ч айж байлаа. Гэтэл одоо хоёр хоригдол охины амь насыг даах аймшигтай үүрэг хариуцлагыг өөртөө үүрэх хэрэгтэй болсон юм шиг түүнд санагдав. Энэ даалгаврыг бодоход ч аймшигтай ажээ.
Гэвч Миэра Кимберлигийн үгнээс зөрж чадсангүй. Хүч тамираа алдсан ч гэлээ эндээс оргож чадах ганц боломжийг алдаж болно гэж үү? Бас тэр дээр түүнийг ямар аюул хүлээж байгааг тэр мэдэхгүй. Магадгүй энд амсаж байгаа өлсгөлөн, зодуураас ч илүү аймшигтай зүйл хүлээж болов уу?
Миэра эргэн тойрноо гүйлгэж харав. Тэрбээр таазанд хүрэхийн тулд зөвхөн хаалтны гинжээр дамжиж гарах ганцxан арга байгааг олж харлаа. Төсөөлөх ч бэрх хэдий ч тэр бүх хүч тамираа нөөж хуримтлуулахыг хичээв. Дараа нь тэр гинжнээс хуруугаараа зуурж, хэдийгээр их өвдөж байсан ч дээшээ алгуурхан авирч эхэллээ. Кимберли өөрт нь туслахаар доороос нь гараараа сулхан түлхэхийг тэр мэдэрлээ. Миэра шалнаас хөндийрч, хоёр хөлөө гинжин хаалтны завсар ээлжлэн шургуулж дээшээ авирахад Кимберлигийн сульдсан хоёр гар хөлийг нь тулж өргөнө.
Эцэст нь Миэра хаалтны оройд хүрч чадлаа. Хоёр тохой хэрийн зайд харагдах төмөр хавтанд бэхэлсэн агааржуулагч хоолойг бетонон таазанд боолтоор бөхөлж тогтоожээ. Тэр боолтнуудыг яаж тайлах болж байна?
Миэра нэг гараараа гинжнээс бөх зуурч, нөгөө гараа сунган хурууныхаа үзүүрийг төмөр хавтан, тааз хоёрын завсраар шургуулав. Тэр хавтанг доош нь хүчтэй дартал бага зэрэг хөдлөх шиг санагдлаа. Агааржуулагч хоолойг салгаж авах нь боломжгүй санагдаж байсан ч Миэра оролдоод үзэхээр шийджээ.
Тэр хавтангаас дахин зуурч бүх хүчээрээ дартал бетон хавтан хоёр хөндийрч дунд нь бага зэрэг завсар гарлаа.
Гомдол цөхрөлдөө дотор нь бачуурч байсан тэрбээр гинжин хаалтнаас хөндийрч, төмөр хавтангаас хоёр гараараа зуурав. Миэра доошоо унах үед таазнаас ямар нэг зүйл салж унасан бололтой, хангир жингэр хийсэн аймшигтай чанга чимээ гарлаа. Тэрбээр эхлээд Кимберлиг мөргөж дараа нь шалан дээр унаж буйгаа мэдрэв. Шалан дээр, эргэн тойронд нь төмөр, бетоны хэлтэрхийнүүд, шавар шавхай, хайрга чулуунууд бороо шиг асгарч уналаа.
Чимээ шуугиан намдаж нам гүм болсны дараа Кимберли ёолж гиншихийг тэр сонсов. Миэра гараа дарж унаснаас гар нь ухаан баларттал хүчтэй өвдөж байлаа. Хумснууд нь бараг бүгд хугарчээ. Гэвч тэр дэргэд нь унасан зүйлсийг харахтайгаа байлаа. Шалан дээр хэвтэх эвдэрхий яндан дуран шиг хэлбэртэй агааржуулагч хоолойны хугархайн эргэн тойронд төмрийн сэг, бетоны хэлтэрхийнүүд, чулуу, шавар шороо, зэрлэг ургамлууд овоорчээ.
- Энэ юу гээчийн газар...? Миэра үгээ гүйцээж чадсангүй.
Унасан хогонд дарагдан хэвтэж буй Кимберли гараа өргөж дээшээ заалаа. Түүнээс холгүйхэн сууж байсан Элиз бас дээшээ харжээ. Миэра бас дээшээ хараад харсан зүйлдээ итгэж чадсангүй.
Тэд дөрвөлжин нүхээр орог саарал өнгөтэй тэнгэрийг харж байлаа. Агааржуулагч хоолой ямар нэг байшин барилгатай холбоогүй байсныг тэд одоо ойлгов. Хоолой шууд гадагшаа гарсан байжээ. Миэра өдий болтол өөрийгөө байшингийн зооринд хоригдож байгаа хэмээн буруу ташаа бодож байсан. Харин энэ газар доогуур барьсан хорогдох байртай төстэй харагдаж байлаа. Бас гадаа өглөө эрт үүр цайж байгаа бололтой.
- Чи эндээс гарч чадна! Хурдан яв! хэмээн Кимберлиг хэлэхэд
- Чи гэмтчихсэн үү? гэж Миэра түүнээс асуулаа. Кимберли
- Нэг их биш хэмээн хариулаад
- Чи босож чадах нь уу? гэж асуув.
Миэра аажмаар өндийж бослоо. Тиймээ, тэр зогсож чадлаа, тэгвэл бас алхаж чадна гэсэн үг. Миэрагийн дотор анх удаа л найдлага төрөв.
Тэр дахиж хүчээ хуримтлуулан хаалтнаас зуурч дээшээ авирлаа. Тэрбээр зүүн гараараа хаалтнаас зуурч, баруун гараа онгорхой нүхээр гаргаж өвс ургамал, шавар шавхайг тэмтэрч үзэв. Хуруунд нь ургамлын үндэс мэдрэгдэхэд Миэра үндэснээс чанга бариад нөгөө гараа бас дээш нь гаргаж үндэснээс зуурлаа. Тэр өөрөөс нь гарна гэж төсөөлж ч байгаагүй их хүч гарган биеэ дээш нь татав. Миэра нүхнээс гарч, өглөөний чийглэг агаарт гарч иржээ.
Миэра өтгөн төгөл ойгоор хүрээлэгдсэн жижигхэн талбай дээр байгаагаа анзаарав. Гэвч тэр хаана, ямар газар байгаагаа мэдэж чадсангүй.
Миэра нүхээр шагайвал Кимберли итгэл найдвар гэрэлтсэн харцаар түүнийг харж байлаа. Элиз сая юу болоод өнгөрснийг ойлгосон шинжгүй харагдана.
Миэра нүхээр тонгойж
- Дээшээ гараад ир гэж хэлсэнд Кимберли
- Би авирч чадахгүй хэмээн хариулав,
- Би чамд туслана.
Кимберли одоо түүнийг арга нь барагдсан харцаар харах ажээ.
- Чи намайг дээш нь татаж гаргаж чадахгүй. Элизийг ч гэсэн. Дараа нь Кимберли гэмтсэн гараа илээд
- Би хаалтаар дээшээ авирч чадахгүй гэв.
Миэрагийн зүрх хурдан цохиллоо.
- Би та нарыг энд зүгээр орхиод явж чадахгүй.
- Чи ингэх ёстой. Явж тусламж авчир. Цагдаад очиж хэл. Тэд биднийг аварч чадна. Үүнийг хурдан хий.
Хамт хоригдож байсан хоёр охиноо орхиж явах болсон нь Миэрад үнэхээр аймшигтай санагдаж байлаа. Гэвч түүнд өөр сонголт байсангүй. Тэрбээр хөл дээрээ бостол хэт сульдсанаас дороо муужирч унах шахав. Миэра эргэн тойрноо ажиглаж харлаа. Талбайн нэг талд ойн төглийг нэвт гарсан зөрөг зам харагдана. Миэра замын төгсгөлд гэрэл нь асаалттай байшингуудыг олж харав.
Гэнэт тэр зүгээс хаалга чанга хаагдах чимээ гарахыг сонсоод Миэра дороо бүдчин зогслоо.
Энэ тэр хүн мөн үү? Тэр энд ирж байгаа юм болов уу?
Миэра зөрөг рүү харлаа. Тэр магадгүй энэ замаар нааш цааш ирж очдог биз. Хэрэв Миэра одоо энэ замаар явбал тэр нөхөрийн гарт дахиад орчихож мэднэ.
Миэра талбайн эсрэг тал руу эргэлээ. Тэнд цөөхөн хэрэглэгддэг бололтой бүдгэрч баларсан нэг зөрөг мод руу орсон байжээ. Миэра тэр зүгт байшин, эсвэл өөр ямар нэг нүдэнд торчихмоор зүйл харсангүй. Гэхдээ энэ зөрөг түүнийг хаа нэгтээ хүргэж таарна. Энэ түүнийг хүмүүс рүү хөтөлж аваачна.
Миэра тэр зөргөөр орон бүдчин явлаа. Бүсгүй маш их тамирдаж, хөлөө алхам алхмаар зөөх бүрт толгой нь эргэж унах шахна. Тэрбээр хөл дээрээ хэр удаан тэсэж чадахаа мэдэхгүй, орон зай, цаг хугацааг ч мэдрэхээ больж байх шиг. Нүд нь бүрэлзэж эргэн тойрноо сайн харж чадахгүй болжээ. Зэрлэг ургамал, модны мөчрүүд түүний биеийг ороолгож, гэзэг үс, хувцаснаас ч зулгааж зууралдах ажээ.
Тэгтэл өтгөн ой мод дуусаж тэр задгай талбайд гарч ирснээ мэдрээд дотор нь онгойв.
Би хаана байна аа? хэмээн тэр өөрөөсөө асуулаа.
Миэра урагшаа зүтгэж алхтал хөл дор нь хатуу хучилттай зам мэдрэгдэв. Тэр хурдны замын дэргэд хүрч иржээ. Миэра замын эхлэл төгсгөл рүү харсан боловч нэг ч машин харагдсангүй. Тэр аль зүг рүү явахаа мэдэхгүй байлаа. Эцэст нь нэг зүгийг сонгож бүдчин алхав.
Миэрагийн толгой нь улам бүр эргэж, нүд нь харанхуйлан хөл дээрээ тогтоход ч бэрх боллоо. Тэр цаашаа явах тэнхэлгүй болжээ.
Битгий бууж өг! Бууж өгч болохгүй! хэмээн тэр өөртөө хэллээ.

_________________
Sakura


Top
   
PostPosted: Jan.30.19 12:45 am 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Tight as a drum - Энүүнтэй харьцуулж болох монгол зүйрлэл мэдэх хүн байна уу? Үгчилж орчуулахад утга нь алдагдаад байна.

_________________
Sakura


Top
   
PostPosted: Jan.30.19 6:49 am 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Бүлэг 13

Маажуур доошоо цөмөрч унасан таазны нүхээр тусаж буй өглөөний гэрэл рүү таг гөлөрч зогсоно. Нүх гадна талаас жижигхэн харагдаж байсан боловч тэр одоо харж байгаа зүйлдээ итгэж чадсангүй. Торон дотор хаа сайгүй хог новш тарсаныг тэр харж байлаа. Хамгийн сүүлд авчирсан Ирланд бүсгүй алга болж, үлдсэн хоёр охин хоорондоо наалдаж суугаад түүнийг айж ширвээтсэн харцаар ширтэнэ.
Өвөө нь аймаар уурлажээ.
- Энэ удаа ямар хэрэг тарьснаа чи харж байна уу? Чи яаж ийм болоход хүргэж чаддаг байна аа?
- Үүнийг засварлах ёстой гэж би мэдээгүй хэмээн Маажуур тайлбарлахыг оролдов.
- Чамайг чөтгөр аваасай. Чиний юу хийхийг би бүгдийг нь хэлж өгөх ёстой болж байна уу?
Маажуур таазанд гарсан нүхнээс харцаа салгаж чадсангүй. Толгой дотор нь өвөө нь үглэсээр байх ажээ.
- Чи одоохон ажлаа эхлэх хэрэгтэй. Энэ газрыг хуучин хэвэнд нь оруул. Бүгдийг нягт нямбай хийх ёстой. Яаж хийхийг би чамд хэлж өгнө.
- Би үүнийг засна.
- Ашгүй дээ. Эхлээд энэ нурсан хэсгийг зайлуул. Дараа нь машины гараажид нилээп их цемент зуур. Миний юу хэлж байгааг чи ойлгож байна уу?
- Ойлгож байна.
- Би чамайг сонсохгүй байна.
- Би ойлгосон гэж хэлсэн! Маажуур одоо өвөөдөө уурлаж байлаа. Тэр эвдрэлээс үүссэн хогнуудыг цуглуулахаар овоолж эхлэв.
- Чи юу хийнэ гэж бодсон юм бэ? хэмээн өвөө нь хэллээ.
Маажуур ажлаа зогсоож мөрөө унжуулж зогсоод
- Тэгээд би юу хийх ёстой юм бэ? гэж царайчилсан өнгөөр асуув.
- Эхлээд охиныг эрж ол. Охиныг өөр хүн харахаас өмнө, түүнийг хэн нэгэнд чалчихаас урьдаж олж авчир.
Яг тэр мөчид цагнууд нэгэн зэрэг дуугаа авалцан долоон цаг болж буйг зарлав. Тэр агшинд Маажуур есөн сүүлт муураа шүүрч аван торон хаалт руу буцаж орлоо. Тэр хорионд байгаа хоёр охиныг сүрдүүлж заналхийлэхээр дэргэд нь ирж зогсов.
- Тэр хаана байна? Тэр хаашаа явсан бэ?
Хоёр охины нэг бараг ухаангүй шахам байлаа. Харин нөгөө охин нь түүнийг шоолж хөхрөх гэсэн боловч хэт тамирдаж доройтсоноос чанга дуугарч чадсангүй.
Цагнуудаас гарах дуу чимээ аажмаар намдаж эхлэв.
- Би та нарт асуулт тавьж байна! хэмээн тэр хашгираад охидыг ташуураараа хайр найргүй ороолгов. Гэтэл хоёр охины арай илүү хүчтэй байгаа нэг нь түүний өөдөөс ширүүн харж
- Тэр цагдаа дуудахаар явсан гэж хэллээ.
Маажуур нөгөө охины толгойн үснээс зууран ширгэсэн нүд рүү нь цоо ширтэж.
- Юу гэнэ ээ? хэмээн хашгирлаа.
- Цагдаа! Тэд ирж байгаа! Чи одоо өнгөрсөн, муу сэтгэцийн өвчтэй өөдгүй новш оо!
Маажуур ташуураараа охиныг дахиж ороолголоо. Тэрбээр торноос гэнэт ухасxийж гаран хаалтны хаалгыг сайн түгжив. Гэнэт тэр таазанд нүх гарсныг саналаа.
- Гэхдээ бусад охид...
- Тэднийг одоохондоо зүгээр орхи. Тэд тамир тэнхээгээ барчихсан болохоор тэндээс гарч чадахгүй. Тэр ч бүү хэл тэдэнд уйлж орилох тэнхээ ч үлдээгүй. Одоо харин ажилдаа ор!
Маажуур шатаар дээшээ өгсөх хорогдох байрны дээр байдаг талбай дээр гарч ирлээ. Тэр нүхний ирмэгээс зөрөг рүү явсан хөлийн мөрийг амархан олж харав.
- Тэр энэ замаар явсан байна хэмээн өвөөдөө хандаж хэлэхдээ зөрөг рүү заалаа.
Маажуур бүдгэрсэн зөргөөр орж явбал замд нь мөчрүүд тээглэж урагшлахад нь саад болно. Хэдэн метр явсны дараа зөрөг зам түүнийг хурдны замын дэргэд аваачлаа. Маажуур өөдөө сөөргөө сайн харсан боловч ганц ч машин харагдсангүй. Тэр бас охины барааг ч олж харсангүй.
- Тэр аль зүг рүү явсныг би мэдэхгүй байна гэж тэр хэллээ.
Өвөө нь түүнд хариу хэлсэнгүй. Тэр Маажууртай зөвхөн гэртээ, гэрийнхээ ойр хавьд ярилцдаг ажээ.
Маажуурын айдас улам бүр нэмэгдсэнээс нэвт хөлөрчээ.
Тэр машинаа авахаар гэр лүүгээ хурдан гүйлээ.Өвөөгийн зөв байжээ. Зугтсан охиныг заавал олж авчрах ёстой.
Тэр охиныг барьж авдаг л юм бол шууд амийг нь хороохоор шийджээ.

_________________
Sakura


Top
   
PostPosted: Jan.30.19 10:00 pm 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Бүлэг 14

Райли цайнаас балгаад цаг руугаа харлаа. Өглөөний ес гуч болчихжээ.
Би уул нь Делавер муж руу очихоор замд явж байх ёстой юмсан хэмээн бодоод тэр дотроо их түгшив.
Үүний оронд тэр харин Вашингтонд Майк Нэвинсийн конторт сууж байлаа. Майк бол ХМТ-д байнга зөвлөлгөө өгдөг шүүх эмнэлгийн сэтгэл судлаач ажээ. Түүний таньдаг болоод Райли нилээд удаж байгаа билээ.
Өнгөрсөн жилүүдэд Майк түүнд зөвхөн хүн амины хэрэг ч бус маш олон зүйл дээр тус болсон. Райлиг Петерсоны торонд хоригдож тамлуулсны дараа ГДСX (гэмтлийн дараахь сэтгэцийн хямрал) -аар шаналж байхад Майк түүнийг эмчилжээ.
Билл түүнийг нь өнөө өглөө очно гэж хүлээгээгүй биз хэмээн Райли дотроо найдаж суулаа. Өчигдөр орой түүнийг мэдээлэл сонсохоор Билл рүү утасдахад одоогоор хэргийн мөрдөлтөнд шинээр илэрсэн зүйл алга гэж хэлжээ. Тэр хоёр уул нь эдгээр аллагын дунд ямар нэг өөрчлөлт гарна гэдэгт санал нэг байсан ажээ.
Энэ хооронд Райлигийн хувийн амьдралд санааг нь зовоосон зүйл гарсан учир өчигдөр орой тэр Майктай холбоо барьтал түүнийг өнөө өглөө биечлэн ирж уулзвал сайн байна гэж хэлжээ. Эприлийг өнөө өглөө сургуульд нь хүргэж өгөхөд охин урьдынх шигээ сайн харагдаж байсан. Бас Райлиг Делавер муж руу шууд явна гэдгийг Габриэла мэдэж байгаа.
- Чамайг зовоож саад болж байгаад намайг уучлаарай гэж тэр хэлээд
- Эрхэлдэг ажлаас чинь гадуур хувийн асуудал гэж би хэлэх гэсэн юм гэлээ. Сандлынхаа түшлэгийг налж суусан Майк хариу инээмсэглэв.
- Зүгээр дээ. Энэ чинь харин миний ажлынхаа туршлагыг өргөжүүлэхэд маань их тус нэмэр болдог.
Майк бол их үнэтэй авсан цамцан дээрээ ноосон цамц байнга өмсдөг дэгжин хээнцэр, сайхан сэтгэлтэй, шавилхан биетэй намхан эр. Райли түүнийг хамгийн сайн найзаа хэмээн үзэж үнэхээр их хайрладаг ажээ.
- Би уул нь энд байх ёсгүй. Надад Делавер мужид барих нэг алуурчин байгаа. Гэвч би тийшээ шууд явахаас айгаад байна. Эприлийг буруу алхам хийхэд бэлэн байгаа гэж бодогдоод болдоггүй.
- Би ойлгож байна. Урьд нь түүнд юу тохиолдсоныг би сайн санаж байна.
Эприлийг хамгийн сүүлд хэт айснаас ухаан мэдрэлгүй шахам болоход Майк тусалсныг Райли мэдэж байлаа. Эприл сургуулийнхаа амралтаар долоон хоногийн хугацаатай Вашингтон руу аялалд явжээ. Тэр үед Эприл гэнэт ГДСX-ын дайрлагад өртжээ. Райли тэр үед Аризона мужид байсан бөгөөд салсан нөхөр нь охин руугаа очихоос татгалзсан ажээ. Охиндоо туслахаар буцаж явсныхаа төлөө Райли ажлаасаа бараг халагдах шахаж билээ. Одоо арай дахиад ийм зүйл тохиолдох юм биш байгаа?
- Слоут эмч түүнд тусалж чадаагүй юм уу? гэж Майк асуулаа.
Майк Эприлийг доктор Лесли Слоут хэмээх сайхан сэтгэлтэй эмч рүү явуулж байжээ. Эмч ээж охин хоёрт их таалагдаж байсан.
- Тэр тус болж байгаа гэж би бодож байна. Гэвч Эприл өчигдөр хичээлээ тасалсан, бас эмчтэйгээ уулзаж ярилцахаар очоогүй.
Майк эрүүгээ имрэн бодлогоширч суулаа.
- Арван таван нас гэдэг чинь жирийн үед ч гэсэн их хэцүү, шилжилтийн нас шүү дээ. Гэтэл охины нөхцөл байдал жирийн байгаагүй. Түүний насан дээр сэтгэцийн өвчтэй амьтанд баригдаж торонд хоригдсон охид тийм ч олон байхгүй л болов уу. Бас дээр нь жижигхэн мэт боловч сэтгэлийг нь тогтворгүй болгож байгаа өөр олон асуудлууд ч байна, жишээлбэл гэр бүл салалт.
Санаа нь улам их зовж эхэлсэн Райли шүүрс алдлаа.
- Би сэтгэцийн өвчтэй алуурчны бодол санаанд нэвтэрч чаддаг. Гэтэл төрсөн охин маань улам бүр нууцлаг болоод байх юм.
Майк дахиад инээмсэглэв.
- Ингэхэд байна аа, өсвөр насныхны бодол санаа тэр сэтгэцийн өвчтэй нөхдийнхтэй бараг адилхан их нууцлаг байдаг юм шүү дээ. Тэд нар шилжилтийн насан дээр байгаа гэдгээ өөрсдөө сайн ойлгож ухаарахгүй байгаа. Тэд бол бие хаа нь насанд хүрчихсэн мөртлөө тархи нь гүйцэд хөгжөөгүй хүүхдээрээ байгаа нөхөд.
- Энэ үг чинь намайг тайвшруулж чадахгүй л юм байна гэж Райлиг хэлэхэд Майк
- Чамд уул нь сайн юм дуулгахыг хүссэн юмсан хэмээлээ.
Тэр хоёр нэг хэсэг дуугүй суув.
- Яг юунд чиний санаа зовоод байгаа юм бэ? гэж Майкыг асуухад Райли
- Түүний нэг зүйлд гаргаж байгаа шийдвэр. Эприл саяхнаас шинэ найз хөвгүүнтэй болсон. Гэтэл би тэр хүүгийн талаар юу ч мэдэхгүй. Намайг тэр хүүтэй уулзуул гэтэл Эприл одоо хүртэл цааргалаад байна гэв.
Майк суудал дээрээ өндөлзөж урагшилж суун түгшсэн харцаар Райлиг ширтлээ.
- Чамд одоо үнэхээр том асуудал тулгарсан гэж би айж байна.
- Энэ юу юм бэ?
- Чамайг өөрөө мэдэж байгаа гэж би бодож байна.
Райлигийн хоолой бачуураад ирлээ. Тэр үүнийг мэдэж байжээ. Гэхдээ тэр үүнийг үгээр илэрхийлж хэлж чадахгүй байлаа. Hэрэв тэр энэ талаар бодолгүйгээр энд ирсэн бол тэдний уулзалт ямар ч үр дүнгүй болох байжээ. Үүнийг Майк, Райли хоёр сайн мэдэж байлаа.
- Би юу хийхээ мэдэхээ байлаа, Майк. Би дутагдал ихтэй, ямар ч тус нэмэргүй нэгэн болчихоод байна. Хийсэн бүх зүйл маань буруудаад байна гэсэн бодол надад төрөх боллоо. Би үүнийг хийж чадахгүй нь. Би нэгэн зэрэг эх хүн, ХМТ-ны ажилтан байж чадахгүй байна. Энэ хоёр хоорондоо харшлаад байна. Надад хоёуланд нь зориулах хангалттай цаг алга. Энэ бүхэн надад тохирохгүй бололтой.
Mайк толгой дохиж сууснаа
- Хар даа, одоо л бид гол асуудалдаа орлоо. Ингэхэд чи өөрийгөө буруу зүйл хийгээд байна гэж боддог юм байна. Энэ бол чи өөр зүйлийг илүү сайн хийж чадна гэдгийг илэрхийлж байгаа хэрэг. Тэгэхээр энэ юу байж болох вэ? гэж асуулаа.
Райли хариулж чадсангүй. Майкын тавьсан асуултанд тэр маш их тэвджээ.
- Би хариулт сонссонгүй хэмээн Майк тайван хэлээд
- Гэхдээ би чамд ингэх шалтгаан байгаа гэж таамаглаж байна. Чамд илүү сайн хийж чадах өөр зүйл байхгүй. Ингэхэд чамд өөр сонголт байгаа юм уу? Чи ажлаасаа гарч, мөрдөгчийн тэмдгээ хураалгах уу? Чи ингэж чадна гэж бодож үзсэн үү? гэж асуулаа.
Райли яг энэ сэдвээр Блэйнтэй ярилцаж байснаа санаад өөрийн эрхгүй инээмсэглэв.
- Чи одоо манай хөрш залуутай их адилхан ярьж байна.
- Юу?
- Түүнийг Блэйн гэдэг юм. Тэр их сайн залуу, бас эцэг хүн. Охин нь манай Эприлийн найз.
Майк одоо их хөгжилтэй инээмсэглэж байлаа.
- Тэр ганц бие үү?
Райлигийн царай улайчихав.
- Чи яаж мэдсэн юм бэ?
- Иймэрхүү зүйлийг би таахдаа их сайн. Тэгэхээр бид одоо Блэйн гэгч тэр сайхан сэтгэлтэй залуугийн талаар ярилцах хэрэгтэй юм шиг байна. Чи түүнтэй харилцаад хэр хол явсан юм бэ?
Райли бага зэрэг бухимдаж эхэллээ.
- Хол явах гэсэн үү? Чи тоглож байгаа биз дээ? Энд чинь хол яваад байхаар юм юу ч болоогүй.
- Яагаад болохгүй гэж? Тэр чамайг сонирхдоггүй гэж чамд санагдсан юм уу?
Нүүр нь улам бүр халуу оргихыг Райли мэдэрлээ.
- Тэр намайг сонирхдог гэж би бодож байна.
- Бас тэр чамд таалагддаг. Энд чинь юун асуудал байгаа юм бэ?
Райли дотроо эргэлзэж байлаа.
- Энэ асуудал биш гэж үү? Тэр ресторан эрхэлж ажиллуулдаг, харин би алуурчдын араас хөөцөлдөж явдаг. Тэр миний туулсан амьдралын зөвхөн тал хувийг мэдээд шууд үхтлээ айж цочирдох биз. Жишээлбэл, охин маань эцгийнхээ гэрээс хулгайлагдсан. Ийм зүйл миний хөрш зэргэлдээ амьдардаг түүний гэрт бас тохиолдож мэднэ гэдгээс түүнийг айлаа гээд буруутгаж болохгүй биз дээ? Тэр бараг өөр тийшээ нүүх байлгүй.
- Чи үнэхээр ингэнэ гэж бодож байна уу?
Райли хариулсангүй. Тэр Блэйнтэй ажлынхаа талаар ярилцахаас зайлсxийдэг байжээ. Одоо харин үүнийг өөрчлөх цаг нь болсон бололтой.
- Энэ бидний ярилцах сэдэв биш биз дээ? Бид уул нь Эприлийн тухай ярилцаж байсан юмсан гэж түүнийг хэлсэнд Майк
- Бид харин Эприлийн талаар л ярилцаад байх шиг байна гэлээ.
- Чамд таалагдсан нэг сайн залуу Эприл та хоёрын амьдралд ороод ирвэл охины чинь асуудал улам төвөгтэй болно гэж чи боддог уу? Охин чинь хэдийгээр эцгийгээ үзэн ядаж байна гэж хэлсэн ч тэр одоо бүрэн тайвширсан байлгүй.
Райли дахиад чимээгүй боллоо. Майк түүнд дахиад тунгааж бодох хэрэгтэй олон зүйлийн талаар хэлжээ.
Тэр мөчид Райлигийн гар утсанд дуудлага ирэв. Тэр гар утсаа харвал Билл залгаж байлаа.
- Би энэ дуудлагыг авах хэрэгтэй гэж түүнийг хэлсэнд Майк толгой дохиж харагдав.
Райли дуудлаганд хариу өгөхөөр хонгил руу гарлаа.
- Юу болсон бэ?
- Миэра Кэганыг дөнгөж сая оллоо. Тэр хоригдож байсан газраасаа зугтсан байна.
Райлигийн зүрх хурдан цохиллоо.
- Тэгээд? Гэхдээ дуу чинь яагаад ийм ууртай сонсогдоод байгаа юм бэ?
Утасны цаанаас хариу өгөхгүй хэсэг удав. Эцэст нь Билл ярьж эхэллээ.
- Тэр машинд мөргүүлчихжээ.

_________________
Sakura


Top
   
PostPosted: Jan.31.19 3:07 am 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Бүлэг 15

Райли Олманы эмнэлэгт хүрч ирэнгүүтээ хурдан дотогшоо орлоо. Билл энд аль хэдийн ирчихсэн хүлээлгийн өрөөнд нааш цааш холхиж харагдана.
- Тэр амьд биз дээ? Тэр ухаан орсон уу? гэж Райли асуулаа.
- Тэднээс миний мэдэж чадсан зүйл ердөө л энэ. Намайг дотогшоо орж түүнтэй ярилцахыг тэд зөвшөөрөхгүй байна.
- Тэд бүсгүйг яаж олсон юм бэ? хэмээн Райлиг асуухад Билл толгойгоо сэгсрэв. Тэр болсон явдалд одоо ч итгэж чадахгүй байгаа бололтой.
- Энэ үнэхээр хачин байна. Нэг хүн түүнийг сая чиний орж ирсэн хаалганы гадна орхисон байсан. Гэхдээ түүнийг энд авчирсан хүн шууд яваад өгсөн гэнэ.
- Чи тэр хүнийг эмэгтэйг машинаар мөргөсөн хүн гэж бодож байна уу?
- Тэгсэн гэж сэжиглэж байгаа. Люси Варгас одоо хяналтын камерын бичлэгийг шалгаж байгаа. Бид үүнийг удахгүй мэдэж авна. Алив хурдал, хоёулаа хохирогчтой уулзаж чадах эсэхээ асууж мэдье.
Билл Райлиг дагуулан урт хонгилоор явсаар үүдэнд нь хоёр цагдаа зогсож буй өрөөнд хүрч очлоо. Тэр хоёр цагаан халаат өмссөн ширүүн төрхтэй эмэгтэйтэй уулзав. Нэрийн картан дээр нь доктор Леа Пресслер гэж бичжээ.
- Бид хохирогч эмэгтэйтэй ярилцаж болох уу? хэмээн Биллийг асуусанд
- Энэ хэрэв миний мэдэх асуудал байсан бол би үгүй гэж хэлэх байсан гэж Пресслер эмч хариулаад
- Тэр маш их туйлдаж ядарсан, бас сэтгэл санаа нь тогтворгүй байгаа боловч та нартай уулзмаар байна гэсэн. Тэр бүр зөрүүдлээд байсан шүү гэв.
Пресслер эмч Билл, Райли хоёрыг өрөөнд дагуулж орлоо. Миэра Кэган тэднийг ширгэж хонхойсон нүдээр харав. Турж эцсэн бүсгүйн арьс цонхийж цайснаас тэр хиймэл үс зүүж, нүүрээ будчихсан юм уу гэлтэй гал улаан үс, нүүрний сэвх нь их этгээд сонин харагдана.
Эмэгтэйн нэг хөлийг гипсдэж, алдсан биеийн шингэнийг тэнцвэржүүлэхээр дусал тариа залгасан ажээ. Тэр яг тамаас гарч ирсэн юм шиг харагдаж байлаа. Гэвч тэр амьд үлдэж чаджээ. Хэдийгээр тэр маш туранхай, өлссөн харагдаж байгаа ч үхсэн гурван хохирогчийг бодвол өлсгөлөнд нэрвэгдээд удаагүй билээ.
- Та нар ХМТ-ны хүмүүс мөн үү? хэмээн тэр сөөнгөтсөн, сулхан хоолойгоор асуулаа. Райли бүсгүйн ирланд аялгыг шууд анзаараад түүнийг Ирландаас Америкт шилжин суухаар ирснийг санав.
- Намайг мөрдөгч Райли Пэйж гэдэг, харин энэ хүн бол мөрдөгч Билл Жеффрис.
Райли өвчтөний дэргэд сандал дээр суулаа. Билл, эмч хоёр зогссон хэвээрээ үлдэв.
- Чамайг Миэра гэж дуудаж болох уу? гэж Райли эелдэг зөөлөн өнгөөр асуулаа.
- Мэдээж хэмээн хэлээд бүсгүй сулхан инээмсэглэв.
- Юу болсныг чи санаж чадах уу?
Миэра санахыг хичээж нүүрээ атирууллаа.
- Тэр эрэгтэй... машинаа засахад нь туслах үед тэр намайг цохиж ухаан алдуулсан. Энэ хэзээ болсныг би сайн санахгүй байна.
- Таван өдрийн өмнө хэмээн Райли түүнд тайвшруулсан өнгөөр хэлэв.
- Би бас тэгж бодсон. Дараа нь би зооринд байгаагаа мэдсэн. Би торон дотор гурван охинтой хамт байсан. Тэд бүгд өлсөөд бараг өлбөрч үхэх гэж байсан. Тэр хүн биднийг тэнд хорьж байхдаа идэж уух юм бараг өгдөггүй байсан. Охидын нэгийг тэр алсан. Охины хүзүүг зүгээр л мушгичихсан.
Миэрагийн амьсгаа давхцаж эхлэв. Өнгөрсөн явдлыг санах үед тэр маш их айж байгааг Райли ойлгож байлаа.
- Чи зоорины талаар надад хэлж өгч чадах уу?
- Тэнд... маш олон цаг байсан. Янз бүрийн цагнууд. Хэдэн зуун цаг. Гэхдээ цагнууд торон хаалтны цаана байсан. Миэра түр зуур дуугаа хурааснаа дахиад аяархан ярьж эхэллээ.
- Бид хаалтыг нэвтэрч гарч чадахгүй... бид тэндээс гарч чадаагүй... Миэрагийн хоолой тасалдав.
Райли Билл рүү эргэж харвал тэр бүсгүй рүү харж байлаа. Билл дотроо юу бодож байгааг Райли гадарлажээ. Эмэгтэй тэр цагнуудыг ухаан солиорсон үедээ хий харсан юм болов уу?
- Чамайг хорьж байсан эрийг дүрсэлж хэлж чадах уу? гэж Райлиг асуутал Миэра дагжтал чичирч эхэллээ.
- Тэр... тэр... би чадахгүй нь...
Райли бүсгүйг ойлгож байлаа. Тэр өөрийг нь хулгайлсан эрийг санах үед ухаанаа алдчихдаг байжээ. Магадгүй тэр өөрийг нь хулгайлсан эрийг сүүлд санаж мэдэх юм.
- Зүгээр дээ гэж Райли түүнд хандаж хэлээд
- Чи яаж зугтсан юм бэ? гэж асуулаа.
Миэра бүр будилж гүйцсэн харагдана.
- Санах юм алга. Хамгийн сүүлд санаж байгаагаар цагнууд чанга дуугарч, тэр биднийг ташуураар ороолгосон. Дараа нь тэр бас өөрийгөө ороолгосон. Тэр биднээс гадна өөрийгөө бас дандаа ороолгодог байсан. Дараа нь санаж байгаа зүйл гэвэл би энд байсан. Би энд яаж ирснээ үнэхээр санахгүй байна.
- Чи ямар нэг аргаар түүнээс зугтсан юм биш үү?
Миэра харцаа бурууллаа. Харц нь булингартаж, тэр одоо ярих тэнхэлгүй болжээ.
- Одоо хангалттай хэмээн хэлээд эмч Райли, Билл хоёрыг өрөөнөөс дагуулж гарлаа.
- Би мэдрэлийн эмч биш, гэхдээ тэр ой санамжаа алдсан гэдгийг сайн мэдэж байна. Богино хугацааны ой санамжаа эргэж санах нь удаан хугацааны хам шинжээс их удаан үргэлжилдэг. Үүнийг бид "ой санамжаа бэхжүүлэх" гэж хэлдэг. Гэхдээ тархины гэмтэл энэ процесcыг алдагдуулдаг. Биднийг олох үед тэр ухаангүй байсан. Миний таамаглаж байгаагаар тэр зугтсан үеийнхээ ой санамжийг хадгалж бэхжүүлэхээс өмнө тархинаасаа арчcан байж магадгүй.
- Тэгвэл тэр үүнийг хэзээ ч санаж чадахгүй юм байна гэж Райлиг хэлэхэд
- Түүнийг санаж чадна гэж би бодохгүй байна хэмээн Пресслер эмч хэлээд толгой сэгсрэв.
- Тэр мэдээлэл одоо түүний тархинаас устаж бүр мөсөн алга болсон. Хэсэг хугацаа өнгөрсний дараа тэр хоригдож байсан үеийнхээ талаар бидэнд ярьж магадгүй. Одоо харин тэр амрах хэрэгтэй.
Райлиг эмчийн өгсөн тайлбарт талархаж буйгаа хэлэх гэтэл Люси тэдний дэргэд хар хурдаараа шуугиулан хүрч ирэв.
- Бид хяналтын камерын бичлэгээс нөгөө нөхрийг олсон. Хэдүүлээ явж бичлэгийг харцгаая хэмээн хэлэхдээ тэр бүр хөөрч догдолчихсон байлаа.
Tэрбээр Билл, Райли хоёрыг компьютерын ард орон нутгийн цагдаа сууж буй нэг өрөөнд дагуулан очив.
- Тэр энэ байна хэмээн нөгөө цагдаа хэллээ.
Райли дүрсийг маш тодорхой харав. Эмнэлгийн үүдэн дээр сарампай болтлоо элэгдэж хуучирсан дунд гарын SUV маркийн машин ирж зогслоо. Машин дотроос дунд зэргийн нуруутай бараан үстэй эрэгтэй хүн буув.
Тэр машиныхаа арын хаалга руу очиж онгойлгоод ухаан алдсан эмэгтэйг гаргалаа. Тэрбээр эмэгтэйг замын хашлаган дээр тавихдаа гэмшсэн байртай толгойг нь илэв. Дараа нь тэр машиндаа хурдан сууж тэндээс хөдөллөө,
- Яг одоо зогсоо гэж Райлиг хэлэхэд компьютерын урд суусан цагдаа бичлэгийг зогсоов.
- Машины дугаар сайн харагдах байна хэмээн Райлиг хэллээ.
Дэргэд нь зогсож байсан Люси түүнийг харж инээмсэглэв.
- Бид энэ дугаарыг аль хэдийн шалгачихсан. Энэ машин гучин настай Жэйсон Кахилл гэдэг хүнийх. Тэр энд, Олманд амьдардаг. Бидэнд түүний гэрийн хаяг байгаа.
- Мөрдөгч Жеффрис бид хоёр тэр нөхрийг очиж баривчилна гэж Райли хэлээд
- Люси, чи эндэхийн бүх зүйлийг хяналтандаа ав. Өвчтөн хэрвээ дахиад өөр зүйл санавал бидэнд мэдэгд гэлээ.

_________________
Sakura


Top
   
PostPosted: Jan.31.19 3:33 pm 
Offline
Гишvvн
User avatar

Joined: Aug.25.03 11:36 am
Posts: 6446
Өө энэ Миэра ёстой найдваргүй амьтан байна шд :frog:. Ард нь хүмүүс итгээд үлдэж байхад.

_________________
:f01:


Top
   
PostPosted: Jan.31.19 7:27 pm 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
* * *
Райли, Билл хоёр Жэйсон Кахиллын гэрийн урд машинаа тавилаа. Деннис Воуны амьдардаг үүдний довжоотой модон сарампай Райлигийн санаанд оров. Харин энэ байшин Воуны эвдэрхий байшинг бодвол хамаагүй дээр харагдах ажээ. Бас саяхан зүлгээ тайрч зассан байлаа. Олманы захад байдаг энэ байшин хөрш айлуудаасаа нэг их холгүй байрлана. Билл тэр хоёр байшин руу очих замдаа замын хажууд хяналтын камерын бичлэг дээр байсан SUV зогсож байхыг харлаа. Тэгэлгүй дээ, машин урд тал дотогшоо хонхойж, нэг их гэрэл нь эвдэрсэн харагдана.
Тэр энэ мөн байх. Бид алуурчныг олсон бололтой хэмээн Райли дотроо бодлоо.
Тэднийг үүдний тавцан руу гарах гэтэл Билл байшингийн суурь луу заагаад
- хар даа, энд зоорь алга гэж хэлэв.
Биллийн зөв байлаа. Байшинг газраас хөндий, хэдэн модон тулгуур дээр барьсан харагдана. Гэтэл Миэра зооринд хоригдож байсан гэж баттай хэлсэн. Зоорь арай өөр хаяган дээр байдаг юм биш байгаа?
Ямартай ч Жэйсон Кахилл хүн мөргөөд зугтсан хэргээр шүүгдэх нь тодорхой гэдгийг Райли мэдэж байлаа. Харин түүний үйлдсэн бусад хэргийг илрүүлэхэд амархан болж магадгүй.
Билл хаалга тогшлоо. Хаалга онгойлгосон хүн тарган, үс ноос болсон Деннис Воунаас огт ангид ажээ. Тэр туранхай, бие хаа сайтай, бас өмссөн жинсэн өмд, богино ханцуйтай цамц нь цэвэрхэн харагдана. Гэхдээ тэр их цонхигор харагдаж байлаа.
- Та хоёр цагдаа нар мөн үү? гэж тэр асуув.
Билл, Райли хоёр түүнд тэмдгээ харуулсанд нөгөө эр маш их гайхаж цочирдлоо.
- ХМТ. Бурхан минь, би цагдаа нар ирнэ гэж бодсон юмсан. Гэтэл яагаад ХМТ гэж?
- Таныг Жэйсон Кахилл гэдэг үү? хэмээн Билл асуулаа.
- Тийм ээ.
- Таныг Миэра Кэганыг авто машины ослоор гэмтээсэн хэрэгт сэжиглэж баривчилж байна. Эргэж хараад зогс гэж Райли түүнд хэлэв.
Жэйсон Кахилл дуулгавартайгаархоёр гараа ар нуруун дээрээ авахад Билл түүнд гав зүүлээ. Райли жижиг байшинг шалгахаар дотогшоо оров.
Байшин дотроо цомхон хэдэн тавилгатай боловч бүх зүйл нь эмх цэгцтэй, цэвэрхэн харагдаж байлаа.
- Тэр эмэгтэйн биеийн байдал ямар байгаа вэ? Тэр зүгээр үү? хэмээн Кахилл асуув.
Райли хариу өгөхийн оронд түүнд эрх үүргийг нь хэллээ.
- Надад ямар эрх байдгийг би мэднэ. Би өмгөөлөгч авмаар байна.
Уур хилэндээ багтарсан Биллийн царай улаан хүрэн болохыг харсан Райлигийн санаа зовж эхлэв. Биллийг өнгөрсөн удаагийнх шиг хяналтаа алдаж, зохисгүй аашлахаас өмнө түүнийг тэр зогсоох хэрэгтэй байлаа.
- Метта Луной, Валери Брунер хоёрын үхлийн талаар чи юу мэдэх вэ? гэж Биллиг ууртай асуухад Райли Кахиллын нүүрийг ажиглав. Гэвч тэр сэжигтэй санагдсан царайны хувирлыг олж харсангүй.
- Би энэ талаар юу ч мэдэхгүй. Өмгөөлөгчгүйгээр би дахиад юу ч хэлэхгүй. Би үүнийг өөрөө зохицуулж чадахгүй болохоор надад та нар нэг өмгөөлөгч гаргаж өг.
- Өнгөрсөн бүтэн сайны орой чи хаана байсан бэ? гэж Билл асуулаа.
- Би өмгөөлөгчгүй нэг ч зүйл хэлэхгүй.
Билл Кахиллыг бага зэрэг өвтгөхөөр нударгаа зангидан дэлсээд автал тэр өвдсөндөө ярвайлаа. Райли байшингаас гарахаар тэдний араас дагаж явжээ.
- Хөөе хэмээн Райли ширүүн дуугарлаа.
Биллийг эргэж харсанд Райли үг нэмж хэлсэнгүй, харин түүнийг уураа барихыг царайныхаа төрхөөр сануулахыг оролдов. Билл толгойгоо хүчтэй сэгсэрлээ.
Райл зөвхөн Биллд санаа зовоогүй ажээ. Кахилл маш тайван харагдаж байсан. Хэрэв тэр алуурчин мөн бол биеэ яаж хянахаа сайн мэддэг гэсэн үг. Түүгээр үйлдсэн хэргийг нь хүлээлгэх амаргүй байж таарна.
Бас охидыг хэзээ ч олж чадахгүй байж мэднэ.
-

_________________
Sakura


Last edited by naran1962 on Jan.31.19 7:41 pm, edited 1 time in total.

Top
   
PostPosted: Jan.31.19 7:31 pm 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Quote:
Өө энэ Миэра ёстой найдваргүй амьтан байна шд :frog:. Ард нь хүмүүс итгээд үлдэж байхад.
Хэлээд юүкэв. Миэра ёстой найдваргүй. кккк
Чадан ядан орчуулж байгаа номыг минь байнга уншиж урам өгдөг дүүдээ баярладаг шүү.

_________________
Sakura


Top
   
PostPosted: Feb.01.19 12:56 am 
Offline
Шинэков Гишvvн
Шинэков Гишvvн

Joined: Feb.01.19 12:52 am
Posts: 1
Уншаад л өдөрт хэд шалгаад л байгаа ккк. Улам их амжилт


Top
   
PostPosted: Feb.01.19 2:59 am 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Бүлэг 16

Райли хэргийн мөрдөлт төвөгтэй болсныг мэдэрчээ. Билл тэр хоёр цагдаагийн газрын байцаалтын өрөөний гадаа сууж байлаа. Кахилл байцаалтын өрөөнд сайн дурын өмгөөлөгчтэй ярилцаж байхад тэд энд бүхэл бүтэн хагас цаг хүлээж байгаа ажээ. Кахилл одоо хүртэл тэдэнд дахиад ганц ч үг хэлээгүй байтал, өмгөөлөгч нь харин үйлчлүүлэгчтэйгээ уулзахаасаа өмнө хоёр мөрдөгчтэй нилээд ярилцсан байна. Орон нутгийн олон нийтийн байгууллагаас томилогдсон дунд эргэм насны энэхүү намхан пагдгар өмгөөлөгчийг Руди Данкелберг гэдэг ажээ.
Өмгөөлөгч Данкелберг бол өмгөөлөх эрх өвөртөлсөн эргүү амьтадтай огт адилгүй нэгэн гэдгийг Райли шууд гадарлав. Ажлаа сайн мэддэг тэрбээр Кахиллыг зөвхөн авто ослын хэрэгт сэжиглээгүй, харин өөр олон хэрэгт сэжиглэж байгаа гэдгийг шууд мэджээ. Тэр ч бүү хэл, Кахиллыг олны дунд шуугиан тариад байгаа гурван хүн амины хэргийн сэжигтэн гэдгийг тэр таамагласан ажээ.
Одоо юу болохыг Райл сайн мэдэж байлаа. Тэр одоо Кахиллыг хүн амины хэргийг талаар нэг ч үг хэлүүлэхгүй байхад санаа тавина, тэр байтугай өөрт нь ч битгий ярь гэж хэлэх биз. Райлигийн уур хүрч байгаа ч Данкелберг зөвхөн ажлаа хийж байгаа гэдгийг мэдэж байлаа.
- Тэднийг өмгөөлөгч дуудахаар миний дургүй хүрээд байдаг юм хэмээн Биллийг амандаа бувтнахад
- Би ч гэсэн адилхан. Гэхдээ бид энэ нөхцөл байдалд тохируулж ажиллах хэрэгтэй гэж Райли хариу хэлэв.
Билл толгойгоо алгуурхан сэгсэрлээ.
- Райли, би ийм зүйлийг хэдий болтол тэсэж чадахаа хэлж мэдэхгүй нь. Би хэрэг мөрдөлтийг дуусгамаар байна. Би энэ нөхрийг зогсоох ёстой.
- Бид энэ хэргийг мөрдөж дуусгана гэж Райли түүний хэлснийг засаад
- Бас бид ажлаа хуулийн дагуухийж гүйцэтгэнэ гэж нэмж хэлэв.
Байцаалтын өрөөний хаалга онгойлоо. Данкелберг хаалгаар цухуйж
- Та нар одоо орж болно гэлээ,
Райли, Билл хоёр өрөөнд орж Кахилл, өмгөөлөгч хоёрын өөдөөс харж суулаа. Кахилл нэг ч үг дуугарахгүй байгаа нь Райлид хачин санагдав. Ихэнх сэтгэцийн өвчтэй алуурчид ингэж загнадаггүй ажээ.
Ширээн дээр Кахиллын урд нэг гараар бичсэн бичиг харагдана.
- Миний үйлчлүүлэгч үнэнээ өчихөд бэлэн байгаа гэж Данкелбергийг хэлсэнд Билл сонссон зүйлдээ итгэж чадахгүй
- Тэр яана гэсэн бэ? хэмээн өөрийн эрхгүй дуу алдлаа.
- Ноён Кахилл одоо үнэнээ өчиж байгаагаа та нарт уншиж сонордуулна гэж хэлээд Данкелберг үйлчлүүлэгчдээ хандаж толгой дохив. Кахиллын царай огт хувирч өөрчлөгдсөнгүй, тэрбээр бичгээ тод дуугаар удаан уншиж эхэллээ.
- Өчигдөр орой би Олманаас дөчөөд километрын зайтай байдаг Гленбурнд байсан. Тэнд би сургаан жилийн өмнө хамт сурж байсан найз нартайгаа покер тоглосон.
Данкелберг түүний уншихыг тасалж
- Миний үйлчлүүлэгч тэр хүмүүсийн нэрс, холбоо барих хаягийг өгөхөд бэлэн байгаа. Ноён Кахилл цааш нь үргэлжлүүл гэж хэллээ.
- Тоглоом бараг шөнөжин үргэлжилсэн. Дараа нь би өглөө дөрөв хагасын үед тэндээс явсан. Би нилээд согтсон байсан ч гэртээ харихдаа машинаа өөрөө барьж явахаар шийдсэн. Тав хагасын үед миний машины урд нэг эмэгтэй гэнэтхэн гараад ирсэн. Би машинаа тэр дор нь зогсоож чадаагүй учраас тэр эмэгтэйг мөргөчихсөн.
Kахилл түр зуур дуугүй болсноо үргэлжлүүлж уншлаа.
- Тэр үед би маш их айж сандарсан. Би зөв бодож сэтгэж чадахаа больсон. Би бас хэдэн удаа СЖТ (согтуугаар жолоо барьсаны торгууль) авсан болохоор дахиад нэг торгууль авна гэхээс айсан. Гэхдээ би тэр эмгэтэйг зам дээр орхиж зүрхлээгүй. Би түүнийг өргөж машиныхаа арын сандал дээр тавиад эмнэлэг рүү шууд явсан. Би түүнийг эмнэлгийн гадаа нь орхисон.
Кахилл хоолойгоо заслаа.
- Гэртээ буцаж ирэхэд миний уусан архи гарчихсан байсан. Тэгээд би бүгдийг эрүүл ухаанаар сайн тунгааж бодсон. Би аймшигтай том алдаа гаргаснаа мэдэж байсан. Би унтаж чадаагүй. Намайг цагдаагийн газар очиж хэргээ хүлээх гэж байтал ХМТ-ны мөрдөгч нар ирсэн.
Өрөөнд дахиад түр зуур чимээгүй боллоо. Эцэст нь тэр
- Одоо би хийсэн хэрэгтээ үнэхээр их харамсаж байна хэмээн бичгээ уншиж дуусгав.
- Одоогоор миний үйлчлүүлэгчийн хэлж чадах зүйл энэ л байна. Та нарын харж байгаагаар тэр өөрөө хэргээ хүлээлээ гэж Данкелберг хэлээд Кахиллд үзгээ өгч
- Тэр одоо зөвхөн мэдүүлэг дээрээ гарын үзэг зурах л үлдлээ гэв.
- Хүлээ хэмээн Билл уурсан хэлээд
- Тэр гарын үзэг зурахгүй гэлээ.
Билл яагаад эсэргүүцсэнийг Райли ойлгожээ. Хэрэв Кахилл хуурамч мэдүүлэг дээр гарын үсэг зурчихвал тэр тэдний гараас мултарчихна. Билл тэр хоёр тэднийг зогсоох аргагүй болсон гэдгийг Райли мэдэж байлаа.
Гэвч Райлид нэг санаа төржээ.
- Түр хүлээгээрэй гэж хэлээд тэр гар утсан дээрээ хүн амины хэргүүд гарсан хэргийн газрууд болон хохирогчдын зурагнуудыг гаргаж ирлээ. Тэр Метта Лунойгийн тураалд орсон цогцосны зургийг Кахиллд харуулаад
- Энэ эмэгтэйг санаж байна уу? гэж асуув.
Эцэст нь Кахиллын царай хувьсxийхийг тэр харав. Царайны хувирал үл мэдэг байсан боловч анзаарагдахаар байлаа. Райли Метта Лунойгийн зурагнуудыг гүйлгэж Валери Брунерын зурагнуудыг гаргаж Кахиллд харуулав.
- Энэ чамд ямар нэг зүйл санагдуулж байна уу?
Кахиллын нүүр шөвийж унжин, нүд нь бүр гөлийчихсөн харагдана. Билл ширээний цаанаас
- Түүнд хариул, муу новш оо! хэмээн хашгирсанд Райли түүнийг тохойгоороо хүчтэй ёвроод
- Би эхлээд хамтрагчтайгаа зөвлөх хэрэгтэй байна гэж хэлэв.
Данкелберг толгой дохихыг xараад Райли Биллийг өрөөнөөс дагуулж гарлаа. Тэрбээр
- Тэр бидний хүн биш хэмээн Биллд хэлэв.
- Чи яаж мэдэж байгаа юм бэ?
- Би үүнийг түүний царайнаас олж харсан. Тэр үхсэн хохирогчдыг амьдралдаа нэг ч удаа харж байгаагүй.
Билл харваас сонссон зүйлдээ итгэж чадахгүй байгаа бололтой.
- Би түүний нүүрэн дээр юу ч олж хараагүй. Тэр аль болох тайван харагдахыг хичээж байна. Тэр бидний харж байсан хэдэн мянган алуурчдаас огт ялгаагүй харагдсан.
- Тэр шартчихсан байна гэж Райли хашгирах шахам хэлээд
- Тэгээд л тэр ингэж харагдаж байгаа юм. Бас тэр маш их цочирдсон. Тэр Миэра Кэганыг гэмтээсэндээ шаналж байгаа гэлээ.
Билл Райлиг нэг хэсэг ширтэж байснаа
- Чи үнэхээр тэгж босож байна? гэж асуув.
Райли шууд хариулсангүй. Тэр бүрэн итгэлтэй биш байлаа. Гэвч дотоод хүн нь Жэйсон Кахиллыг алуурчин биш гэж хэлээд байв.
- Тэгэхээр бид дахиад эхний байрандаа эргээд ирэх шив? гэж Биллийг цөхөрсөн байртай хэлэхэд Райли
- Үгүй. бид түүнийг одоогоор ашиглаж чадна. Тэр осол хаана болсныг бидэнд харуулах ёстой. Энэ биднийг Миэра Кэганы хоригдож байсан газрыг олоход ойртуулж өгнө гэлээ.

_________________
Sakura


Top
   
PostPosted: Feb.01.19 3:00 am 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Quote:
Уншаад л өдөрт хэд шалгаад л байгаа ккк. Улам их амжилт
Thanks :-D :-D :-D

_________________
Sakura


Top
   
PostPosted: Feb.01.19 5:31 pm 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
* * *
Маажуурыг халаасан хоолоо идэхээр ширээнд суух яг тэр мөчид гадаа нь машин ирж зогсох сонсогдов. Тэр урд талын цонх руу гүйхээрээ очиж хөшгөө сөхлөө. Үдшийн бүрэнхийд харсан зүйлдээ тэр маш их цочирдож, дотор нь харанхуйлаад явчихав. Гудамжны эсрэг талын байшингийн довжоон дээр POLICE гэсэн бичиг бүхий хүрэм өмссөн нэг цагдаа хөрштэй нь ярилцаад зогсож байлаа. Маажуур гудамж дагуу ахиулж харвал дахиад хоёр цагдаа хоёр байшингийн урд яг адилхан зүйл хийж байгаа харагдав.
- Тэд биднийг хайж байна гэж түүнийг хэлсэнд
- Тийм байна хэмээн өвөө нь хариулснаа
- Чиний буруугаас болж тэр эмэгтэй зугтсан гэлээ.
Маажуур эмэгтэйг олохоор хурдны замаар өөдөө сөөргөө давхин, ойр хавийн гудамжнуудыг нэг бүрчлэн нэгжиж хаа сайгүй хайсан ажээ. Тэрбээр өвөөтэйгөө маргалдах гэснээ амаа хамхилаа. Тэр өвөөгөө уурлуулахыг хүссэнгүй.
Түүнээс гадна тэр ХМТ-ны хүрэм өмссөн залуухан бүсгүй замын хашлага даван үүдний тавцан өөд өгсөхииг харжээ. Бүсгүй хаалгыг нь тогшлоо.
- Би гэртээ байхгүй юм шиг царайлах уу? хэмээн Маажуур асуулаа
- Мэдээж үгүй, тэнэг минь. Хэрвээ ингэвэл бүсгүйд зөвхөн сэжиг авахуулна. Түүнийг оруул.
Маажуурын духан дээр хүйтэн хөлс цувлаа.
- Гэхдээ би юу хэлэх болж байна аа? Би юу хийх вэ?
- Тайвшир, новш оо. Эмэгтэйа асуулт тавих үед юу ч мэдэхгүй юм шиг байхад л болно.
Маажуур урд хаалгаа онгойлгов. Бараан арьстай залуу бүсгүй мөрдөгч байсан ажээ. Гартаа олон цаас барьсан мөрдөгч бүсгүй түүнийг хараад инээмсэглэлээ.
- Ноёнтон, оройн амгалан тайван байдлыг тань алдагдуулсанд өршөөгөөрэй гэж тэр хэлээд
- Намайг ХМТ мөрдөгч Люси Варгас гэдэг. Би орон нутгийн цагдаагийн газарт энэ хавийн газрыг шалгахад нь тусалж байгаа юм. Та энэ эмэгтэйг харсан уу? гэж асуулаа.
Мөрдөгч бүсгүй түүнд зурагт хуудас үзүүлэхээр өглөө. Маажуур улаан үс, цоохор сэвхтэй эмэгтэйг тэр дор нь танив.
Гэхдээ энэ эмэгтэй хулгайлагдахаасаа өмнө ингэж сайхан инээмсэглэдэг байсныг тэр огт харж байгаагүй ажээ.
- Тэр алга болчихсон юм уу? гэж Маажуурыг асуутал өвөө нь шивнэлээ.
- Битгий асуулт тавь, тэнэг ээ! Асуултыг наад эмэгтэйдээ үлдээ!
Гэвч Маажуурын толгойд өчнөөн олон асуулт эргэлдэж байлаа. Зугтсан эмэгтэйг одоо хүртэл олоогүй юу? Хэрэв тийм бол тэр хаана байгаа бол? Тэр хаашаа явсан бол? Цагдаа нар тэр эмэгтэйг ямар үндэслэлээр энэ хавиас хайгаад байгаа юм бэ?
ХМТ-ны мөрдөгч бүсгүй асуултанд нь хариулсангүй.
- Өнгөрсөн долоо хоногт энэ эмэгтэйг энэ хавьд харсан эсэхийг тань бид мэдэх гэсэн юм.
Маажуур үл мэдэгч царайлж толгойгоо сэгсрэв.
- Та үүнд итгэлтэй байна уу? гэж бүсгүй асуугаад зурагт хуудсаа нүүрэнд нь ойртуулж
- Дахиад сайн хар даа гэлээ. Тэгтэл өвөө нь
- Түүнд итгэлтэй байна гэж хэл хэмээн шивнэв.
- Би үүнд итгэлтэй байна.
ХМТ-ны мөрдөгч бүсгүй өөрийг нь шинжсэн байртай харна. Үүнийг ажсан Маажуур яагаад хэмээн өөрөөсөө асуулаа. Амьсгалаа хэрхэн авахыг нь ажигласан юм болов уу? Нүүр нь хөлөрч норсныг харсан юм болов уу?
- Ноёнтон, Танайх зоорьтой юу? гэж бүсгүй асуулаа.
Маажуур дороо хөшчихөв. Тэр яагаад зоорины талаар асуудаг билээ? Энэ эмэгтэй юу мэдэж байгаа юм бол? Тэрбээр
- Тийм ээ. манайд зоорь байгаа хэмээн тайван хэлэхтэйгээ байлаа.
Бүсгүй түүнд улам ойртож
- Би дотор нь орж харж болохсон болов уу, ноёнтон? гэж асуув.
Маажуур амаа ангалзуулах хэдий ч дуу нь гарсангүй. Өвөө нь аймаар уурлажээ
- Христийн нэрийг бодож наад эмэгтэйгээ оруул. Энд бидэнд нуугаад байх зүйл байхгүй. Түүнд зоорио харуул. Инээмсэглээч! Новшийн хулгайч шиг царайлахаа больж үз!
Маажуур шүлсээ залгиад инээмсэглэлээ.
- Өө тэгэлгүй яахав. Ор л доо.
Бүсгүй дотогшоо орж эргэн тойрноо ажиглаж харав. Түүнд сэжиг төрүүлчихмээр зүйл энд байхгүй гэдэгт Маажуур дотроо найдаж байлаа. Үүдний өрөөнд урьд нь өвөөгийнх нь цагны дэлгүүр байрладаг байжээ. Гэвч олон жилийн өмнө Маажуур өвөөгийнхөө бүх цагийг өөр газар аваачиж тавьжээ. Одоо энэ өрөө өвөө нь нас барахдаа түүнд үлдээж байсан үеийнхээс огт ангид харагддаг. Бас тэр энэ өрөөг үргэлж цэвэрхэн байлгадаг ажээ. Маажуур эмэгтэйг зоорь луу дагуулж явахаар
- Зоорь тэнд байгаа хэмээн хэллээ. Гэвч тэр нэг их яарахгүй байгаа бололтой
- Баярлалаа гэж хариу хэлээд орчин тойрноо ажиглаж зогсоно.
- Энэ миний уншсан нөгөө гурван аллагын хэрэгтэй холбоотой юу? гэж түүнийг асуутал өвөө нь
- Чшш! хэмээлээ.
Гэвч Маажуур бүгдийг мэдмээр санагдаад бүр цөхрөнгөө барж байлаа. Цагдаа нар эдгээр аллагын талаар юу олж мэдсэн юм бол? Тэдний зорилгыг арай гадарлачихсан юм биш байгаа?
Мөрдөгч эмэгтэй байшин доторхийг үргэлжлүүлэн ажиглах зуураа
- Энэ талаар би яримааргүй байна гэж хэлэв.
Маажуур одоо биеэ барьж дийлэхээ больжээ.
- Алуурчин хэн ч байлаа гэсэн, тэр ямар нэг мэдээлэл өгөхийг оролдож байгаа гэж надад санагдсан..
Бүсгүй дороо зогсож түүнийг сониучирхсан харцаар харлаа.
- Тэр мэдээлэл өгч байгаа эсэх нь бидэнд огтхон ч хүртээлгүй. Бидний хувьд тэр бол зүгээр нэг сэтгэцийн өвчтэй гаж донтон. Би зоорийг чинь харж болох уу?
- Мэдээж хэмээн хэлээд Маажуур түүнийг зоорь луу дагуулж очлоо. Маажуур зоорины хаалгыг онгойлгож, гэрлээ асаагаад мөрдөгчийг урдаа оруулахаар зай тавьж өгтөл
- Таны дараа гэж тэр хэлэв.
Маажуур бүсгүйн урьд орж зоорины шатаар уруудлаа. Тэр уул нь мөрдөгчийн царайны хувирлыг харж юу хийхээ ёстойгоо мэдэхийг хүсэж байжээ. Ямартай ч мөрдөгч эмэгтэй зооринд сэжигтэй зүйл олж харна гэж тэр найдахгүй байлаа. Энэ бол саарал тоосгон ханатай, дотроо тавилгагүй, байдаг л нэг энгийн зоорь ажээ.
Зоорины голд хийгээр ажилладаг зуух байрлуулжээ. Бүсгүйг зуухыг тойрч араар нь орох үед Маажуурын харц зэвэнд идэгдэж аалзны торонд хучигдсан төмөр хоолой дээр туслаа. Энд зарим нэг хуучин усны хоолойнууд өчнөөн олон жилээр хэвтэж байгаа ажээ. Маажуурын гар хуруу өөрийн эрхгүй загатнаж эхэллээ.
Тэрбээр хоолой руу гараа сунгав.

_________________
Sakura


Top
   
PostPosted: Feb.01.19 6:15 pm 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Бүлэг 17

Люси зуухны цаанаас гарч ирлээ. Зооринд сэжигтэй зүйл огт харагдсангүй. Үнэндээ учир битүүлэг төрх бүхий гэрийн эзнээс өөр энэ байшинд сэжиглэчихмээр зүйл байсангүй. Шал руу тонгойн харж зогссон эр дээшээ өндийж Люсиг харж зогслоо. Тэр эрийн царай нэг л хачин, дүнсгэр харагдана. Тэрбээр
- Би мэдэж байна, мэдэж байна. Энэ дэмий санаа байсан хэмээн амандаа бувтнав.
Люси их гайхлаа. Тэр эр өөр ямар нэг хүнтэй яриад байх шиг.
- Юу гэнэ ээ? Нөгөө эр Люсиг түгшсэн байртай харснаа
- Зоорь хэмээн түргэн хариулаад
- Энд юу ч байхгүй гэлээ.
- Таны зөв. энд юу ч алга гэж хэлээд Люси эелдгээр инээмсэглэв.
- Цаг гаргаж өгсөнд тань баярлалаа. Миний хийх зүйл дууслаа.
- Цаг хугацаа гэдэг их чухал зүйл хэмээн нөгөө эрийг хэлэхэд Люси зөвшөөрч буйгаа харуулан толгой дохиод шатаар өгсөв. Гэрийн эзэн амандаа бувтнасан хэвээр араас нь дагалаа.
Зоориноос гарч ирсний дараа Люси гэрийн эзнийг дахин нэг удаа анхааралтай хараад
- Би бараг бэлэн болчихлоо гэж хэлээд түүнд Миэра Кэганы зурагтай зурагт хуудас өглөө.
Зурагны доор утасны дугаар харагдана.
- Энэ зургийг сүүлд сайн харна биз. Хэрэв ямар нэг зүйл санаанд чинь орвол бидэнтэй холбоо бариарай.
Дараа нь Люси Миэра Кэганыг хорьж байсан этгээдийг эрж олохоор байшингаас гарч явлаа.

_________________
Sakura


Top
   
PostPosted: Feb.01.19 8:08 pm 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Бүлэг 18

Эприл одоо үнэхээр жаргалтай байлаа. Жовыг усан гаансанд нэг зүйл нэмж хийснийг мэдсэн тэрбээр түүнд талархах сэтгэл төржээ. Одоо түүнд сургууль, ээж гэх мэтийн зүйлд санаа зовох шаардлагагүй болсон юм шиг санагдана. Тэр хүнд баригдаж. торонд хоригдож байснаа санахгүй байлаа. Өөрийг нь хулгайлсан хүнийг ээж нь алах үед тэр ээждээ тусалснаа санаж шаналах хэрэггүй болжээ. Жов өөрт нь санаа тавьж байгааг мэдсэн учраас Эприл түүнд итгэж байлаа.
Жов усан гаансаа түүнд дахиад өгөв.
Тэд машинаа хүмүүс саад болоод байхааргүй, замаас хол зайдуу, ойн гүнд зогсоогоод дотор нь сууж байлаа.
- Чи надад их таалагддаг гэдгийг чи мэдэж байгаа биз дээ? Жовын үг цуурай шиг сонсогдов. Тэр Эприлийн нүүр лүү эгцэлж харлаа.
- Яг үнэндээ би чамд дурлачихсан.
- Би ч гэсэн чамд хайртай хэмээн Эприл хариу шивнэв. Тэр анх удаа эрэгтэй хүүхдэд ийм үг хэлж байгаа ажээ. Эприл дахиад
- Би чамд хайртай, Жов Ламберт гэж өмнөхөөсөө арай чанга хэллээ.
Жов түгшсэн харагдана.
- Би ээжид чинь таалагдахгүй гэдгээ мэдэж байна.
- Энэ ямар ч хамаагүй. Тэр одоо аюултай хүмүүстэй хөөцөлдөж яваа болохоор ийм зүйлд санаа тавих сөхөөгүй байгаа.
Жов аяархан инээлээ.
- Тэр ХМТ-ны агуу мөрдөгч болохоор нээрээ л завгүй байдаг биз. Чамайг дотроо ийм олон гашуун дурсамжийг тээж явдагт би их харамсаж байна
Эприлд ээжийгээ өмөөрч хамгаалмаар санагдав.
- Тэр миний чамд ярьж байсан хүн шиг маш олон хүчирхийлэгчтэй нүүр тулдаг.
Жов дахиад инээмсэглэв.
- Өө тэгэлгүй яахав. Энэ үнэхээр гайхалтай. Та хоёрын хийсэн зүйл үнэхээр гайхалтай байсан гэж би хэлэх гэсэн юм гэж хэлээд тэр Эприлийг үнслээ.
- Чи бол хамгийн гайхамшигтай охин.
Жов охины хувцсыг тайчиж эхлэв. Тэд дахиад эр эмийн ажил хийх гэж буйгаа Эприл мэджээ. Хэдийгээр энэ чухал зүйл биш гэж боддог байсан ч жилийн өмнөөс жирэмслэлтийн эсрэг ерөндөг ашиглаж байгаадаа тэр баяртай байлаа.
Охин жаргалтайгаар шүүрс алдаад Жовд хувцсыг нь тайчихад туслав.
-

_________________
Sakura


Top
   
PostPosted: Feb.02.19 8:31 pm 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Бүлэг 19

Шерри Симпсон унаж яваа бага оврын ачааны тэрэгнийх нь араас нэг машин дагахыг анзаараад дотроо дургүй нь хүрч явлаа. Тэр жолооч түүнийг ферм эрхэлдэг гэрийнхэн рүүгээ очихоор хөдөөний зам руу орсноос хойш араас нь дагажээ. Шил даран дагаж явсан машин одоо түүний машинд бараг мөргөх шахам ойртсон харагдана.
Бүсгүй сандарч эхэллээ. Ингэх нь ч аргагүй биз. Түүнийг арван хэдтэй охин байхад хөдөөний залуус анхаарлыг нь татахаар ингэх тохиолдол олонтаа гардаг байжээ. Тэр үед бүсгүйд энэ их таалагддаг байсан. Шерри тэднээс зугтахын тулд хурдаа гэнэт нэмж, тэднийг шороо тоосонд булж орхидог байжээ. Тэр энэ хавийн өөр хоорондоо сүлжилдсэн нарийн замуудыг сайн мэддэг байсан болохоор зугтах бол түүнд огтхон ч хэцүү байгаагүй. Гэтэл одоо тэр аль хэдийн хорин хэд хүрсэн, бас шөнө дунд болж байсан болохоор энэ түүнд огт таалагдахгүй байлаа.
Хөзрийн клуб дээр тоглож дууссаны дараа удаан ярилцаж суусан болохоор тэр цаг орой болсон хойно гэр лүүгээ харьж яваа ажээ. Олманы рестораны шинэ үйлчлэгч бүсгүйг ялахад Глориа хэрхэн сандрахыг хараад тэд үнэхээр их инээлджээ. Глориа шинэ охины чадварт их атаархаж байсан сан.
Шерри найзуудтайгаа хамт өнгөрүүлсэн сайхан оройг одоо араас нь дагаж яваа өөдгүй амьтан битгий л сүйтгэчихээсэй хэмээн дотроо боджээ. Машины дугаар түүний арын толинд харагдаж байлаа. Энэ Делавер мужид харьяалагддаг дугаар байсан бөгөөд бүсгүй ихэнх тоонуудыг харж чадлаа.
Би энэ хүнийг нутгийн цагдаа нарт мэдэгдэх хэрэгтэй гэж тэр дотроо бодов. Энэ эр над руу хэтэрхий ойртоод байна.
Магадгүй тэр гүйцэд түрүүлэх гэсэн байж мэдэх юм. Бүсгүй найзуудтайгаа бага зэрэг дарс уусан учир бага хурдтай явж байжээ. Иймээс бүсгүй тэр эрийн тэвчээргүй занг буруутгаж чадсангүй.
Tэр замын голоор чигээрээ явж байсан тул арын машиныг хажуугаараа өнгөрүүлэхээр машинаа баруун гар луугаа шахаж хурдаа хаслаа.
Тийм байлгүй дээ, нөгөө жолооч хажуугаар нь гүйцэд түрүүлэхдээ бүсгүй рүү хяламхийж ч харсангүй. Машин хэдэн модны араар гардаг замын эргэлтээр далд оров.
Тэр хүн энэ замыг сайн мэддэг гэж найдахаас хэмээн бүсгүй дотроо бодлоо. Тэнд замын хажуу дахь шуудуу руу давхиад орчихож мэднэ.
Хэдхэн хормын дараа Шерри замын эргэлт рүү оронгуутаа хүчтэй тоормослож тэрэг нь унтарлаа . Чанх урд нь замын голд нэг машин хөндөлдчихсөн зогсож харагдана.
Энэ жолооч согтуу юм болов уу? Эсвэл машин нь эвдэрчихсэн юм болов уу?
Шерри 911 рүү залгахаар гар утсаа авлаа. Гэвч тэр машиныхаа урд гэрэлд тэр машин бүр мөсөн эвдрээгүй, эсвэл шуудуу руу унаагүй гэдгийг тодорхой харав. Жолооч нь моторныхоо тагийг сөхөж гар чийдэн тусгачихсан зогсож байлаа. Жолооч эр
- Би эндээс хөдөлж чадахгүй болсон гэж айж байна хэмээн орилсноо Шерригийн машин руу алхав.
Тэр эр үргэлжлүүлэн ярьсаар байгаа харагдах хэдий ч Шерри яриаг нь сонсож чадсангүй. Тэрбээр цонхоо бага зэрэг доошлуулав.
- Танд утас байгаа юу? Минийх ажилладаггүй. Би үнэхээр тэнэг юм аа. Утсаа цэнэглэх гэсэн чинь цэнэглэгч байдаггүй.
Тэр эр гар чийдэнгээ нүүрэн дээр хальт тусгаад холдуулав. Шерри эргэлзсэн учир утсаа барьсаар сууна.
Цонхны цаана зогсох эрийн эелдгээр инээмсэглэж буй царай бүсгүйг яагаад ч юм жаахан тайвшруулав.
- Та харин хажуугаар өнгөрч байсан нь аз боллоо. Би ах руугаа утасдаж ирж тусал гэж хэлэх хэрэгтэй байна. Хэрэв би таны утсыг ашиглаж чадвал таныг миний машины хажуугаар гарахад тусалж болох юм. Зам бөглөж зогссоныг минь уучлаарай. Мотор маань гэнэт хүчтэй дуугарснаа унтарчихсан. Гэхдээ та миний тусламжтайгаар цаашаа гарч чадна гэж би бодож байна.
Шерри түүнд утсаа өгөхөд бэлэн байлаа. Гэвч нөгөө эр хаалганых нь бариулаас барьсныг тэр анзаарав. Найзууд нь яриан дундаа хавчуулан нэг зүйлийн талаар ярилцаж байсныг тэр гэнэт саналаа...
- Реддитчэд нэг бүсгүй үхсэн олдсоныг та нар сонссон уу?
- Тийм ээ, бас Вестригээс нэг бүсгүйг хулгайлсан гэнэ.
- Энэ ямар нэг цуврал гэмт хэрэг гэж чамд бодогдохгүй байна уу?

Шерри үхтлээ айж хамаг бие нь дагжтал чичрэв. Гэвч тэр айж буйгаа харуулж болохгүй гэдгээ мэдэж байлаа. Бүсгүй нөгөө эр лүү инээмсэглэв. Тэрбээр утсаа өгөхийн оронд нөгөө эрээс зугтахын тулд ачааныхаа тэргийг гэнэт арагш нь гэнэт ухраалаа. Хаалганы бариулаас зуурсан эр хэсэг чирэгдэж байснаа гараа тавьж үзэгдэхгүй болов.
Шерри ачааныхаа тэргийг замын хажуу дахь шуудуу руу оруулчихгүйн тулд хурдаа хаслаа. Тэрбээр арагшаа ухарсан чигээрээ замын эргэлтээр эргэнгүүтээ жолоогоо хурдан эргүүлэв. Ачааны тэрэг шуудуунд ойртоход тэр хальт зогсоод машинаа зам руу оруулж цааш зугтлаа.
Нөгөө нөхөр араас мөшгөх гэж оролдохгүй биз хэмээн найдаад Шерри хурдаа нэмсэнгүй. Тэрбээр 911 рүү залгахаар утас руугаа гараа явууллаа. Тэр гар утсаа хажуудаа тавьсан гэж бодсон боловч утас нь байсангүй.
Би утсаа шалан дээр унагаах ёсгүй байсан хэмээн тэр дотроо бодов.
Тэр утсаа авч зүрхэлсэнгүй. Тэгтэл толгойных нь ард бөөн шил нурж уналаа. Ар талын цонх хагарчээ.
Тэр ачаан дээр гарчихжээ!
Хагарсан цонхоор орж ирсэн гар бүсгүйн хоолойг ороож авлаа.

_________________
Sakura


Top
   
PostPosted: Feb.03.19 8:29 pm 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Бүлэг 20

Шеррид халдсан этгээд гараа тохойгоор нь нугалж хоолойг нь шахав. Сандарсан бүсгүй жолоогоо алдаж, машин замын шуудуу руу уналаа. Машин гэнэт хүчтэй донслоход халдагч этгээд барьцаа алдаж, цонхоор шургуулсан гараа буцааж татжээ.
Шерри нөхцөл байдлыг түргэн ухаж ойлгохоор тархиа ажиллуулав. Мотор унтраагүй, машин асаалттай хэвээр байлаа. Мотор нь хүчтэй, бас дөрвөн дугуйгаараа мааждаг том ачааны тэрэг шуудуунд бүр мөсөн гацчихаагүй бололтой. Гэвч нөгөө нөхөр өөр лүү нь дахиж дайрахаар ачааны тэвшин дээр мөлхөхийг тэр сонсов.
Бүсгүй хурдан сэтгэхийг оролдлоо. Надад зэвсэг болгон ашиглачихмаар зүйл байгаа бил үү? Гэнэт тэр юу ашиглаж чадахаа саналаа. Шерри доошоо тонгойж, зорчигчийн суудал дороос өөрт нь хэрэг болох цахилгаан бороохойгоо авахаар гараа шургуулав. Тэр гаргаж авсан бороохойгоо асаалаа.
Түүнийг дээшээ өндийх яг тэр мөчид нөгөө этгээд цонхоор гараа оруулж харагдав.
Гэвч Шерри ачааны тэрэгний кабин дотор байгаа болохоор түүнд зэвсгээ ашиглах боломж байсангүй. Хэрэв халдагч этгээдийн гарыг цахилгаанаар цохиулах гэж оролдвол тэр бороохойг нь булааж, бүсгүй илүү аюултай байдалд орж мэдэх байлаа. Шерри амьсгаадсаар жолоочийн талын хаалгаа онгойлгож, шуудуу руу үсрэхдээ зэвсгээ гарнаасаа салгасангүй.
Нөгөө эр ачааны тэвшин дээрээс гялс үсэрч дэргэд нь буулаа. Тэрбээр тэвшин дээр байсан хүрзийг барьсан харагдана. Тэр суудлын арын цонхыг хагалахдаа энэ хүрзийг ашигласан гэдгийг бүсгүй ухаарав.
Одоо хүрзээр зэвсэглэсэн эрийн өмнө бүсгүйн хүч мөхөсджээ. Дээшээ харж хэвтсэн бүсгүйг цохихоор нөгөө эр дээр нь бөхийж зогсоод хүрзээ далайлаа.
Шерри хурдан өнхөрч холдонгуутаа хөл дээрээ босож зогсов. Тэр цөхөрч эхэлсэн хэдий ч гар дахь зэвсгээрээ тэр эрийг зогсоох боломж байгаа эсэхийг харлаа. Гэвч энэ амаргүй байх бололтой. Цахилгаан хүчдэл зөвхөн хоёр тохой хүрэхгүй зайнаас цохиж чаддаг атал хүрзний иш энэ зайнаас урт харагдана. Нөхцөл байдал тэр эрд илүү ашигтай байлаа.
Гэхдээ энэ эр хэр их хүчтэй юм бол? хэмээн бүсгүй өөрөөсөө асуув.
Машины урд гэрэлд Шерри тэр эрийн бие хааг шинжвэл өөрөөс нь өндөр, бас жингээр илүү хүнд харагдлаа. Бүсгүйг гэрийнхэн нь их туранхай болохоор "буурцагны иш" хэмээн хочилдог ажээ. Гэвч тэр фермийн болон биеийн хүчний ажил их хийдэг болохоор харагдаж байгаагаасаа их хүчтэй билээ.
Нөгөө эр толгойг нь хүрзээр цохих үед бүсгүй бултаж амжив. Тэр дахиж цохихоор дороо тэнцвэрээ олохыг оролдож буйг Шерри харлаа. Хүрз дахин толгойд нь ойртож ирэхэд Шерри хүрзийг агаарт тогтоохоор сул гараараа ишнээс нь барьж авлаа. Тэрбээр нөгөө гараа урагш сунгаж, бороохойгоо түүний гэдсэнд шууд тулгав. Цахилгаан хүчдэлд цохиулсан эр суманд оногдсон мэт дороо атиралдаж уналаа.
Шерри ч тэр дороо ухасxийн машиндаа суув. Тэр машинаа нааш цааш холхиулсаар шуудуунаас гаргалаа. Дараа нь тэр шороон зам руу гарахын оронд малын бэлчээр тойруулж босгосон цагаан шонгуудыг чиглэн давхив.
Шерри энэ талбайг алган дээрээ тавьсан мэт сайн мэддэг, бас ачааны тэрэг нь энэ талбайг туулж гарах хангалттай том, хүчтэй гэдгийг мэдэж байлаа. Тэрбээр талбайг сарны гэрэлд сайн ажиглаж харав. Малын бэлчээрийн цаад талд, дөрвөн зуугаад метрийн цаахан өөр нэг зам байдгийг тэр мэддэг ажээ.
Нөгөө эр суудлын жижиг тэргээрээ араас нь дагаж чадахгүй гэдэгт тэр итгэлтэй байлаа. Магадгүй тэр үүнийг оролдож ч зүрхлэхгүй биз. Гэвч Шерри дахиад нүүрлэж мэдэх аюулаас бүр мөсөн холдохоос нааш хурдаа хасахыг хүссэнгүй.

_________________
Sakura


Top
   
PostPosted: Feb.04.19 12:05 am 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Бүлэг 21

Райли, Билл хоёр орон нутгийн цагдаагийн газрын хурлын танхимд Люсигийн хариуцсан багийн ажлын тайланг сонсож суулаа. Тэднийг нэг ч сэжигтэн барьж ирээгүйд Райли дотроо их бухимджээ.
- Та нар бүх газрыг сайн нэгжиж чадсан уу? гэж түүнийг асуухад Люси
- Бид Жэйсон Кахиллын Миэра Кэганыг мөргөсөн гэж хэлсэн тэр газар нийтдээ зуугаас илүү байшинг шалгаж үзсэн гэж хэллээ.
- Та нар сэжигтэй санагдсан нэг ч хүн олоогүй гэж үү?
Люси толгой сэгсрэв.
- Үнэндээ шууд ингэж болохгүй юм шиг санагдсан. Энэ хотынхон нэг хачин этгээд зантай юм байна лээ гэснээ тэр ширээнд сууж байсан нутгийн таван цагдаа руу хараад
- Би доромжлох гээгүй юм шүү хэмээн нэмж хэлэв.
Нутгийн цагдаа нар инээлдэж, тэдний нэг болох залуухан эр
- Зүгээр дээ гэсэнд арай ахмад настай нэг нь
- Олманд тавтай морил. Тэр этгээд араншин чинь энэ нутгийнхны онцлог хэмээн хэлэв.
- Бас тэд бүгдээрээ ХМТ-ны мөрдөгчтэй ярилцахаас зайлсxийгээд байсан гэж Люсиг хэлэхэд нөгөө насаар ахмад цагдаа дахиж инээгээд
- Mанай энд ХМТ-г тийм ч сайн мэдэхгүй. Нутгийн оршин суугчид чамайг энд тэдний буу зэвсгийг хураахаар ирсэн гэж бодож байгаа гэлээ.
- Зоорьтой айлуудын зооринд орж үзье гэхээр зарим нь намайг сэжиглээд байсан. Зарим нэг нь илт дургүйцэж ч би зоорийг нь бараг хүчээр орж шалгасан.
- Чи тэгээд юу ч олж чадсангүй юү? гэж Билл асуулаа.
- Өө, асар том тоглоомон төмөр замууд. Нэг айлд маш их солонгорсон шилэн савны цуглуулга байсан. Бас нэг хүнд хуучин галт зэвсгийн цуглуулга байсан. Энэ их хачин хот юм, бас оршин суугчид нь сонин хачин зүйлс төсөөлж боддог юм байна лээ. Би хэдэн хүүхэдтэй ярилцсан. Гэтэл тэд тэнд ойролцоо байдаг ойд сүнснүүд байдаг гэж хэлсэн.
Одоо болтол дуугүй сууж байсан нэг цагдаа
- Тийм ээ, тэнд амьдардаг хүүхдүүд сүнстэй үлгэрт их дуртай. Би ч гэсэн тэдний насан дээр ийм байсан. Миний бодлоор бид бүгдээрээ адилхан тийм байсан биз. Олман шиг алслагдсан хотод бусдын анхаарлыг татдаг нэг иймэрхүү явган яриа байдаг юм. Иймэрхүү зүйл байхгүй бол бүгд уйтгартай шүү дээ гэж ярилаа.
Люсиг ямар нэг зүйл зовоогоод байгааг Райли анзаарчээ.
- Чи юу бодоод байгаа юм бэ?
- Гэмт этгээд хохирогчдоо зооринд хорьж байгаа гэдэг нь баттай юм болов уу?
Райли түр бодол болсноо
- Энэ баттай биш. Миэра Кэган зоорь болон тэнд байсан цагнуудын талаар ярьсныг л бид мэдэж байгаа. Энэ их үнэмшилтэй сонсогдож байсан. Магадгүй тэр сүүлд илүү олон зүйл санаж мэдэх юм гэлээ.
Ширээний тавцанг хуруугаа товшиж суусан Биллийн тэвчээр барагдсан бололтой, тэрбээр
- Ингэхэд бид Жэйсон Кахиллыг сэжигтэн биш гэж батлаагүй байгаа гэж хэлэв.
Райли хариу хэлсэнгүй. Тэр Кахилл сэжигтэн биш гэдэгт итгэлтэй байгаа ч энэ бодлоо Биллд тайлбарлаж хэлэхэд арай хангалтгүй байлаа. Ямартай ч Кахилл одоогоор гол сэжигтэн хэвээрээ байгаа бөгөөд тэр хэрвээ үнэхээр алуурчин мөн бол эрт орой аль нэгэнд энэ батлагдаж л таарна.
Тэрхэн мөчид хаалга онгойж, хурлын танхимд нэг хөөрч догдолсон залуухан цагдаа орж ирлээ.
-Тэр дахиад нэг хүнд халдсан байна хэмээн тэр хэлээд
- Тэр хөдөөний зам дээр нэг эмэгтэйг хулгайлахыг оролдсон гэнэ. Энэ удаа харин тэр эмэгтэй зугтаж чадсан. Бид тэр эмэгтэйг нааш нь авчирч байгаа гэж нэмж хэлэв.
Энэ бүх хугацаанд Райлид анх удаа найдвар төрлөө.

_________________
Sakura


Top
   
PostPosted: Feb.04.19 12:06 am 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Одоо 48 бүлгээс 27 үлдлээ. Энэ сардаа оруулж дуусгахыг бодож байна. Урам хайрлавал илүү хурдан оруулна шүү. :frog:

_________________
Sakura


Top
   
PostPosted: Feb.04.19 12:24 am 
Offline
Гишvvн
User avatar

Joined: Aug.25.03 11:36 am
Posts: 6446
Баярлалаа. Таныг цагаан сарын бэлтгэлээ хийгээд алга болчихлоо гэж бодлоо шүү :hi:.

_________________
:f01:


Top
   
PostPosted: Feb.04.19 1:11 am 
Online
Өвөг Дээдсийн Сахиус Гишvvн
Өвөг Дээдсийн Сахиус Гишvvн
User avatar

Joined: Jul.30.06 7:33 am
Posts: 747
Location: Holland
Quote:
Баярлалаа. Таныг цагаан сарын бэлтгэлээ хийгээд алга болчихлоо гэж бодлоо шүү :hi:.
Цагаан сар болох гэж байгаа юм уу? :frog: :think: Хэзээ? Энд цагаан сар тэмдэглэх биш дээ. :-D

_________________
Sakura


Top
   
PostPosted: Feb.04.19 11:44 am 
Offline
Гишvvн
User avatar

Joined: Aug.25.03 11:36 am
Posts: 6446
Маргааш шинийн нэгэн шүү дээ, эгч минь :col:.

_________________
:f01:


Top
   
Display posts from previous:  Sort by  
Post new topic  Reply to topic  [ 794 posts ]  Go to page Previous 125 26 27 28 2931 Next

All times are UTC+09:00


Who is online

Users browsing this forum: naran1962, panther and 1 guest


You cannot post new topics in this forum
You cannot reply to topics in this forum
You cannot edit your posts in this forum
You cannot delete your posts in this forum
You cannot post attachments in this forum

Search for:
Jump to:  

Copyright Asuult.NET © 2000-2015.
Administrative Contact: Khundaga Khurelbaatar [hundaga@hotmail.com]
Tel: 1-888-303-4927, Fax: 1-888-406-2264.
Powered by phpBB © 2000-2015 phpBB Group. Powered by phpBB® Forum Software © phpBB Limited