|
ПИНК ФЛОЙД ( Pink Floyd )
Английн рок хамтлаг
''Pink Floyd' хамтлагийн 1983 онд гаргасан ''The Final Cut'' /Сүүлчийн хуваалт/ цомгийнх нь ''Get Your Filthy Hands off The Desert'' /Бохир гараа миний нутгаас тат/ дуунд нь: "Брежнев Афганистаныг эзэллээ, Бегин Бейрутийг авлаа, Голтиерри Фолклэндэд Британийн далбааг буулгалаа /Англи, Аргентины цэргийн мөргөлдөөнийг хэлж байна/… гэхчилэн дуулдаг ажээ. Цомог дэлхийгээр нэг тарж байхад хамтлагийхан зүгээр л мөнгөө тоолцгоож байв. Харин дээрх дуунаас болж хамтлагийнхан олон жил "хар данс"-нд бичигдэнэ гэж санаа ч үгүй байлаа. Энэ дууг ЗХУ-ын нутаг дэвсгэр дээр зарж борлуулж, хувилахыг хориглосон юм.
"Пинк Флойд" хамтлаг 1965 онд байгуулагджээ. Хамтлагийн анхны ахлагч Сид Барретт 1946 онд Кембриж хотод төрсөн байна. Тэр 60-аад оны дунд үед Лондоны уран зургийн коллежийг төгссөн хэдий ч хамгийн их сонирхдог зүйл нь хөгжим, яруу найраг байлаа. Рожер Уотерс, Ник Мейсон, Ричард Райт нарын хамтаар тэр, Америкийн алдартай хоёр блюз хөгжимчний нэрийг залгасан "Пинк Флойд" хэмээх дэлхийд алдартай хамтлагийг байгуулжээ.
Эхний жилүүдэд Сид Барретт бүх дуунуудаа зохиож, гитар тоглож, хамтлагийнхаа гол амин сүнс нь болж байсан төдийгүй хамтлагаа богино хугацаанд Британийн шилдэг андерграунд /60-аад он 2-р хагаст үүссэн, хиппичүүдийн сэтгэлгээнд тулгуурласан рок урсгал орч./ хамтлаг болгож чадсан юм. 1967 онд "Пинк Флойд" анхныхаа "The Piper At the Gates of Dawn" /Үүр цайхын өмнөх бүрээчин/ цомгоо гаргасан нь маш амжилттай болж, Британийн хитэд 7-р байр эзэлжээ. Гэвч энэ нь Сид Барреттын оролцсон эхний бөгөөд эцсийн цомог болсон юм. 1968 оны 4-р сард тэр "Сэтгэлийн гүн хямралд орж, мансууруулах бодисонд автсанаар" хамтлагаасаа гарч оронд нь Дэвид Гилмор шинээр орсон байна. Тэр үеэс Гилмор хамтлагийнхаа гол хөдөлгөгч нь болжээ. Хамтлагийн хөгжим сэтгэл зүйн өнгө аястай болж, "огторгуйн рок" гэж нэрлэгдэх болсон юм. "Пинк Флойд", цахилгаан хөгжмийн янз бүрийн дуугаралтууд, энгийн дуу авиаг идэвхтэй хослуулан хэрэглэж байсан нь онцгой сэтгэгдлийг төрүүлж байлаа. Францын хөгжмийн академи "Ummagumma" хос цомгг нь 1969 оны шилдэг цомгоор нэрлэж байжээ. Алдарт кино найруулагч М.Антониони "Zabriskie Point" кинондоо "Пинк Флойд"-оор хөгжим бичүүлэх сонирхолтой байгаагаа ч илэрхийлж байлаа. Энэ бүхэн, хамтлагийн эхэн үеийн уран бүтээл ямар өндөр түвшинд байсныг гэрчилдэг юм.
Сид Барретт 70-аад оны эхээр 2 ч гоцлол цомог гаргасан боловч гойд амжилтанд хүрээгүй байна. Удалгүй Барретт хөгжмийн ертөнцөөс сураг тасарчээ. Гилмор хожмын ярилцлагандаа, тэр төрөлх Кембриж хотдоо амьдарч хөгжмөөс бүр хөндийрсөн гэж мэдэгдсэн юм.
Хамтлагийн гол авууштай зүйл нь, тэд хөгжмөөр илэрхийлэх өөрсдийн гэсэн өвөрмөц арга барилыг бий болгосон байлаа. Тэрхүү туршилт нь 1972 онд гаргасан "Obscured by clouds" /Харанхуй үүлс/ цомогт нь бараг илрээгүй ч, 1973 оныг хүртэл ашигласаар байсан гэж үздэг. Харин зарим нэг өвөрмөц зохиомжыг нь "La Valle" кинонд зориулан бичсэн гэж тайлбарладаг байна.
1973 онд гарсан "The Dark side of the Moon" /Сарны сүүдэртэй тал/ цомог нь хамтлагийн уран бүтээлд шинэ үе эхэлснийг зарласан юм. Сонсогчдод хялбар ойлгомжтой энэ цомогтоо, өөрсдийн өвөрмөц арга барилыг хөгжмийн шинэ урсгалтай амжилттай хослуулсан байдаг. Тийм ч учраас гайхалтай их орлого олсон байлаа. Энэ цомгийн амжилтанд, өмнө нь алдарт "Битлз" хамтлагийн "Abby road" цомгийг нь бичсэн авьяаслаг дууны найруулагч Алан Парсонс чухал нөлөө үзүүлсэн нь ойлгомжтой. Үүний дараагаар тэр өөрийн "Alan Parsons project" хамтлагаа байгуулсан юм. "Сарны сүүдэртэй тал" цомог нь Британийн хитэд багтаж 725 долоо хоногийн турш шилдэг 200 цомгийн тоонд орж байжээ.
1975 oнд ''Пинк Флойд'', ''Wish you were here'' /Та энд байхгүй нь харамсалтай/ цомгоо гаргаж, ''Shine on you crazy diamond'' дууг нь Сид Барреттэд зориулсан байлаа. 1979 онд дэлхийн рок хөгжмийн түүхэнд томоохон үйл явдал болсон нь тэдний гаргасан ''The Wall'' /Хана/ хос цомог нь байснаас ''Another brick in the Wall'' /Дахин нэг тоосго хананд / дуу нь бүр ч ихээр алдаршсан юм. Тэр үед, тэр тусмаа ЗХУ-д "Пинк Флойд хамтлагийн дайны эсрэг хандсан үзлийг нь бахархан магтацгааж байлаа. Гэвч 1983 онд "Сүүлчийн хуваалт" цомог нь гарч, хамтлаг "хар данс"-нд бичигдэх болсон юм. Энэ цомгоо тэд, хүүгээ төрөхөөс хэдхэн сарын өмнө дайнд амь үрэгдсэн Рожер Уотерсын эцгийн дурсгалд зориулсан байлаа. Брежневийн тухай дуулсан тэр бадгийг Рожер дуулсан бол дээр байжээ.
Хожим нь Рожер Уотерс хамтлагаасаа гарч бие даан уран бүтээл хийх болсон юм. Тэгээд ч зогссонгүй шүүхэд зарга үүсгэж хамтлагийн нэрийг өөртөө авахаар үзсэн хэдий ч 1987 онд шүүхээс нэхэмжлэлээ татан авчээ. Бие даан уран бүтээл туурвихдаа Рожер Уотерс хэд хэдэн цомог гаргасан ч онцын их амжилтанд хүрээгүй байна.
"Пинк Флойд"-ыг тартал хангалттай урт хугацаанд Дэвид Гилмор хамтлагаа тогтоон барьж, үлдсэн хоёр гишүүнээ өөртэйгээ холбон нэгтгэж байжээ. Энэ хамтлагийг үнэндээ Д.Гилмор, Р.Райт, Н.Мейсон гурав л төлөөлсөөр ирсэн юм. Чухамдаа тэд л өөр хөгжимчдийг урьж "A momentary lapes of reason" /Түр зуурын солиорол/ цомгоо 1987 онд гаргаж маш их амжилтанд хүрчээ. "The dogs of war" /Хөлснийхөн/ гэдэг алдартай дуу нь орсон энэ цомог Европын хитэд 2-рт бичигдэж, хитэд байсан хугацаагаараа өмнөх "Сарны сүүдэртэй тал"-ын тогтоосон дээд амжилтыг эвдсэн юм.
Уран бүтээл нь сэргэж эхэлсний дараагаар "Пинк Флойд"-ыхон аялан тоглолтоо хийхээр шийджээ. Энэ нь тоглолт хийлгүй бараг 10 жил завсарласны эцэст гаргасан шийдвэр байлаа. Европт хийх 45 хоногийн аялан тоглолтынхоо хүрээнд тэд 1989 оны 6-р сарын эхээр ЗХУ-д иржээ. Хамтлагийг дагалдсан хоёр онгоцонд 100 хүний бүрэлдхүүнтэй техникийн алба: дууны, гэрлийн техникчид, аудио, лазерийн, эффектний гээд 120 тонн тоног төхөөрөмж ирсэн байлаа. Тэд Москвад ирснийгээ "Мөнгөний төлөө биш, харин жинхэнэ хөгжим тоглох гэж" хэмээн тайлбарлаж байсан юм. Москва тэдний хувьд аялан тоглолтын ээлжит хот нь болсон байв. Москвад хийсэн тоглолтоо тэд "Од шиг гялалзаж явсан залуу насаа дурсаач" хэмээн дуулдаг Сид Барреттэд зориулсан дуугаараа эхэлсэн юм. Сонирхолтой нь өөрчлөн байгуулалтын үед Москвад ирсэн тэд "Сүүлчийн хуваалт" гэдэг тэрс цомогтоо орсон Брежневийг муулсан дууг, ер нь нэг ч дууг нь дуулаагүй байна.
"Пинк Флойд" хамтлагийн уран бүтээл ХХ зууны хөгжмийн түүхэнд томоохон байр суурийг эзэлдэг төдийгүй, рокын түүхэн дэх хамгийн шинэчлэгч хамтлаг гэгддэг юм.
|
Register
Login
FAQ
Search
