#AsuultSambar :

ASUULT.NET - МОНГОЛ УЛС МАНДАН БАДРАГ!
It is currently Aug.23.19 5:18 pm

All times are UTC+09:00




Post new topic  Reply to topic  [ 87 posts ]  Go to page Previous 1 2 3 4 Next
Author Message
PostPosted: Mar.26.18 6:38 pm 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Амьдрал баялаг, амьдрах сайхан гэж өөрийгөө хуурах гэж л байнга хэлдэг, бичдэгээсээ гэнэт маш ихээр залхав. Өөдрөг байх гэж, уран зохиол дээр гардаг хийсвэр, бүтэшгүй үлгэрт итгэн сажилсаар үнэхээр цуцав. Нэг хүнийг амьдралаа болгосон, нэг хүнээр хүсэл мөрөөдлөө хязгаарласан тэнэг охин... Итгэж найдаж явсан зүйл нь дахиад бүтэлгүйтжээ. Хүсэн тэмүүлж очсон хүн нь хүлээж авсангүй. Гунигтай байна. Бүүр маш их гунигтай байна. Дэндүү их гунигтай байгаа тул уйлъя гэсэн ч нулимс нь гарахгүй, хашгаръя гэхнээ ч хоолой нь гарахгүй... Харин инээд нь л хүрч байгаа бололтой. Өөрийгөө шоолоод ч байгаа юмуу. Анхнаасаа л бүтэхгүйг гэдгийг, иймэрдүү төгсгөл ирнэ гэдгийг тархи нь таамаглажээ. Гол нь зүрх, сэтгэлээ үнэхээр хорьж дийлээгүй тул зөнгөөр нь хаячхаж. Буугаад өгчхөж. Гэхдээ ямар ч хариу үйлдэлд бэлэн байж л дээ. Эцэст нь зөрүүд зүрх яахав, хүртэх ёстойгоо хүртэж, харин тархи нь түүнийг харан шоолж байна. Зүрх нь дахиж л тархинд саад бололгүй зөвхөн цус юүлэх ажилдаа л шамдахаар шийджээ. Сайн л биз. Тархи нь бүгдийг гартаа авсан цагт дахиж л ингэж айхтар шаналахгүй юм чинь. Ер нь бол нэг талаараа аз жаргалтай төгсжээ энэ түүх. Гэхдээ юм бүхэн хоёр талтай...

Одоо бол юу ч бодогдохгүй байна. Ер нь юм бодохыг ч хүсэхгүй байна. Яг л нэг хийх ёстойгоо хийж, болох ёстой юм болдгоороо болсон мэт. Ганц хэцүү нь үүнээс цааш санаж сарвайж, хүсэж тэмүүлэх зорилгогүй л болчих шиг. Гэвч амьдрах хэрэгтэй. Инээх хэрэгтэй. Амьд явах хэрэгтэй. Яагаад гэвэл би амьдрах дуртай. Амьдралд хайртай. Өөртөө ч бас хайртай. Гэхдээ түүнд бүр их хайртай. Магадгүй үгүй юм болов уу. Зүгээр л гоморхдог байх. Хаяад одсонд нь. Гэхдээ нэг мөсөн хаяад явчихгүй, өөрийгөө бүрмөсөн мартуулахгүй, тэгэс ингэсгээд л намайг аргалаад байлгаад байдагт нь... Тэгээд тэр гомдлоо тайлж чадахгүй болохоор шаралхаад байдаг байх. Үгүй ээ, энэ сүүлийн өгүүлбэрүүд үнэн биш. Гэхдээ өчигдөрхөн л би бурханчилан шүтдэг түүнийхээ өвөрт хэвтэж байсан. Өглөө болоход бид хоёр салан одно гэдэг айдсаас болж би жаргаж чадаагүй. Дахиад л нөгөө эцэс төгсгөлгүй хүлээлт үүсэж, хоосон найдвар бадамлан асна гэхээс халширч байв. Тиймээс түүнийг унтсаны дараа суларсан биеийг нь тэврээд хэсэг уйлсан. Унтаж буй түүний царай маш тайван, амарлингуй бөгөөд сайхан харагдаж байсан. Хэзээ ч шаналдаггүй, хэзээ ч зовдоггүй гэлтэй. Гэхдээ хүн л юм чинь зовж байгаа. Ялангуяа түүнд санааг нь зовоодог олон асуудал байдгийг би мэднэ. Зүгээр л тэр маш сайн нууж, зөвхөн дотроо хадгалж чаддаг юм. Би тэр бүгдийг нь хуваалцаж, байнга л түүндээ урам зориг өгч амьдрахыг хүсдэг. Ядаж л муухай өдрүүдийнх нь шөнийг гоё байлгахыг, амар тайван, урмаар дутаахгүй, үнэнч байхыг хүсдэг юм. Гэхдээ энэ бүгдэд хариу хэрэгтэй. Бид нэг баг байхын тулд ижил мэдрэмжтэй байх ёстой. Хамгийн гунигтай нь түүний ирээдүйд би огт байхгүй, одоод нь ч тэр, бүр бодолд нь хүртэл...

Өнөөдрийг хүртэл би чадах хүртлээ чиний араас явлаа. Чиний дэргэд байх боломжтой хамгийн ойрхон газар нь хүртэл ирсэн боловч бидний дунд олон өндөр уул, далай байгаа мэт эсрэгээрээ хэтэрхий хол санагдах аж. Магад бидний дунд олон уул бас далай байсан ч би чиний араас тэмүүлсээр байгаад оччих сэтгэлтэй гэдгээ л мэдлээ. Намайг сайхан юм бичиж уяраадаг боловч үйлдэл нь зөрдөг гэж чи сүүлд хэлсэн. Би чамд үгнээс илүү үйлдэл гэдгийг харуулах гэж тэмүүлсээр байгаад дэргэд чинь хүртэл ирчхээд байна. Би амьдралд өөр юун дээр ч ингэж тууштай, шаргуу байж үзсэнгүй. Энэ жинхэнэ хайр биш гэж үү. Өөр ямар эмэгтэй над шиг чамайг хайрлана гэж найдаад байдаг юм бол доо чи минь. "Чи миний алдаж болохгүй боломж" гэж хэлэхэд "ахиж олдохгүй сонголт" гэж гүйцээгээд, гарыг минь үнссэнээ санаж байна уу.

Энэ гомдлыг би эндээс цааш дахиж тээхгүй. Би хичээх болно. Би өнөөг хүртэл маш их хичээсээр, тэвчсээр, тэмцсээр ирсэн. Би түүний тухай бодол, дурсамжаар дүүрэн маш өндөр дөрвөн ханаар хашигдчихсан юм шиг... Хоорондоо дэндүү хол зайтай тэр ханануудад ямар ч хаалга, нүх сүв байгаагүй. Гэтэл дээшээ харахнээ гэрэл харагдах шиг. Одоо би зөвхөн тэр гэрэл рүү л мацах хэрэгтэй. Түүнд хүрчхээд би өөрийгөө шоолон инээж, хайрлан бахархахыг л хүснэ...


Top
   
PostPosted: Mar.28.18 5:05 pm 
Offline
Алдар Сууны Оргилд Хvрсэн
User avatar

Joined: Jul.19.11 1:07 am
Posts: 2634
Location: Musée du Louvre
zohiolch boluul deergui yu? :razz: uyangagiin halil, zuirlel muirlel mair2 bidnii hoorond dalai l gene uul l gene arai l garig, ogtorgui baigaa gej bichsengui :razz: :lol:

_________________
lisa egch bid 2


Top
   
PostPosted: Apr.08.18 8:36 am 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
“Чи яг л соронз шиг. Чиний дүр төрх, үйл хөдлөл, үг яриа гээд бүх зүйл чинь намайг татдаг. Чи хэн юм бэ, яагаад намайг өвдөг сөхрүүлээд байгаа юм бэ. Амьдралд шантраад, дотроо шатаж явахад чи гэнэт л миний амьдралд ороод ирсэн. Бүх зүйлд чинь баярлалаа. Би чамаас юу ч хүсэхгүй, бас хүлээхгүй. Тийм болохоор битгий намайг дорд үзэж, гомдоогоорой...”

Өчигдөр эдгээр үгсийг нэг хүнээс сонсоод нойр хүрэхгүй их хөрвөөлөө. Би тэр хүнд ямар ч сэтгэл зүрхний асуудал байхгүй л дээ. Гэхдээ л түг түмэн бодол эргэлдээд байлаа. Уур ч хүрэх шиг. Өөрөө сайхан сэтгэлээ онгойлгосноо, намайг бодолд автуулж зовоохдоо яахав дээ гэж. Гэхдээ нөгөө талаар баярлах ч шиг. Зүгээр л хариултгүй асуултууд, талархсан сэтгэл, хэмжээ хязгаарыг тогтоосон чин сэтгэлийн үгс. Миний оршин буйг нь ч хүртэл анзаардаггүй хүмүүсээс энэ мэт чин сэтгэлийн үгс сонсохоор би өөрөө зовоод байдаг юм. Учир нь би өөрт нь хайргүй хүнийг хайрлаж, байнга түүнийхээ араас чих тавьж, хэзээ ч бүтэхгүй хоосон найдлага тээж амьдрах үнэхээр хэцүү гэдгийг мэддэг учраас... Хүний чин сэтгэлээс гарж буй үгсийн ганц нь ч чихэнд наалдахгүй байгаад гунигтай л санагдаж байлаа. Миний сайхан үгс ч бас өөр хэн нэгэнд ингэж санагддаг байхдаа гэж бодогдоод. Ер нь цаашид чимээгүй л байж байсан нь дээр юм.

Гэхдээ ихэнх эрчүүд найрсаг занг сээтэн хаяж байна гэж ойлгодог бололтой гэсэн дүгнэлтэд хүрлээ.


Top
   
PostPosted: Apr.09.18 9:06 am 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Өчигдөр өөрт төрсөн их сонин мэдрэмжээ бичиж үлдээмээр санагдаад.
Нэг залуутай үгээр бооцоотой хөзөр тоглов. Хэн нь ч хожиж, хожоогүй л дээ. Гартаа байсан хөзрөө сайн нууж чадсанаас гадна яг л дүрмийн дагуу тоглосон.

Намайг барьц алдуулах олон зүйл асууж байна. Хэдхэн асуултаар л намайг ерөнхийд нь гадарлаад дүгнэлт хийчих шиг болсон. Би айсан. Мэдээж би түүний бүх асуултад бүдрээгүй хэдий ч юм маш их догдолсон. Юу ч бодогдоогүй хэдий ч зүрх минь яг л кардио хийсэн аятай хурдан хурдан цохилж байв. Гэхдээ тэр их гоё мэдрэмжүүд. Бардам, их юм боддог, ухаантай, зорилготой залуу. Үнэндээ би түүнд татагдахаас айсан.

“Айх хэрэггүй дээ Б минь, би ч бас чамд татагдахаас айж байна...” Түүний энэ үг нь л бүгдийг хэлээд өгөх шиг болсон доо. Амьд байгаагаа, сэтгэл зүрх минь ямар нэг зүйлд бэлэн байгаагаа мэдрэх маш сайхан байлаа. Унтарчихсан сэтгэлийн галд оч үсрэх шиг боллоо. Баярлалаа. Ийм хүн маш ховор хэдий ч бид хэзээ ч зам нийлэхгүй, нийлж ч болохгүй нь гунигтай.



Last edited by БаБу on Apr.09.18 5:12 pm, edited 1 time in total.

Top
   
PostPosted: Apr.09.18 11:08 am 
Offline
Нутаг Нугын Шvтээн Гишvvн
Нутаг Нугын Шvтээн Гишvvн
User avatar

Joined: Dec.25.11 10:56 pm
Posts: 763
Блогийг нь зорин байж орж ирж үзээд юм бичсэн байвал баярладаг шүү, бичиж байгаа зүйлс нь их ойр дотно санагдаад байдгийн.
Тэр хүнийг ор тас мартаагүй байлаа ч, өөрт нь сайн хүнийхээ хайр халамжинд умбаад жаргалтай байна гэж бичих өдөр удахгүй ирэх байх гэж найдаад л байна :cheerleader:

_________________
Төв


Top
   
PostPosted: Apr.11.18 9:35 am 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Тэр цаг мөч удахгүй ирнэ гэдэгт би ч бас найддаг аа хэхэ. Баярлалаа Fever, чамд ч бас амжилт, аз хүсье.

Хандивын талаар би нэг л өөр бодолтой байдаг юмаа. Хүн ер нь их амиа бодсон амьтан юм. Үнэндээ бусдад тусалж буй мэт ч өөрийгөө л бодож байдаг. Би энэ хүнд тусалчихвал эргээд надад хариу нь ирнэ, үр хойчид минь буян болно, би өөрөө аз жаргалтай болно гэх мэтээр боддог учраас. Мэдээж хүн бүрт ижил боломж байдаггүй тул илүү гарч байгаа зүйлээрээ бусдад туслах нь зөв л дөө. Гэхдээ материаллаг зүйлээс илүү тус бол урам зориг хайрлах юм болов уу гэж боддог. Хүн ер нь байнга л урмаар дутдаг юм шиг санагддаг аа.

Хүн төрөлхтөн үүссэн цагаас л хүчгүй нэг нь хүчтэйгийнхээ нөмөр нөөлгөнд амьдарсаар ирсэн. Харин одоо бидний эрин үед бол хүчтэй байх нэг их шаардлагагүй, ухаантай л байх хэрэгтэй. Харин ухаан гэдэг нь эхлээд сайн бодоод, бодож ханааад гаргасан шийдвэрээ буцалгүй гүйцэлдүүлчихээд, эргэж огт харамсалгүй дараагийн шийдвэрээ гаргадаг хүнийг хэлдэг юм болов уу гэж ойлгоод байгаа.

Алхам тутамдаа сонголт хийдэг энэ амьдралдаа бид аль болох л бусдын эрх ашгийг хөндөлгүй, өөрийгөө ч бас зовоохооргүй сонголтыг л хийх хэрэгтэйм шигээ. Аливаа үйлийн үр дагаврыг арав, хорин жилээ байгээ гэхэд хоёр гурван жилээр тунгааж, сонголтоо хийж, шийдвэрээ гаргадаг байх хэрэгтэй. Хэдий хэр хугацаанд амьд явахаа мэдэхгүй ч, сэтгэл санааны хувьд амар тайван байх нь аз жаргал ч юм шиг. Гэхдээ үүнд маш олон хүчин зүйлс нөлөөлөх болохоор их төвөгтэй л дөө. Өөөөр ч тайван дөө.


Top
   
PostPosted: Apr.28.18 4:01 pm 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Өнөөх мөрийтэй хөзөрдөөд байдаг залуутайгаа хэсэг хугацаанд харилцаад... Бараг л сэтгэл зүрхний асуудал үүсчих шиг боллоо. Бараг ч гэж дээ, үнэнийг хэлэхэд тэр миний сэтгэл зүрхийг бүрэн эзэмджээ. Тэр намайг үүрд өөрийн болгочихсон мэт санагдаад...

Тэр хүнийг их ажигладаг. Хүний зан аашыг тодорхойлох олон төрлийн аргуудад суралцсан ба тэдгээрийг ашиглаад тухайн хүнийхээ ерөнхий зан төлөвийг мэдчихдэг. Харилцаанд орж, хүнтэй ярилцах их дуртай. Гэхдээ мэдээж өөрөөсөө илүү, өөртөйгөө ижил төрлийн, байгээ гэхэд өөртэй нь дөхүү ухаантай хүмүүстэй. Өргөн мэдлэгтэй учир маш олон сонирхолтой юм ярьдаг боловч өөрийн дотоод сэтгэлээ уудлах нь ховор. Сэтгэл хөдлөл, үйл хөдлөл, үг яриагаа байнга бодож тунгаадаг. Биеэ маш сайн захирч бас барьж сурсан. Залхуурч хойш суудаггүй, хариуцлагатай. Ном их уншдаг, юмны цаад учрыг тунгаан бодох дуртай. Тиймдээ ч учир битүүлэг юм шиг санагдах вий. Заримдаа хэт гүн, ойлгогдхооргүй юм ярьж залхаах нь ч бий. Өнгөц дүгнэлт хэзээ ч хийдэггүй. Багаасаа тэмцэж, бүгдийг өөрийн хүчээр босгосон учир өөртөө маш хатуу шаардлага тавьдаг, зарчимч байх магадлалтай. Тайван, эгэл амьдрал түүнд зохихгүй. Эрсдэлтэй, сонирхолтой, эрч хүчтэй, байнга өөрийг нь сорьсон зүйл рүү тэмүүлэх болно. Хүчтэй эмэгтэйчүүдийн дунд өссөн тул эмэгтэй хүнийг хайрлаж, жаргааж чадах ч эсрэгээрээ эмэгтэй хүнд мөсөн уул мэт хүйтэн зан гаргаж хялбархан гэгч нь зовоож чадна. Тэглээ гээд нэг их гэмшиж, тоохгүй л байх. Хэрэв түүнийг сайн уудалж чадвал түүнийг дотор хөөрхөн бяцхан хүү нуугдах боловч тэр нь барагтаа л илрэхгүй, учир нь түүний жинхэнэ дотоод сэтгэлээ уудалж, өөрийнхөөрөө байна уу үгүй юу гэдгийг ялгах тун хэцүү... Өөрийн хүрээлэлдээ хүссэн нэгнийг оруулдаггүй. Нэлээд их шалгаж, ярилцаж, туршиж байж итгэл дааж, нөхөрлөх хүнээ сонгодог. Мөн маш их мэдрэмжтэй.

Одоогоор түүний тухай энэ мэт дүгнэлтийг хийгээд байна. Харин тэр намайг дүгнэхдээ.

Чи тогтворгүй зантай. Бас эсрэг хүйстнээсээ хайрыг хүсдэг. Мэдээж хүн болгон тэгдэг. Гэхдээ би энэ утгаар яриагүй. Мэдрээгүй зүйлээ мэдрэхийг хүсэх хандлагатай. Хэрэв нөгөө хүн нь ийм хандлагад хүссэнээр чинь хариу үйлдэж чадахгүй бол чамд сонирхолгүй болоод эхэлчихдэг. Чи сонирхсон зүйлдээ л идэвхитэй байдаг. Ихэнх юм тийм ч сонирхолтой байдаггүй. Тийм болохоор чи ганцаардаж, бусдыг ажиглах дуртай байдаг байх. Чи авъяастай боловч эмх цэгцгүй. Бас өөртөө итгэлгүй.

Гэхдээ эдгээр дүгнэлт зөвхөн өнөөдрийн байдлаарх бөгөөд цаашид бид харилцах тусам өөрчлөгдөнө.

Намайг бүтэн нэрээр минь байнга дууддаг. Бас айх хэрэггүй, санаа зоволтгүй гэж байнга тайтгаруулдаг. Намайг өөртөө итгэлгүй байгаад минь их гайхахдаа “Хоёулаа ондоо чадвартай хүмүүс. Би чамайг өөрийгөө ингэж оркуудтай харьцуулахыг хармааргүй байна” гэж хэлсэн. Миний давуу талыг олж хараад надад тэрийг минь сануулж, урам өгөх нь маш сайхан байдаг. Байнга сонирхолтой байж, намайг их олон юм бодуулахад хүргэдэг. Би өөрийгөө заримдаа голдог ч түүний хажууд байх юм бол үнэхээр одоо байгаа байдлаасаа хэдэн зуун хувь өсөж, дэвшихээ мэдэрдэг.

Нөгөө талаар би түүний хэзээ чин сэтгэлээсээ яриад, хэзээд нь тоглоод байгааг ялгадаггүй. Мэдээж бас байнга мөрийтэй хөзөрдөх залхуутай санагддаг. Бас ийм хүмүүс тун аюултай. Өөрөө алдаа гаргадаггүй тул намайг хөнгөн хуумгай зангаасаа болж нэг л алдах юм бол маш хатуу сэтгэл гаргаж, өөрөөсөө хялбархан түлхэж чадна. Харин тэр их шаналалыг миний зүрх, сэтгэл давж гарч чадахгүй...

Гэхдээ бидэнд сонирхолтой байна. Гоё байна. Сайхан байна. Гэхдээ бас гайхацгаагаад л...


Top
   
PostPosted: Apr.29.18 12:42 pm 
Offline
Эрхэм Гишvvн
Эрхэм Гишvvн

Joined: Apr.20.18 2:40 am
Posts: 35
.


Last edited by рөнэсанс on May.15.18 6:54 am, edited 1 time in total.

Top
   
PostPosted: Apr.29.18 6:47 pm 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Өөрийнхөөрөө хүчтэй орших гэж юу гэсэн үг вэ? Товчхондоо бол өөртөө эзэн нь байх. Бусдаас хамаарч баярлаж, гунидаггүй байх. Бусад гэдэг нь мэдээж өнгөрсөнд, хамгийн гол нь одоод болон ирээдүйд минь хамт байх үнэн зүрхний хайртай, дотны хүмүүсээс бусад шүү дээ. Магтууллаа ч, муулууллаа ч амар амгалан байх. Үнэндээ муулуулсан ч, магтуулсан ч юу ч хожихгүй. Мөн хүссэн үедээ хүссэн мэдрэмжээ гаргадаг байх их чухал юм шиг. Ерөнхийдөө өөрийн чиг шугамаа алдахгүй, өөртөө үнэнч байх гэсэн санаа л даа.

Мэдээж өөртөө эзэн байхын тулд сэтгэлийн хаттай байх хэрэгтэй. Сэтгэлийн хатыг дээр дурдсан үнэн зүрхээрээ намайг хайрладаг хүмүүсээс авна. Гэхдээ би амьдралд авахаасаа илүү өгөхийг чухалчилдаг хүн учир авснаасаа ихийг тэдэндээ өгөх хэрэгтэйг байнга санаж, хэрэгжүүлэх... Хайрлаж, хайрлагдаж байна гэдэг миний хувьд бүх зүйл л дээ.

Мөн хүн гэдэг аливаа юманд өөрийн зөв, буруу гэсэн цензур тогтоох хэрэгтэй гэж би боддог. Өөрөөр хэлбэл өөрийн гэсэн үзэл бодол, ёс суртахуунтай байх. Мэдээж хачир дээрээ туйлын зөв, туйлын буруу гэж үгүй. Хамгийн аюултай зүйл бол зөв гэж бодсон буруу байдаг. Тиймээс зөв, буруу гэж аливаа зүйлийг тодорхойлохоосоо өмнө маш олон талаас нь бодож үзэх хэрэгтэй. Хэрэв зөв гэж бодсон зүйл маань буруу болж батлагдвал чин сэтгэлээсээ уучлалт хүсээд хүлээн зөвшөөрөх. Тэгэхээр юмыг хүлээж авдаг чанар их чухал байгаа биз. Хэт нэг тал руу туйлширч болохгүй, гарц олдохгүй бол бусдаас шийдлийг нь эр. Хүнтэй харилцаанд ор, ярилц. Хүнд байдаг хамгийн сайхан, нандин зүйл бол бусадтай харилцах гэж би боддог. Хэрэв ухаантай л бол хүнтэй зөв харилцаа үүсгэж, өөрийгөө ч, нөгөө хүнээ ч өөрчилж, зөв зам руу ордог. Гэхдээ зөв зам гэдэг нь юу юм бэ? Яг тэр мөч хүртэл өнгөрсөн амьдралаа эргээд харахад харамсах зүйл бага хийж, бусдад их тусалж, хайрлаж хайрлагдсанаа мэдэрч, ирээдүйн амьдралынхаа талаар биелэх нь тодорхой мөртлөө өөдрөг сайхан зураглалтай байх юм болов уу даа.

Би өдий насалчихаад өнөөг хүртэл өнгөрснөө бүрэн мартаж чадахгүй, эргэж харж, өөрийгөө чөлөөлж чадахгүй байгаадаа өөртөө маш их гутардаг байлаа. Ууг нь сайн бод, бодоод шийдсэн бол буцалгүй үйлд гэдэг уриатай хүн шүү дээ. Гэхдээ ихэнхдээ үүнийгээ баримталж чададгүй байв. Овоо нэг болоод ирэв үү дээ гэтэл буцаж уйтгар гунигаа нөмөрч аваад, гунирхаад суучихдаг байлаа. Тэр үед би гарц, шийдэл бодохгүй, зөвхөн дурсамжаа л боддог тул алдаж байжээ. Өнгөрсөнг өнгөрсөнд нь үлдээж сурах ёстой, болохгүй юм үнэхээр болдоггүй л юм байна. Гаргасан шийдвэртээ эргэлт буцалтгүй бат зогсдог байх хэрэгтэй. Тэгж байж би өөрийгөө ухаантай гэж тоох юм шүү.

Тэгэхээр бүхний шийдэл нь эхлээд өөрийгөө улам илүү таньж мэдэх аж. Би эсрэг хүйстэнтэйгээ гүн гүнзгий харилцаанд орсноосоо хойш өөрийгөө биш бусдыг их анзаардаг болчихжээ. Энэ тийм ч буруу зүйл биш боловч би тэнцүүлж, тунг нь тааруулаагүй байна. Ер нь хэнтэй ч ямар ч харилцаанд орсон ойлголцож, ярилцдаг байх хэрэгтэй. Өөрт төрсөн мэдрэмжээ нөгөө хүндээ бүрэн дүүрэн ойлгуулж чадахгүй бол мэдрэмж гэдэг хүний туулж ирсэн амьдралаас шалтгаалж өөр өөрөөр буудаг байх нь. Ярилцаад ч ойлголцдоггүй хүнийг өөрөөсөө явуулчих л хэрэгтэйм шиг.

Өөрийгөө гээсэн хүн юунд ч сэтгэл ханахаа байгаад, цог золбоогүй, байнга л хоосон оргиж, уурлаж бухимддаг, гутранги болчихдог юм байна. Одоо алдаагаа ойлгосон тул өөртэйгөө ажиллах ёстой. Тэгээд бодол санаагаа бага багаар цэгцлэх хэрэгтэй.

“Хэрэв чамд асуудал бий бол эхлээд өөртэйгөө ажиллах” гэдгийг дээрх хүн гарч ирж надад тултал нь ухаарууллаа. Юм бүхэн хоёр талтай л даа. Хэт өөртэйгөө ажиллах тусам өөрийн үнэлэмж нэмэгдээд, үнэ цэнэ өсөөд, өөртөө бардах гээд байдаг сул талтай л байдаг юм. Энэ нь дараагийн дотно харилцаа, магадгүй гэрлэлтэнд бага сага асуудал үүсгэж болох... Гэхдээ ухаантай хүн бол ярилцаад, харилцаад, зохицоод, хүлээж аваад, хөнгөхөн хөөрхөн аваад явчихна байх.

Тэнгэр ч цэлмэж байна шүү. Энэ сайхан халуун дулаан, гэрэл гэгээтэй мэдрэмжийг бараг мартах дөхжээ...


Top
   
PostPosted: Jun.07.18 11:23 am 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Баярт мэдээ дуулсан урам зоригоор дүүрэн сайхан өдөр байна. Хамгийн гол нь бас гоё нь миний өмнөөс хагартлаа баярлаж буй хайртууд минь байлаа. Би ер нь тэдэнгүйгээр хэн юм бэ, ганцаараа хэр хол явна гэж? Бүгдийг нь тэврээд, үнсээд, баярлуулмаар байна. Амьдрах хүслээр дүүрэн ийм өдрүүд амьдралд олон тохиодоггүй ч, хуваалцах хүмүүстэй учир улам ч амт ордог юм байна. Бүгдэд талархаж байна.

Хүнийг оршин тогтноход, хүчтэй амжилттай явахад, ер нь амьдрахад бусдын нөлөөлөл дэндүү их юм. Хүн гэдэг амьтан чинь ер нь бие биенийхээ тусгал юм бишүү. Бие биенээсээ сайн, муу аль ч талаар байнга л суралцаж, даган дуурайж, үлгэрлэж байдаг ч юм шиг. Тэгэхээр өөрийн оршихуйг хүлээн зөвшөөрч л байвал бусдынхыг бас хүлээн зөвшөөрөх хэрэгтэй, мөн үү? Товчхондоо гол санаа нь хүний өмнөөс баярласан шиг баярлаж, зовлонг нь хуваалцсан шиг хуваалцдаг байгаасай л гэж. Заазаа дэмий балай юм бодох яахав, би үнэхээр баяртай, аз жаргалтай байна.


Top
   
PostPosted: Jul.19.18 6:27 pm 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Life is all about balance. Энэ их гоё үгээ. Тунг нь тааруулах гэхээс илүү хязгаар гэвэл илүү дүйх юм уу. Барррраг л бүх зүйл дээр хязгаартай хандах хэрэгтэй. Илүүдүүлж, дутуудуулахгүй, тунг нь тааруулнаа л гэсэн үг. Ер нь хүний сэтгэл гэдэг илүүдсэн, дутуудсан зүйл дээр л хөдөлдөг шүү дээ. Баярлана, шанална гэх мэт. Бодол, хүсэл, шунал, мөрөөдөл, харилцан яриа, атаа хорсол, хайр дурлал гээд л бүгдийг нь хязгаарлаж, тунг нь тааруулахыг стрессгүй, амар амгалан амьдрал гэх юмуу. Сэтгэл хөдлөлөө байнга захирах хэцүү л дээ, ойлгомжтой. Гэхдээ л “practice makes things shine”. Эсрэгээрээ робот шиг болчих мэт санагдаж магадгүй ч, нэгэнт сурчихвал байгаадаа сэтгэл ханаж, аливаа юмыг байгаагаар нь хүлээж авдаг болж, өөрийгөө цэгцэлж, бусдыг таних гэх мэт маш олон давуу талтай. Ер нь буддын сургаальд ч нэг иймэрхүү юм заадаг даа. Ойрд нэг иймэрхүү юм л бодоод сууж байна даа.

Боролсон гараа харахаар л хайр хүрээд, тэртээх өдрүүдийн нар, салхи, тэнгэр, агаар бодогдоод, нүдэнд харагдаад сайхан байна аа. Түүнтэйгээ хамт хол явж үзнэ гэсээр Завхан явчихаад ирлээ. Хамтдаа хол замд явах нь бие биенээ улам илүү таньж мэдэхэд тустайгаас гадна хамтдаа бүгдийг хийнэ гэдэг нь харилцааг маань шинэ шатанд аваачина гэж найдаад... Тэгсэн юуун нөгөөхөө таних, өөрийгөө баахан таниулаад, хаврын тэнгэр шиг аашаа үзүүлж байгаад ирлээ дээ хахах. Би ч ёстой хүнтэй харилцана гэж гурилддаг хүн байна гэдгээ бас мэдэж авлаа. Хүний арга эвийг олно гэдэг ч бас л их ухаан, мэдрэмж, авъяас юмаа. Манай хүн бол хэнтэй ч, бүр хэнтэй чиг л учираа олчихсон ах, дүү болчихсон явж байна. Харин би бол өөрт таалагдсан хүнтэйгээ л харилцаад бусдыг нь шууд аниад, “би чамтай харьцахгүй ээ” гээд том хана барьчихдаг хүн лдээ.

Ямартай ч тэр хүн намайг хаана ч өлсгөхгүй, дааруулахгүй аваад явчих юм байна гэдгээ баталлаа. Бас би түүний хувьд нэгэнт сонгогдсон хүн нь гэдгээ ойлголоо. Ингээд бид хамтдаа улам хол явж, олон хүний хайр, зэвүүцлийг татах нь ойлгомжтой боллоо. “Хурдан явмаар байгаа бол ганцаараа яв, хол явмаар байгаа бол хамтдаа яв” гээд нэг хөөрхөн үг байдаг даа. Бид хоёр их ч хол явна даа л гэж мэдрэгддэг юм. Анхнаасаа л түүний хэлээд байсан бүх зүйл цаанаа нарийн утга учиртай, одоо л миний мэдэрч харж буй ирээдүйг харсан, зөгнөсөн байсныг одоо л ухаарч байна. Богино жолоотой ч амьтан бол доо би.


Top
   
PostPosted: Jul.19.18 7:32 pm 
Offline
• Moderator
<b><font color=#000099>• Moderator</font></b>
User avatar

Joined: Jul.17.10 2:38 pm
Posts: 2045
Location: Бид Монголдоо хайртай бүлгэм ...Only Lawyers group...
тэмдэг

_________________
БҮДҮҮНҮҮД дэвжээ
-Lebron James-


Top
   
PostPosted: Jul.25.18 9:28 am 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Ажлаасаа гарах өргөдлөө өгчихөөр бүүр нэг хамаг сэтгэл санаа тогтохоо байгаад, хийцгүйрээд эхэлчихдэг тэ? Зургаан сар ажилласан газар, ижилдэн дассан хамт олноосоо салахнээ. Мэдээж дараагийн дахин нэг том алхам, илүү боломжоос атгах гээд... Олон жил мөрөөдсөн зүйл минь биелэж, гадагшаа явж сурах болсон.

Сүүлийн ажил маань намайг кареерийн хувьд өсгөсөн гэхэд арай чамлалттай хэдий ч, юугаар ч сольж орлуулашгүй сайхан хүмүүсийг амьдралд минь оруулж ирлээ. Намайг явна гэхэд эхнээсээ уйтгарлаж, гуниглаад... үлдсэн цөөхөн хоногт минь надтай сайхан дурсамж бүтээлцчих гээд тал талаас ирж тэвэрч авч, наалдаад байгаа энэ хөөрхнүүдийг яаая даа нээрээ. Хайртай бүхнээсээ хол ажилладаг болохоор ч тэр үү, бид энд бие биедээ их л амь байцгаадаг юм. Хүн хүнээрээ дутдаг хорвоо гэж ярьдаг ч, бид дотны хүнээ алдах, салаа замын эрхээр хагацаж салах, уулзаж чадахгүй байх гэхэд өөр нэгнээр нь орлуулаад нөхөөд явдаг бололтой. Өөрөөр хэлбэл хүүгээ алдсан хүнд хүүг нь орлож, ижил мэдрэмж төрүүлэх нэгэн, найзаасаа хагацсан хүнд найзлах хэрэгцээг нь хангах бас нэг хүн хэрэгтэй байдаг байх нь. Харин орлох нэгэн нь олдсон бол хүн нэг их хүнээрээ дутаж, зовж шаналах нь бага байдаг юмуу л гэж бодлоо. Энэ гэхдээ ганцаардлаас галзууртлаа айдаг манийх нь л бодол шүү.

Сайхан байна аа, уужуу амьсгал авахтайгаа боллоо. Алгуурхан ч гэсэн амьдралд минь прогресстой байгаа тул утга учиртай, их л сайхан байна.


Top
   
PostPosted: Sep.15.18 3:20 am 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Хол явж, газар үзэж, юм сурахын хүслэн болоод байсан хүн гуай зорьсон газраа ирээд дөнгөж 10 хоноод л гэрээ санаад, шантраад, ганцаардаад, зүгээр л бүхнийг хаяад буцмаар санагддаг байна шд. Өнөөдөр бүр дэндүү их шантраад болсонгүй. Арга ядаад гарж алхалаа. Суулаа. Тамхи татлаа. Бодлоо...

"Б минь чи өөрөө л хүсэж, тэмүүлсээр ийшээ ирсэн. Чи энэ бүх сорилтуудыг давж чадна гэсэн итгэл дүүрэн байсан. Хэн ч чамайг албадаагүй. Тиймээс одоо юундаа ч гунирахч, гутрахав. Хэндээ ч эрхэлж, гомдохов. Өөрийн сонгосон замаараа итгэлтэй алхаж, өөр бусдын чадаж байгааг чад. Амаргүй байх нь тодорхой боллоо. Гэхдээ л сэтгэлийн тэнхээтэй бай. Хүчтэй бай..."

гэж өөрийгөө зоригжуулаад надад урам өгдөг тэр зүйлсийг бодлоо. Тэр бол гэр бүл, ах дүү, найз нөхөд гээд миний хайртай хүмүүс, эх орон минь байв. Тэдний хайр, итгэлийг даах хэрэгтэй. Тэднийгээ бодох төдийд л хүч орох шиг. Юун ганцаардах, би чинь тэр олон хүмүүсийн хайр, итгэлийг хүлээчихээд юу солиорно вэ гэж бодоод, урамтай гэгч нь алхаад гэртээ хүрээд ирлээ.

Би өмнө нь гэр гэдэг чинь би өөрөө буюу би хаана л байна тэр газар гэр минь энэ тэр гэж их бяцхан, юм үзээгзй толгойдоо гүэ мөн их боддог байжулээ. Тэгсэн одоо тэгж томроод байсан гар чинь гэртээ харих юмсан гэж бодож, шантарч нтр. Хүний нутагт хэцүү байна нтр. Үнэхээр л би тэр бодолдоо эзэн байхын тулд, гэр гэдэг үнэхээр би өөрөө юм бол би шантрах ёсгүй. Ер нь энэ үгний цаад утга нь өөрийгөө олох юм байна шүү дээ. Өөрийгөө олчихвол, өөртэйгөө ажиллаад, өөрийгөө цэгцэлчихвэл би хаана ч сайхан аз жаргалтай л байх юм байна. Гэхдээ эх орон гэдэг сайхан, хэл, зүс нэгт хүмүүстэйгээ хамт байх сайхан ажээ. Хүний газар хүн ер нь жаахан дутуу л явдаг юм байна. Жаргал даадаггүй амьтад юм болохоор өмнөх тэр дүүрэн мэдрэмжээ үгүйлээд, гэтэл тухайн үедээ юм бүхэнд л сэтгэл хангалуун бус байгаад байсан. Ер нь л би өөрийгөө үнэхээр юм үзээгүй хоосон толгой юм гэдгээ л ойлголоо доо. Надад энэ сорилт их юм заах нь шиг байна шүү.


Top
   
PostPosted: Nov.25.18 4:38 am 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Өнөөдөр зүгээр л их энгийн юм бичье гэж шийдлээ. Кк нэг их шинжлэх ухаанч, философилог юм бичдэг хүн шиг үлээгээд хаячихвуу.
Хээрийн галуу нисэн үл хүрэх газар луу эрдэм өвөрлөхөөр ирсэн хүний охин алс холын энэ нутагт идээшин дасаад даруй гурван сар болжээ. Зориод очсон газраа дасахгүй гээд ч яах билээ дээ. Хүнийг хүн шиг амьдруулдаг нийгэм, хот газар их гоё юм. Хүмүүс нь стрессгүй, уургүй, хүүхдүүд нь эрүүл саруул, жаргалтай. Чаддагсан бол хөөрхий монголчууддаа соёлжсон нийгэм, стрессгүй хот байгуулаад өгөх юмсан л гэж их хүслээ. Соёлт нийгэм бас их өөр юм. Хүн хэдий боловсрол эзэмшээгүй, манайхны хэлдгээр орк байсан ч нийгэм нь өөрөө тэр хүнийг боловсруулаад өөд нь татчих юм. Гэхдээ манайх соёлт нийгэмтэй байсан үе бий. Би энд ирээд түүхийн ном их уншиж байгаа. Өөрийнхөө түүхийг харь хүний амнаас сонсмооргүй санагдаад. Тэр үеийн Монголчууд яасан юм бэ, хаачсан юм болдоо. Бид эрхэмлэж явдаг бүхнээ хаяад, үнэт зүйлсээ мартаад байх шиг л санагдах юм.

Гэхдээ би бас нэг юм анзаарсан. Нэг өдөр би уулын орой дээр байдаг цайзын туурь үзэх аялалд явлаа. Би сайхан засмал замаар автобусаар яваад, сүүлд нь хурдны галт тэргэнд солигдож суугаад, дороо л яваад орчихлоо. Тэр уулын бэлд тэр зөвхөн цайзын туурийг түшиглээд жижигхэн тосгон байгуулжээ. Юм болгоноо тэр цайзын үүх түүхтэй холбоод жижиг сувинер, зураг энд тэндгүй л нааж. Музей, зочид буудал, ресторан паб гэх мэт хүний хэрэгцээг хангасан бүх л юм байна. Дээшээ уул руугаа гарахдаа трамбай шиг юманд суугад 5 минутын дотор л гарчихлаа. Туурь нь ч туурь юмаа. Юу ч үлдээгүй боловч өмнө нь ийм тийм байсан гээд үүх түүхийг нь бичсэн самбар зөндөө л байна. Гэхдээ энэ нэг тийм, миний Хөвсгөл ороод Хатгал тосгоноос мориор Хорьдол Сарьдагийн нуруу руу яваад ирсэн аялалтай зүйрлэхийн аргагүй. Хаана нь ч хүрэхгүй. Нэг л тийм хиймэл, ямар ч адал явдалгүй. Би өмнө нь "манайхан аялал жуулчлалаа яагаад олигтойхон сайхан хөгжүүлээд ууландаа зам мам засаад хүн хүрэхэд амар болгочихдоггүй юм болоо" гэж боддог байваа. Гэхдээ одоо юуг ч өөрчлөх хэрэггүй, тэр хэвээр нь байлгасан нь зүгээр ч юмуу гэж бодсон. Би ер нь юмыг их өнгөц боддог хүн лдээ.

Би Bohemian Rhapsody гэдэг кино үзлээ. Миний сэтгэлд дэндүү их хүрсэн. Төрмөл авъяастай хүн гэж Фрэддиг л хэлэх байхдаа гэж бодсон. Тэрнээс илүү эхнэр нь болох Мэриг л их өрөвдлөө. Эмэгтэй хүн эрэгтэйдээ өгөөд л өгөөд л өгөөд л байдаг тэгээд өөрөө өгснөөнсөө багыг авдаг, заримдаа юу ч үгүй хоцордог. Эмэгтэй хүн ээж болсныхоо дараа үр хүүхэддээ өгнө. Насан туршдаа. Өөрөө тэгээд юу ч хүсэхгүй. Бодохоор л гомдоод уйлмаар санагдах юм. Муу ижийгээ л их санах юм даа. Би ойрын хэд хоног ээжийнхээ амьдралыг их бодлоо. Хөөрхий ээж минь жаргаа болов уу, одоо жаргаж байгаа болов уу л гэж их бодогдох юм. Ижийнхээ залуу насыг би авсан даа. Ээж минь одоо намайг хараад залуу үеэ дурсдаг байхдаа. Ээждээ л юм өгмөөр байна, ээжийгээ л баярлуулж, жаргаамаар байна. Энэ хүсэл гэхдээ маш агуу том, биелүүлж барамгүй мэт санагдах юм. Ууг нь хүнийг баярлуулахад том зүйл шаардадгүй л юмсан...


Top
   
PostPosted: Nov.27.18 11:41 pm 
Offline
• Moderator
<b><font color=#000099>• Moderator</font></b>
User avatar

Joined: Jul.17.10 2:38 pm
Posts: 2045
Location: Бид Монголдоо хайртай бүлгэм ...Only Lawyers group...
Нээрээ л бид амьд хүмүүс

_________________
БҮДҮҮНҮҮД дэвжээ
-Lebron James-


Top
   
PostPosted: Jan.17.19 9:22 pm 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Амралтаа далимдуулаад Швейцарь орныг үзээд ирлээ. Үнэхээр сайхан байгальтай, өндөр хөгжилтэй сайхан орон юмаа. Гэдэс дүүрэн, сэтгэл дүүрэн, хайр дүүрэн амьтан л харьж явна даа. Миний нагац эгч энд арав гаруй жил ажиллаж, амьдардаг юм. Залуу сайхан цагтаа гэр бүл, хайртай залуу, эх орноо орхиод явсан. Мэдээж илүү боломж, илүү мөнгө, сайхан ирээдүйн төлөө, хамгийн гол нь аав, ээж, ах дүүгийнхээ сайн сайхны төлөө л өөрийгөө золиослосон хэрэг. Хэл ус ч үгүй, мөнгө төгрөг муутай, нэг ч танидаг хүнгүй дээрээс нь хүний газар хөлөө олох гэж их л зовсон байхдаа. Залуу насныхаа ааг омгоор л бүхнийг туулаад гарсан болов уу. Ер нь залуу нас их гоё оо. Цаанаа л нэг эр зориг амтагдаад, болохгүй юмыг болгох гэж их үзнэ, алдана, ононо, сөхрөнө, босно. Ёстой л нэг галзуу барын аманд гараа хийхээс ч буцахгүй залуу нас минь гэж яг оноод хэлчихжээ. Одоо ч эгч минь намба суугаад, төлөвшөөд, нас нь ч бас явж дээ. Тэр их олон жилийн ганцаардал өөрийг нь их цэгцэлжээ. Ер нь л ганцаардал хүнд хэрэгтэй эд юм. Аливаа юмыг ухааруулна, зөв бурууг дэнслүүлнэ. Би ч бас энэ аялалд ихэвчлэн л ганцаараа явлаа. Чамгүй их зүйл орой руу орж байдаг шүү кк.

Хүн ганцаардах хэрэгтэй ч ганц биеээрээ энэ хорвоог туулж боломгүй аж. Нэгэнт л чиний сэтгэлийг хөдөлгөж чаддаг хүнтэй бол түүнийгээ байгаагаар нь хүлээж аваад, алдаа оноо, зовлон жаргалтай нь хамт хайрлах. Ер нь ямар ч хүнийг байгаагаар нь хүлээж авах, аливаад тайван хүлээцтэй хандах гэж их сайхан чанарууд байна. Юм үзсэн хүний зан юмуу даа. (Би бол тийм болох болоогүй ээ, гараандаа л явна) Үерхэл, хайр дурлал гэдэг багийн тоглолт учир тэнцүү л зовж, жаргах. Аль аль талаасаа золиос гаргаж, өөрчлөгдөж, зохицож амьдрах. Бага залуу насандаа нэг нэгнээ олж авсан бол цаашид амьдралыг хамт туулахад улам л хялбар болно. Хүн ер нь хөгшрөх тусмаа, ганцаараа удаан явах тусмаа хэтэрхий биеэ даасан, аминч болдог тул хүнтэй нийцэх гэж үйлээ үздэг бололтой.

Гадаадад олон жил болчихсон хүмүүс хөөрхий Монгол ч биш гадаад ч биш нэг тийм хоёрын хооронд гурвын дунд болчихдог юмуу гэж ажиглагдсан. Монголдоо сайхан амьдаръя гэхнээ тэр гоё газар, тэр сайхан нийгэмд дассан хүнд хэцүү. Тэндээ байя гэхнээ арьс өнгөөр ялгаварлах үзлээс эхлээд цаанаа л нэг дүүрэн бус мэдрэмж авна. Ер нь эмэгтэй хүн өөрийгөө хэд хуваачихаад, ойр дотныхоо хүн бүрт л шахуу санаа зовж явах юм даа.

Эцэст нь гэхэд хүний аврал бол харилцаа юм дөө. Хүнтэй ярилцаж, сонсож, өөрийгөө хүнд хэрэгтэй, нөгөө хүнээ ч бусдад хэрэгтэй хүн гэдгийг нь мэдрүүлэх л чухал юм дөө. Мөн залуу насандаа сайхан дурсамж бүтээх. Та бид хөгшрөөд дурсамжиндаа л амьдарна шүү дээ. Ер нь өдөр бүхэн л дурсамжиндаа амьдардаг шүү дээ. Сайхан дурсамж бүтээх хамгийн шилдэг арга бол аялах, хол явах, юм үзэж, нүд тайлах. Намайг дүү маань та бүр шаал өөр болжээ, их уян зөөлөн, хайлж урсаад л байдаг болж гэнээ кк. Өмнө нь нээрээ бас л бүдүүн баараг, юм үзээгүй мангар бацаан явжээ. Хожимдсон ч гэсэн ухаарч дээ гэж л өөртөө олзуурхаж сууна даа. Гэхдээ хүн бүр дахин давтагдашгүй өөр шүү дээ. Миний хувьд гэрээсээ хол явж л юмны зах зухаас ухаарч байна. Арай эрт явсан бол өдийд өнгөрсөн амьдралдаа бага алдсан, эргэж харамсах зүйл багатай л байх байсан байх. Шинэ орчинд дасан зохицож, байсан орчноо гадна талаас нь харж, өөрийгөө шинээр олж нээж, амьдралын үнэт зүйлсээ ухаарч байна. Гэхдээ оройтоогүй ээ. Чамлахаар чанга атгана шүү. Байгаа юмандаа талархаад, хажуудхуудаа хайрлаад, бясалгаад, аялаад, хийж бүтээгээд, том мөрөөдөөд байхад болно доо. Болдог ч юм, болгоноо...


Top
   
PostPosted: Apr.06.19 6:17 pm 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Жек Лондонгийн Мартин Эден романыг уншаад дахиж ямар ч ном унших хүсэлгүй болов. Энэ олон жил тэр их номыг уншиж, олон зохиолчийн толгойдоо ургуулсан хоосон дүрүүдийн төлөө зовж шаналан, зохиолчдын үзэл бодол, философиор тархиа угаалгаж ирсэн мэт санагдаад. Би ер нь өөрийн чиг шугам, үзэл баримтлалтай хүн билүү, хэн нэгний ил далд ятгалганд автаж өөртөө бууж өгч явсан билүү. Ямартай ч өнөөг хүртэл би оногдсон дүр бүртээ хамгийн сайнаараа тоглоогүй гэдгээ л маш сайн мэдэж байна. Эргээд бодоход харамсах зүйлс бишгүй байна. Гэхдээ би өөрийгөө буруутгахаа болисон. Цаашид хичээе даа л гэж боддог. Унаж байж босч, алдаж байж онож, хагацаж байж учирдаг нь над мэтийн хоосон толгойтны жам юмуу даа. Ууг нь хүн гэдэг өчүүхэн амьтан байгалийн жамаараа урсан хөвөрч, хэнээс юуг ч хүлээлгүй, өөрчилж чадахгүй зүйлсдээ стрессдэхгүй, амьдрах учиртай ч юм шиг. Даанч энэ их хөгжил, энэ их бэлэн байдал, энэ их тархи угаалт хүний амьдралыг их төвөгтэй болгож, хүнийг өөрийг нь их его өндөртэй мөртлөө дэндүү ганцаардмал бас зожиг болгосон санагддаг.


Top
   
PostPosted: Apr.08.19 6:56 pm 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Энэ л яг миний сүүлчийн хайр минь байх гэсэн бодолдоо итгээд нэг хүнтэй болж бүтэх гэж их үзлээ. Болсонгүй ээ нтр. Тэр хүний гарт зүрхээ үүрд атгуулчих санаатай аль байдгаараа л хичээгээд чадсангүй. Үүндээ ч бүр ядарч үхэх дөхлөө. Болохгүй юмыг болгож, хүсэхгүй хүнийг хүчилж өөрийгөө зовоогоод яахав. Урьд нь айхтар шаналж, зүгээ олохгүй шахуу төөрч явсан үе бий болохоор энэ удаад арай хөнгөн л байна. Гэхдээ л хайр дурлал гэдэг хамаг зовлон шаналлын эх үүсвэр билээ. Хүн угаасаа л зовох дуртай, зовлон руугаа тэмүүлж байдаг учир яаж ийж байгаад л бодлогогүй үг, үйлдэл гаргачихаад байх юм.

Их л өндөр эготой, аминч үзэлтэй, амбицтай хүмүүс байж таарлаа. Байнга сэрэмжилсэн, эргэлзсэн, өөрийгөө дутуу илэрхийлсэн мэдрэмжүүд. Дундаа нэг том хана барьчихаад л... Яг өөрcдийнхөөрөө жаргалтайгаар хамт байцгаасан үе нь тун цөөхөн л байх. Гэхдээ миний хувьд шинэ, сонирхолтой учрал байлаа. Олон зүйл ухааруулсан, ойлгуулсан, мэдрүүлсэн, тэгээд л боллоо. Мэдээгүй, ойлгоогүй, илэрхийлээгүй олон мэдрэмжүүд үлдсэн. Тэрэнд л жаахан гомдолтой байна. Гэхдээ одоо нэгэнт нөхцөл байдал иймээр эргэсэн тул нэг сайхан гүнзгий амьсгаа аваад урагшлах л хэрэгтэй. Одоо бол хэсэг зүгээр хоосон баймаар байна.


Top
   
PostPosted: Apr.09.19 6:48 am 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Энэ блогтоо идэвхитэй байдаг цаг минь иржээ. Санасан шүү. Энэ бүхэн гэхдээ ганцаардалтай холбоотой боловч ганцаардал үнэхээр хүнд хэрэгтэй эд юм.
Надад нэг тийм мөрөөдөл байдаг юм. Хэрэгтэй хүмүүст туслах. Хэрэгтэй гэдэг нь миний тусыг утгаар нь хүлээж аваад өөрийгөө хөгжүүлэх хүмүүс. Хичээл зүтгэлтэй хэдий ч боломж үнэхээр олдодгүй хүмүүс. Жоохон л дэмжээд өгчихвөл үнэхээр байгалийн өгөгдлөөрөө хол явж чадах тэр хүмүүс. Авъяастай хэдий ч хэт сэтгэл хөдлөлдөө автаад, бусдын бодлоос айгаад хойш суудаг хүмүүс. Гэхдээ зөвхөн эмэгтэйчүүд. Учир нь би өөрөө эмэгтэй хүн болохоор яг л ижил мэдрэмжийг өөр өөр туршлагаар авч байгаа. Би эрэгтэй хүний зүрхэнд хэзээ ч хүрч чадахгүйгээ ойлгосон. Учир нь эрэгтэй эмэгтэй хүмүүс бол огт өөр хүмүүс, харьцуулах ч боломжгүй, бүх мэдрэмж, бодол, авьяас, чадвар нь өөр амьтад. Тэгээд нэг гоё санаа төрсөн. Хайртай блогтоо бичээд үлдээчихье. Яг одоо миний амьдрал бас л сайнгүй л байна. Хайралсан залуудаа хаягдаад, дуртай гэгч нь хийж байсан ажлаасаа бас халагдчихсан. Гэхдээ энэ бүхээ дараагийн улам том зүйл рүү улам сайхан боломж руу намайг хөтлөнө гэдгийг мэдэрч байна. Ямар ч том зүйлсд золиос хэрэг болдог л биз дээ.


Top
   
PostPosted: Apr.10.19 10:03 am 
Offline
• Moderator*
<b><font color=#0000FF>• Moderator*</font></b>
User avatar

Joined: May.31.04 3:59 pm
Posts: 1410
Location: тодорхой
Санаа зөв бол заяа зөв өө. Блогийн сүүлийн хуудсыг уншлаа.Хэрэгтэй, хүнд нэгийг бодогдуулсан зүйлс байнаа байна.Яаж нэг өөрийнхөө блогоо сайхан хөтөлдөг юм билээ.

_________________
Туйлын үнэн улам бүр...


Top
   
PostPosted: Apr.17.19 2:34 am 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Өнөөдөр чин сэтгэлээсээ хайрласан, хамт байхыг үнэн голоосоо хүссэн залуугийнхаа сүүлчийн захиаг хүлээн авлаа. Маш өндөр зорилготой учир замд учирсан харилцаа, дурлал бүрээс өөрт хэрэгтэйгээ аваад өөрийн болгож сурах юмаа сураад, өөрийн хүсэл зорилго руугаа ээдрээтэй бөгөөд сонирхолтой байдлаар дээшилдэг Ги Де Мопассоны Хонгор найз номын гол дүртэй өөрийгөө адилтгажээ. Өөрийг нь илүү таньж өнгөрсөн харилцаагаа зөвөөр цэг тавихад надад энэ ном болон Мартин Эден хоёр туслах юм гэнэ. "Өөр хэлэх үг үнэндээ алга найз минь, залуу насны минь чухал дурсамж минь. Холыг бодож ойрыг тэвчиж яваарай" гэжээ.

Анх эхлэхэд л чамд надад байдаггүй нэг гоё юм байна, тэрийгээ хурдхан авчихмаар байна гэж их хэлдэг байсан юм. Тэр намайг амьдралдаа оруулахгүй гээд л нэг тийм хана босгочихсон юм шиг мэдрэгдээд өөрийгөө бүрэн илэрхийлдэггүй байж. Хайсан юмаа олсон бололтой. Тус болсон бол болоо доо. Надад ч бас өөр хэлэх үг олдсонгүй. Захиаг нь уншаад зүгээр л нулимс урсаад байлаа. Амьсгалахад хэцүү байлаа. Зүрхэн тушаа айхтар их өвдлөө. Бүхнийг хаяад зугтмаар санагдлаа. Тэр мөч, тэр мэдрэмж их гүн бөгөөд хэцүү байлаа. Яалтай ч билээ дээ, хаачих ч билээ дээ. Цаг хугацаа өнгөрөх тусам энэ бүгд мартагдана шүү дээ. Ганц гунигтай нь энэ захиаг авах хүртэл би хэрэндээ л цэгцэрчихсэн байсан юм. Дахиад л эхнээс нь эхлэх боллоо. Өөрөө сайхан цэгцэрч аваад өөрийнхөө илэрхийлмээр байгаа зүйлээ илэрхийлж санаагаа амраалаа даа тэр минь. Намайг гэхдээ бодсонгүй.

Ээжийн минь хэлсэн өөртөө хайртай залуутай болз, уулз. Чи өөрийнхөөрөө л наад залуугаа хайрлаад байгаа юм бишүү дээ гэдэг үг үнэн байжээ. Би өдийг хүртэл надад хайртай, миний төлөө бүхнийг хийх залуучуудаас зугатаж, өөртөө хайргүй, өөрийгөө л боддог залуучууд луу тэмүүлж иржээ. Одоо алзахгүй, одоо бүр л сайн хүнтэй учирна, жаргана. Амьдралд үүнээс илүү гуниг зовлон өчнөөн л тохионо шүү дээ. Тэр болгонд бага багаар бэлтгэгдэж, хатуужиж байна гэж харж байна. Ямартай ч одоо юу хийх, яах ёстойгоо мэдэж байна. Зүгээр л энэ мэдрэмжийг энд гаргамаар байсан юм. Нээрээ л залуу насны минь чухал дурсамж байлаа даа.


Top
   
PostPosted: Apr.26.19 5:28 am 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Гэцүү байна. Гунигтай байна. Голдоо ортол санаж байна. Түүнтэй өнгөрүүлсэн хором мөч бүхэн санаанаас гарахгүй хөврөөд байна. Гадуур гараад алхах бүртээ түүнийг хаанаас ч юм бэ гараад ирэх юм шиг хайгаад байна. Өдөр бүр л бодох юм. Үдэш бүр л зүүдлэх юм. Элэг минь эмтэрч, зүрх минь давчдаж байна. Солиорохнээ. Ганцхан удаа харахсан, ярихсан, тэврүүлэхсэн. Халамжлах юмсан. Хамт л байх юмсан.

Сүүлд уулзахдаа тэвэрт нь эрхэлж өчнөөн уйлсан юмсан. Намайг очсон эхний өдөр өөр оронд унтуулаад, үнсэж, тэврэхгүй хатуурахснаа маргааш нь өрөвдсөн үү яасан "алив нааш ир, явтлаа гурван хоног надад ханатлаа эрхэлж ав" гэж билээ. Тэгэхэд би цээжинд нь очиж наалдаад зөндөө уйлсан, эрхэлсэн. Гэхдээ ханаагүй ээ. Намайг буцахаар бүх юм дуусна гэж бодохоос үхтлээ айж байсан ч тухайн үеийн тэр хором мөч дахиж олдохгүй учир тултал нь жаргах хэрэгтэй байв. Бүх юм дууссан гэдгийг бат болгохын тулд өөрөөс нь сонсохын тулд би эргэлзэх зүйлгүй байгаа бүх мөнгөөрөө нисээд очсон сон. Гэртээ байгаа эсэх, хүлээж авах эсэхийг нь мэдэхгүй ч уулзах л ёстой гэж бодсоор эндэх хамаг юмаа хаяад явсан. Хэд хоног хоол идээгүй, унтаагүй, ухаан санаа нь орж гарсан хачин царайтай юм очиж билээ. Уулзсан даруйдаа арай гэж хэд гурван үг эвлүүлж хэлчихээд нэг сайхан уйлж авчихаад унтаад өгч билээ. Түүнийг харж тайвшраад, сэтгэл амарсандаа тэрүү гэнэт л бие болон сэтгэлийн хувьд маш их ядарснаа мэдэрсэн. Гэхдээ тэр үед намайг юу ч зогсоошгүй байсан. Хэрэв тухайн үед тэр надад "үлдээч" л гээд хэлчихсэн бол би бүх амьдралаараа дэнчин тавиад үүрд хажууд нь үлдэхэд бэлэн байсан. Хэтэрхий хайртай болчихсон байсан учир яг одоогийн мэдэрч байгаа энэ бүх сэтгэлийн зовлонг мэдэрмээргүй, туулж бармааргүй санагдсан юм. Бид хоёр ярилцсан, уусан, гадуур гарсан. Түүний надад хайртай нь мэдэгдэж байсан. Гэхдээ тэр өрийгөө хориод байсан, бариад байсан. Яг чин үнэн шалтгааныг нь мэдэхгүй ч надаас холд гэдэг тушаал авсан цэрэг шиг л байсан даа тэр минь. Дотроо их л эргэлзэх шиг болсон. Бас миний өөрийг нь гэсэн тэр их сэтгэлд уярсан шинжтэй байсан. Гэхдээ л сэтгэлээ маш сайн барьсаар байсан. Намайг явтал надад юу ч хэлээгүй, би ч хариулт нэхсэнгүй, тэгж байгаад яах ийхээ хэлээрэй л гэж захисан. Харин гэртээ ирээд хэд хонож байтал "дуусгая даа, чамайг цаашид зовоомооргүй байна" гэсэн захиа хүлээж авсан...

Би ууг нь түүний хязгаараас хэтэрсэн их юм хүсээгүй ээ, хамт л байхыг хүссэн. Үнэнч хайраа өгөхийг хүссэн. Гэнэн тэнэг залуу насаа хамт үдээд хамтдаа өтлөж, ухаажъя л гэж бодсон юм. Гэтэл тэр надаас ихийг хүссэн юм байлгүй. Гэнэт л надаас салах таван шалтгаан хүртэл бичээд явуулсан. Салах нь хамт байхаасаа амар санагдсан юм байлгүй. Жил ч хүрэхгүй хугацаанд бид хоёр яасан ч их юм үзэж туулаад, яасан ч их бие биедээ дасаад, яасан ч эрт сайн муугаа үзчихээв дээ. Эсрэгээрээ юуг ч хийж амжаагүй, юуг ч үзэж туулаагүй ч юм шиг. Тэр хүний хувьд хайр дурлал бүх амьдрал нь биш юм билээ. Би тавьсан том зорилгод нь саад болж, хөндөслөх гээд байгаа учир бид хоёр салах ёстой гэсэн. Үнэндээ учрыг нь сайн ойлгоогүй ээ. Сатаарах юм их бий ч өнөөдөр шиг ингээд үнэхээр гарч чадахгүй болтлоо доошоо уначих үе гарах л юм. Амьд л юм чинь, сэтгэл зүрхтэй юм чинь ингэлгүй л яахав. Гэхдээ тэгэс гээд мартана даа. Мартчихдаг юм билээ. Бүр эргэж бодохоос зэвүүцэл төртөл мартагдчихдаг л юм. Гол нь эргээд харамсах хүн нь би биш юм даа. Учир нь би өөрөөс шалтгаалах бүхнээ хийсэн шүү дээ. Тэгээд л гүйцээ.


Top
   
PostPosted: May.01.19 5:10 am 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Би хүний хөгжлийг аюулгүй, зам нь түгжрэлгүй, ажил нь цалин хангамж сайтай, эрүүл мэндийн үйлчилгээ нь найдвартай, сургалт нь чанартай, идэж буй хоол хүнс нь эрүүл хотод амьдрахаас эхлэнэ гэж боддог. Аюулгүй, сэтгэл амар, гэдэс цатгалан, эрүүл байлгадаг нийгэмд өссөн хүүхдийн гараас их юм гарна, тархи толгой нь зөв сэтгэнэ гэж боддог юм. Нийгэмд, хамт олонд, гэр бүлдээ, найз нөхөддөө хэрэгтэй хүн болж өснө. Хувь хүний хөгжилд өсөн торниж буй орчин, хүрээлэл, авч байгаа мэдээлэл нь маш чухал. Үнэхээр байгалиасаа гоё өгөгдөлтэй хүүхэд ядуу орчинд, хүчирхийлэгчийн гэр бүлд алан хядагчийн тухай кино үзэж өсвөл ямар хүн болох бол... Хүн гэдэг амьд явах хугацаандаа өөрт нь байгаа нөхцөл дээр тулгуурлаж олдсон боломжуудаас сонголт хийгээд өөрийгөө, өөрийнхөө амьдралыг бүтээдэг юм шиг. Гэвч өөрт нь байгаа нөхцөл гэдэг нь бусдаас хараат байдал тул бид ногоон ирээдүй бүтээхийн тулд эхлээд хүний суурийг зөвөөр тавьж өгөх сайхан нийгмийг бүтээх хэрэгтэй. Хүн ард нь мэдлэг боловсролтой, сурах хүсэл эрмэлзэлтэй, ажилсаг, стрессгүй, эрүүл саруул бол тэр улс жинхэнэ хөгжлийн манлайд хүрчээ гэсэн үг.

Сайхан нийгэм бүтээхийн тулд, хүнээ хөгжүүлэхийн тулд бидэнд зөв бодлого, нэгдсэн зорилт, нийтээрээ хүлээн зөвшөөрсөн зорилго хэрэгтэй. Хүн гэдэг сүргийн амьтан. Гэтэл энэ их технологийн дэвшил, хэрэгцээний нийгэм хүнийг улам л ганцаардуулж, бусдаас тусгаарлаж байгаа мэт санагддаг юм. Түүнийхээ хэрээр хүн зожгирч, би гэх эго нь өндөрсөөд, нийтээрээ биш ганцаараа хөгжих, баяжих хүсэлд автдаг байх. Ганц хот улс байгуулаад өөрөө өөртөө хаан нь болоод амьдарч чадахгүйгээс хойш бидэнд ийм аминч байх хэрэг байхгүй. Бид хөгжихийн тулд ногоон ирээдүй бүтээхийн тулд ганцаараа биш нийтээрээ сурч мэдэх хэрэгтэй, мэдлэг туршлагаа хуваалцах хэрэгтэй, нэгдмэл нэг санаатай, зорилготой болох хэрэгтэй, ойрыг тэвчиж холыг хардаг байх хэрэгтэй.

Миний бодлоор хүвь хүний хөгжил гэдэг дээр дурдсанаас гадна бурууг бусдаас биш өөрөөсөө хайдаг болох үед, хүнийг өөрчлөх гэж зүтгэхийн оронд өөртэйгээ ажиллах цагт, өөрийгөө таньж мэдсэн цагаас эхлэнэ гэж боддог.

Хүн төрөлхтөн анх үүссэн үед амьдралын утга учир гэдэг амьд үлдэх тэмцэл байсан бол өнөөгийн энэ эрин зуунд сэтгэл зовоосон зүйлгүй, аз жаргалтай, тайван байх болж хувирсан ч юм шиг. Энэ дэлхий дээр амьдарч буй амьд биет болгон байгалийн хуулинд захирагдаж, байгалийнхаа жамаар урсах ёстой байдаг. Хүн л ганцаараа тэр хуулиас давж, уйдамхай зан болон шуналдаа хөтлөгдсөөр өнөөгийн энэ нөхцөлд хүрсэн. Өнөөдөр бидний хийдэг бүхэн, хийх гээд байгаа бүхэн өнгөрсөн хугацаанд хийсэн буруу бүхнээ залруулахын төлөө байдаг. Тэгэхээр хөгжил гэж итгэж, зүтгэж ирсэн зүйлээсээ бид ухраад эргээд байгальтайгаа ойр байхыг тэмүүлдэг болсон ч юм шиг. Харин монголчууд бидэнд залруулах зүйл нь арай бага, хөнгөн байгаа учир боломж бий гэж харж байна. Бид хөгжил гэдгийг өндөр байшин, технологийн дэвшил гэж харахаас илүү эх орондоо уламжлалт амьдралын хэв маягаараа эрүүл энх, аз жаргалтай амьдрах гэж ухамсарлавал зохих ч юм шиг…


Top
   
PostPosted: May.08.19 4:11 am 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
"Бусдад л саад болохгүй амьдрах юмсан" гэх үгийг ойрд олон хүний ялангуяа монголчуудын амнаас сонсох боллоо. Миний бодлоор бусдад саад болохгүй амьдарна гэдэг нь чиний эрх бусдын эрхээр хязгаарлагдана гэдэгтэй утга бүрэн дүйх юм шиг. Зүгээр л зөвхөн өөрийн тусын тулд үг болон үйлдлээрээ бусдыг хохироох, эрх ашгийг нь хөндөх зүйл битгий хий л гэсэн үг биз дээ. Гэтэл энэ үгийг зарим нь бусдад л саад болохгүйм шүү гэсээр нэг буланд суусаар байгаад өлсөж үхэх эсвэл сэтгэл дотроо уудлахгүй явсаар дотроо тарчилж, ганцаардаж үхэх явдал гэж ойлгоод байх шиг. Хүнээс тусламж авах, хүнтэй найзалж нөхөрлөх, дотоод сэтгэлээ илэрхийлэх зэрэг бол амьдралд зайлшгүй байх ёстой зүйлс шүү дээ. Ялангуяа над мэтийн заавал хажуудаа түшиж тулах хүнтэй байх сонирхолтой, тэднээсээ урам зориг эрч хүч авдаг хүмүүст бусдаас хамааралгүй, бусдад буюу дотны хүмүүстээ саад болохгүй амьдрана гэдэг байж боломгүй л санагдах юм. Миний гол санаа бол энэ үгийг битгий буруугаар ойлгож, зожигроод, давж чадахгүй байгаа асуудалдаа живээсэй л гэж хүсч байна. Ялангуяа хүүхдүүд, өсвөр насныхан.

Цаг үе их сонин болж дээ. Нэг л их юм уншсан, мэдсэн мэдээлэлтэй хүмүүс. Буруу зөвийг нь дэнсэлж чадахгүй. Хэрэгтэй хэрэггүй мэдээллээр тархиа дүүргэж, угаалгасаар байгаад өөрийн үзэл баримтлалгүй салхины аясаар ийш тийшээ үсчсэн. Эсвэл нэг л их дотроо сүрхий сүрхий юм бодоод явдаг, хажуудахдаа нөлөө байдаггүй зожиг хүмүүс. Эсвэл үг, үйлдэл хоёр нь зөрдөг хүмүүс. Би ч бас өөрийгөө энэ дундаас олж хардаг. Гэхдээ энэ нөхцөлд ийм байдалд уусч, живмээргүй санагддаг. Бас ганцаархнаа энэ бүхнээс гармааргүй байдаг. Аль болох олон хүмүүст нөлөөлөөд хамтдаа гарахыг эрмэлздэг. За тэгээд би ч дээ, нэг л их том том юм бодож мөрөөдсөн амьтан. Яс юман дээрээ сэтгэл зүрхэндээ, мэдрэмжиндээ л дийлдчихдэг өчүүхэн амьтан шүү дээ. Өчүүхэн гэдгээ ухаажаагүй гэдгээ цаашид олон олон сурч мэдэх зүйл аялах газар их бийг ойлгож мэдэх тусам дорой үзэлтэн болчих гээд байх юм. Аль эсвэл дахиж юунд ч шунахгүй юу ч хүсэхгүй зүгээр л энэ нийгмээс хол газар очоод бүгж амьдармаар санагдах юм.


Top
   
PostPosted: May.13.19 8:59 am 
Offline
Эзэрхийлэгч Гишvvн
Эзэрхийлэгч Гишvvн

Joined: Mar.24.10 11:06 pm
Posts: 915
Манай дотуур байранд хоёр залуу байдаг юм. Бид гурав их нийлнээ. Хэл, соёлын бэрхшээлээс болоод бие биенээ бүрэн дүүрэн ойлгодоггүй ч зүгээр л хамт байхад таатай байдаг. Олон жил нийлээгүй хэрнээ харцаараа ойлголцдог хүмүүс. Хэн хэн нь л гурван биенээ тухтай, жаргалтай, гоё байлгахыг хичээнэ. Нас яваад ирэхээр ер нь ийм болдог юм биш үү. Аль болох л хамтдаа жаргахыг хичээж, хажуудхаа жаргааж түүнээсээ кайф авахыг хичээдэг болдог. Бас нас явахын хэрээр хүний насыг нүдийг нь хараад таадаг гэж би хэлж байлуу...

Тэгээд бид гурав өнөөдөр ярилцлаа л даа. Хүн ганц биеээрээ байж хорвоог бардаггүй юмаа, заавал хажуудаа түших чамд итгэл өгөх хүн хэрэгтэй гээд. Тэгээд тэр хүнийг олох нь л их хэцүү гэж нэг нь хэлэв. Би "олох нь хэцүү бишээ, сонголт арвин, гол нь бүхнийг үүсгэх нэг оч хэрэгтэй. Тэр очийг эрэгтэй нь эмэгтэйгээ таалсан тохиолдолд эхлээд асаана. Эмэгтэй нь хариу таалсан бол тэр оч асан ассаар гал болоод сүүлдээ дахиад оч болоод хэн хэнийх нь зүрхэнд үлддэг байхаа..." л гэж хариуллаа. Дэлгэрүүлж бичих гэтэл өрөөний охин сэрээд уурлав хаха. Сэтгэлдээ тэр нэг очийг тээж байсан, тээсээр яваа, дүрэлзүүлж яваа, хайж яваа ер нь энийг уншиж буй хэнбугай ч сайхан амраарай. Тэгж байгаад бодлоо цэгцэлсэн үедээ энэ яриаг үргэлжлүүлье дээ...


Top
   
Display posts from previous:  Sort by  
Post new topic  Reply to topic  [ 87 posts ]  Go to page Previous 1 2 3 4 Next

All times are UTC+09:00


Who is online

Users browsing this forum: Baidu [Spider] and 6 guests


You cannot post new topics in this forum
You cannot reply to topics in this forum
You cannot edit your posts in this forum
You cannot delete your posts in this forum
You cannot post attachments in this forum

Search for:
Jump to:  

Copyright Asuult.NET © 2000-2015.
Administrative Contact: Khundaga Khurelbaatar [hundaga@hotmail.com]
Tel: 1-888-303-4927, Fax: 1-888-406-2264.
Powered by phpBB © 2000-2015 phpBB Group. Powered by phpBB® Forum Software © phpBB Limited